Read Mayangna Cantares 7 Bible Online

Cantares 7 - Mayangna bible

Cantares 7

¹¡Kalma kidika ampat nunuhni yaksasihn yah chinela atangkat, king walanibis yal! bamasar nuhni iringwi yaklakna balna kidika kidika laih gol dini yaksihn yamna kapat ki yamwi lan balna yayamna kidika.

²Man uduma kidika laih sutak kapat kudungni ki kidika pasyakat wain yamni dis awas kidika; man bāma-u kidika laih plawar minik pupuwa dini kapat ki dipulu manah awaihdak kidika.

³Pasma kau tama balna kidika laih sana bu kapat ki, sana bu sūtki kapat.

⁴Damamak kidika laih sihm makau kilwi talnin marfil kau yamna kapat ki; mamakpa balna kidika laih was dakni bu kapat ki Hesbón tawanni nuhni kau duwa kidika, Bat-rabim dūrni yaihnit kau kidika; nangmatak kidika laih Líbano yakat makau kilwi talnin kidika kapat ki Damasco tawanni nuhni niningyakat talwa kidika.

⁵Man muihma minit kau tunama ilna sakkidika laih, Carmelo asangni kapat ki; basma balna kidika laih trit paisa kapat ki: ¡King as silak kau sakki, āraman pasyakat!

⁶Dalani matalayang, yal muih kulninna laihyang,[5] ¡ampat yaksihn mahn, ampat nuhni yaksihn mahn!

⁷Man muihma nuhni kidika laih sihm kuku panani kapat ki; dawak tama kidika laih kuku minik upuna kapat ki.

⁸Yang kuku yakat ilwakih yawi minik upuna balna kidika dunik. Kaput laih man tama balna kidika wain minik upuna kapat karang; wingmata puhtaman kidika laih mansana purki;

⁹man ahmapara kidika laih wain yamni kapat ki yudutni kawi kiwa kidika makungkimak dawak maanaki balna munah bayakwi kiwa kidika.[6]

¹⁰Yang laih dalani talayang kidika diniyang: witing kulnin yakat dalani talwa kidika yaklauwi yadu'kiwi.

¹¹¡Yawah, dalani matalayang kidika, walang yakat mawang! Alheñas puluni walsah yakat payahdarang.

¹²Mapiris wain pasyakat mawarang, talnin, pitwi kalahwapa, uman kurahwapa, granado balna kidika uman puluna pa. ¡Kidika yakat dalani talayang kidika maki!

¹³Mandrágora[7] balna kidika walapni yayakwi. Madūrki yakat di minik balna satni kidika bangki: di minik kusuna dawak wisam palni dakna kidika bik, man dima silp lanayang bangki.