Read Mayangna Isaías 10 Bible Online

Isaías 10 - Mayangna bible

Isaías 10

¹¡Alakaih manna, lā dutni ātamana kaput bik laih muih kulnin dukih kalawas kidika lā ātamana,

²muih parasnina dis balna niningna yakat lā kat yamtas mana kaput bik yang tawanki minikunni kidika rahmni kalatas mana, tingmak balna yakat taihta dini maltamana dawak warau balna yak dinina maltamana!

³¿Manna ais yamtanama yah kidika minit manalaihwakat, manna naikaupak talnangkat wah kidika kaiwakat? ¿Wais yakat ilp yulta yawanama yah? ¿Manna dimana minit nunuhni balna kidika amput datanamayah?

⁴Manna sauyak mana lakwi dawak silak yak mana dukiwas karang kat muih iyang balna tingnina yakat buktanama. Kaput bahang Papang kulnin daukalna kidika yamni kalwas ki witing ban niningna yakat yaklauwi.

⁵“¡Asiria kingni! Kidika laih pan as ki, bahang yaka kau dutik kulnik daukalwak wah diatayang, bahang kaput yus yamtayang[21] kulnik daukalwak.

⁶Sihtingkat tawan dudutni balna niningna yakat kalbauwi, yang kau dutni yayuyulwa balna yakat, bahang kaput laih dinina balna kidika malwi dawak dakyaknin bik, sihm tapas kau sau atakda kapat atakna atnin.

⁷Kaunah Asiria kingni laih kaput kulwas ki, kidika awaski witing yamnin kulwa kidika. Di ūk laih kulwas ki, kaunah daukalwi dahn yamnin manah kulwi tawan balna manas yakat.

⁸Yulwi: ‘Sau kingni balna bitik kidika yang tunan ānayang ais yulki kidika yamna atnin.

⁹Yang niking yakat laih sihm kapapatki tawan nunuhni Calno dawak Carquemis karak, kaput bik Amat kidika Arfad karak kapapatki, dawak Samaria kidika bik Damasco kapat ki.

¹⁰Muih pasyakat dawan dauh manas kalpaknayang, Jerusalén dawak Samaria kau duduwa kapat tanit.

¹¹Kaput laih yamniki, Samaria dawak daniwan balna kau yamnayang kidika, ¿sip-awas awakiyah, Jerusalén dawak daniwan dauh balna yakat kalyamna atnin?’ ”

¹²Dawan yamnin duwa kidika bitik yamwarang kat Jerusalén dawak Sayan asangni yakat, usnit kat Asiria kingni yakat wah kalawarang witing manah kapat kaldakawa kidika yulni.

¹³Asiria kingni kidika yulna: “Yang alas paraski kau yamnayang; yang laih sinski yamni dutayang, bahang wark balna yamnin kidika ridi yamnayang. Sau as kaupak, sau ūk yakat dakwi kalahwa lainni balna kidika satuk yamnayang, dawak kidika sauni paskau di minit nunuhni balna bangkidika bitik dunayang, dawak, muih kulnin parasni kapat king balna kidika tuklaknayang.

¹⁴Yang tingki kidika tawan balna dinina minit yakat ānayang, saunina bitik yang dunayang sihm muih as kat uhubin uni yakat sumani balna damukna kat duwa kapat, dawak muih as bik disdai lawani kidika bahna atnin, dawak kaput bik uhubin anani kidika wakahwasdai parasni yulna atnin.”

¹⁵Kaunah, ¿ki kidika witing kauh nuhni kaldakanin sip kat pah, yus yamwa muihni karak dawakat? ¿Sa kidika witing kauh nuhni kaldakanin sip kat pah murwa muihni karak dawakat? ¡Tulnah kidika laih pan as kapat awaskat pah, muih yus yamwa kidika-awaskat!

¹⁶Kidika bahang, Dawan parasni nuhni duwa kidika yaklauwi parasnina dis dawarangki muihnina nuhni duduwa balna yakat, dawak yamwak muihnina nuhni kidika dahlna karang yamah.

¹⁷Papang maisihni dis kidika laih Israel yaringni, bahang witing laih kuh dahlwa kapat kalwarang, ma aslah pasyakat wakal damasni kidika bitik busna karang, kidika sauni yakat.

¹⁸Bitik palni laih daukalpamna karang witing asangnipas yaksihni kidika, dawak dinipulu dahna pāni kidika bik. Kaput laih muih as yamah laihwak parasni dis dana kapat kalna karang.

¹⁹Kaput laih asangpas yakat pan balna kidika bulah kalna karang, bahang muihbin as bik sip karang kulwi talna atnin yapak bangpa.

²⁰Kidika mani Israel muihni balna bulah wawatwarang kidika, Jacob tawanni muihni balna dauwas yaklalawarang kidika, watwi kalwawalwas karang di daukalna muihni yakat, kaunah Dawan yakat parasni palni lalaihna karang, Israel Papangni holi yakat.

²¹Jacob tawanni muihni balna as as Papang yakat nawatwi uina karang.

²²Man tawanma Israel kidika mahni palni kuma kauhnimak kapat karang bik as as manah nawatwi uiwarang. Daukalpamnin kulna kidika ban kaput sakki, bahang la kat yamnin kidika laih bitik palni yamna karang ki.

²³Kat Dawan parasni nuhni duwa kidika yaklauwi daukalpamnin kulna, bahang adika sauni bitik yakat kaput yamwarangki.

²⁴Dawan parasni nuhni duwa kidika aput yulwi: “Yang tawanki Sayan yak yalahtaman kidika, yamaduwinih Asirio balna niningna yakat, pananina yakau mana wiwiswarang dawak tulninanah namangna yak dulalauwarang bik Egipto kau yayamna dai kapat.

²⁵Kat ma balna kidika parahni dudarang kidika wahni diana atnik, yang kulnik daukalna kidika yaklauwi imukna karang.

²⁶Dawan parasni nuhni duwa kidika yaklauwi wah diana karang Madián nining kau yamna dai kapat Oreb kinipala nuhni dai yakat, witing parasni kidika niningkana karang Asiria[22] nining yakat, sihm Egipto kau niningkana dai kaput.

²⁷Kidika mani dangmat kau di tikini ilna dai kidika lakna karang, dawakat arangmapana yakat pan ilwi sitna dai kidika bik bahngna karang.” Rimón munah muih balna kidika kawi aiwi,[23]

²⁸Ajat yakat kiwi kawi, Migrón munah bayakwi dawakat Micmas yakat dinina kidika dadawi,

²⁹was murwa munah dakyaklalawi dawak Geba yakat watwi; Ramá laih muihsak-dadauwi, Saúl kau Gabaa kidika balna laih kalahwi kikiri.

³⁰¡Bat-galim parasni sarahwi! ¡Laisa, dakah! ¡Nangnitlatah,[24] Anatot!

³¹Madmena kalahwi, kiri, Gebim muihni balna laih yakmamaldi.

³²Warmani, muih kawi aiwa kidika Nob yakat watwi; uman sainni diana ki Sayan asangni niningkauh kalbaunin, dawak Jerusalén asangni ubulni nining yakat bik.

³³Talnauh, Dawan parasni nuhni duwa kidika, pan nunuhni balna yakat parasni yamadangni kau laih bahwi; nanaini balna kidika bik bahna, malaluih balna kidika bik sau yak bubukna.

³⁴Ki kau duwi asangpas damasni balna kidika pihwi, Líbano kau pan nunuhni kau yaksasihn kidika dakna ki.