Read Mayangna Isaías 11 Bible Online

Isaías 11 - Mayangna bible

Isaías 11

¹Sarani kidika laih Isaí, bahang yakaupak ukuswi kalahwi; bahang ukuswi kalahwa kidika laih rikni kaupak kalahwi.

²Dawan spiritni kidika ma bitik yakat witing minit yak karang, sinsni lani nuhni kalana karang, dawak parasni bik, kaput bik laih di amanglana atnin dawak Dawan yamanidunin bik.

³Witing laih muih muhni yak talwi la yamwas karang,[25] kaput bik laih muih yuyulwa kat dakawi muih lānina yamwas karang.

⁴Muih miniknakunni balna yakat la kat yamna karang kaput bik laih muih miniknakunni rahmnina diana karang adika sau akat. Witing yulni balna kidika pan as muih kulnin dutni[26] yakat wiswa kapat karang, dawakat tinipas wingnita puhwa kidika kau kalawak muih dutni kidika dauna karang.

⁵Di rahm kidika dawak la kat kidika witing parakni duwarang ban kaput.

⁶Kaput laih nawah dawak sīp karak kulnin aslah yalalahwarang, nawah bulni dawak kuts bin karak aslah kalangwi wingninata pupuhwarang, turuh almuk dawak layan karak bararakwarang[27] kalpakwi, kaput laih muihbin as yaklauwi didukiwang.

⁷Turuh yal dawak dangkatakalbas yal karak kaltalyang yamni karang, dawak walaninabis balna kidika aslah kalangwi wingninata pupuhwarang. Layan kidika sihrsihr kaswarang turuh kapat.

⁸Muihbin kidika bil pāni sulihni yakat yakisdarang, dawak pāni yakat tingni uhr'āwarang.

⁹Yang asangki maisihni dis kidika yakat muih as bik dutni yamnin diskarang, was kidika kuma yakat kiwi bahngwa kapat laih Dawan sinsni lani kidik, kidika sauni yakat bahngna karang.

¹⁰Kidika mani, rikni kaupak ukuswi kalahna bahang kidika laih Isaí kaupak kidika dulauna karang sain as tawan balna bitik muhnina yakat; sau muihni balna kidika uiwi wawalwarang, pāni sakkarang kidika laih pa as alasna yamni manah karang.

¹¹Kidika mani yakat, Dawan watwi parasni kidika niningnakana karang tawanni sutni kidika bitik laih'yakwi duwi, Asiria dawak Egipto kaupak nawatwi duaiwak, Patros kaupak, Etiopía kaupak, Elam kaupak, Sinar kaupak, Hamat kaupak, kaput bik laih kuma paskau pa balna kidika kaupak bik.

¹²Sain as dulauna karang muih balna talna atninna dawak Israel muihni balna pa ūk kau bang bang dai kidika kaupak duaiwi uduhwak; wing sutni arungka kaupak duaiwi uduhwarang, Judá muihni balna rana bangdai kidika.

¹³Efraín tumwa kidika dahn kalna karang, Judá bik kulnin daukalwa kidika dana karang, Efraín yaklauwi judá yakat tumwa kidika dana karang.

¹⁴Albupak kalpakwi ma kāwa kau filisteo balna niningna yakat uina karang, dangnit munah uiwi minit yakat bubukna karang; kalpakwi dinina dakyayakna karang, ma kāwa muihni balna yakat. Parasnina kidika Edom dawak Moab kat kiuna karang, dawakat Amón muihni balna yakat ditataihna karang.

¹⁵Dawan yaklauwi Kuma Pauni munah ta as yakwi diana karang, tingni kidika uhrwi dukiuna karang Eufrates wasni kat, wing parasni yamadangni as kalawak wauhwi wasni kidika tingni tiaskaubu sahwi yakna karang, dawak kaput laih susnina kidika yakwas ban sip karang dakyaklana atnin.

¹⁶Papang tawanni sutni kidika Asiria kaupak nawatwi kaiwarang kat, ta nuhni as yakna karang, sihm Israel Egipto kaupak kalahna dai kapat.