Read Mayangna Isaías 13 Bible Online

Isaías 13 - Mayangna bible

Isaías 13

¹Prapit yulni balna kidika, Babilonia nining yakat yulna, yulni balna kidika Amoz walanibis Isaías yakat niningkana dai:

²“¡Kalbaunin sainni kidika dulautanauh asang as di dis ahni manah kat! ¡Paktanauh kalbauyang muihni balna yakat, mahka kalbaunin! ¡Tingmana dulautanang kat mahka aiwang muih nunuhni balna dūrnina yakat!

³Kulninna dadasni duyang balna dutayang yakat diyulnayang aina atnin, kaput bik laih kalbauyang muihni balna Papang yakwi duna balna kidika yakat paknayang, kaput bik yang minit bayakting alasna duduwa balna yakat bik, yang wah sihtayang kidika witingna yaklauwi yamna atnin.”

⁴Muih mahni sararahwa kidika lāih ki asang yakat. Sau muihni balna sararahwa kidika lāih ki, tawan muihni balna mahni kalpakwi. Dawan parasni nuhni duwa kidika minikpa kau bitik talwi bayakkiwi kalbauyang muihni balna mahka ridi kalna bang yakat.

⁵Pa naikaupak aiwi, sau kiwi watwa tanit yakau. Dawan kulnin daukalna dini balna duwi kaiwi, sau bitik yakat daukalpamna atnin.

⁶Ihtanauh, kat Papang mani kidika ulis dana bahang, parasni nuhni duwi bauwa kapat kaiwi.

⁷Kaput laih muih bitik tingnina lalakna manah karang, bitik laih kulninna dadasni dis dana karang

⁸dawak muihsak dadauna karang. Witingna yakat kaina karang kaidinin nuhni palni dawak dalani nuhni palni muih yal muihbin duwarang kapat. Biri biri kaltatalwarang, kaput bik laih muhnina daihwarang asalni yulni.

⁹Dawan mani kidika kaiwi kawi, yamadangni mani, kulnin daukalna daihni mani, sau adika kauhmak wanilang kalna karang kaput laih muih dutni yamyang balna kidika bitik dahnyamna karang.

¹⁰Kisang kau yala balna kidika yaringni duwas dawarang; ma kidika kalahwarang kaunah yaringni dis karang, dawak waiku bik yaringni dis karang.

¹¹Dawan yulwi: “Sau yakat wah kalaki dutni yamwa yulni, dawak muih balna dudutni kidika laih iyang balna bahang. Witing manah kapat kaldakakawa balna kidika dahn yamki, kaput bik laih sau yakat lakmukki kidika muih balna.

¹²Yang yamting kat muih ahal balna kidika dis kalwarang sihm Ofir kau gol walwi yayakwas kapat karang.

¹³Kaput laih kisang kidika laih isihna karang dawak sau kidika bik pāni kaupak pa ūk yakat yaklana karang, kulnik daukalna mani karang yakat, kulnik daukalna daihni kidika.

¹⁴“Muih balna kidika sihm sana uhuiwak kira kapat karang, kidika awas kat sīp balna kalruhwa kapat karang watwi uduhnin muih as bik dis kapat. Witingna kidika saunina kat kat uina karang, sauni palni kaupak dawi kikirarang.

¹⁵Kalpapakwarang bitik kidika laih kuhbil kau dipapana karang, kaput bik dadawak dilalaihwarang kidika ihina karang.

¹⁶Witingna miniknapa tani yakat walaninabis binina kidika laihwi sau yakat ruhmwi babahrna karang; ūnina balna yakat kawi dinina mamalna karang, dawak yalnina balna yakat bik dutni diyayamna karang.

¹⁷Medo muihni balna yakat kulninna dulauki, kidika muihni balna lalah yakat kukulwas balna kidika, kaput bik gol kidika dukih diawas ki.

¹⁸Sininabang kau wawahma yakat ihina karang. Muih binina batatahn binina yakat miniknakun tatalwas balna kidika.

¹⁹Babilon kidika, sau muihni balna golnina, di minit nuhni dawak Caldeo witingna manah kapat kaldakakawa dai, Sodoma dawak Gomorra kapat kalna karang, yang lawik daukalpamting kat.

²⁰Wat bik laih yakat muih yalalahwas karang, kidika yakat. Arabes balna kidika watwi yakat pa duduwas karang, kaput bik laih sīp maintalyang balna kidika dadawak sīpnina balna kidika yakat kalangwi yakururupwas karang.

²¹Kidika yakat kuruh balna pa duduwarang, kubam balna kidika ūpas yakat kakawarang, dawakat uhu nunuhni balna bik kidika yakat panina duduwarang, dawak kuts balna bik yakat susutna karang.

²²Kidika ūni nunuhni balna[28] yakat sul wail balna kidika auhwi kakaidarang, king uni yaksinh balna dai yakat nawah pauni kakawarang. Babilonia awarni kidika kiwi kawi; ma mahni duwas ki.”