Read Mayangna Isaías 14 Bible Online

Isaías 14 - Mayangna bible

Isaías 14

¹Dawan kidika Jacob yak dalani talwarang kat. Watwi Israel kidika witing dini kapat yakwi duna karang, dawak yamwak Israel balna kidika watwi saunina duduna karang. Pa ūk muihni balna kidika yaihnitna yakat uiwarang, Jacob tawanni yakat aslah kalbahahana karang.

²Sau ūk muihni balna kidika manas Israel balna yakat minikna dawi uinakarang saunina kat, Israel balna yaklauwi warau kapat laihwi duduna karang Dawan sauni pasyakat. Israel balna yaklauwi biriwi silak ahana karang tanit mani kau witingna yakat silak ahana dai kidika, dawak kidika balna minitna yak karang muhnilau kau ditataihna balna dai kidika.

³Israel tawanni, man dalani wauhtaman kaupak Dawan yaklauwi wingmata puhnin mawarang kat, warau lani yakat maahana dai kidika kaupak,

⁴adika yulni damni yulna man karang Babilonia kingni yakat sarahni tala: “¡Talnauh king dutni dai kidika angkat kaiwi yaklauna yah! ¡Talnauh kulnin parasni dutni dai kidika[29] angkat sakyah!

⁵Muih dutni parasni dai kidika Dawan yaklauwi dakna, kaput bik king dutni panani dai kidika bik bahna

⁶kulnin dutni kau muih balna yak wah diawa dai kidika laihwatwas wiswa dai kidika, anwi muih balna yak taihwa dai kidika, kaput bik minikun talwas uiwi kiwa dai kidika.

⁷Sau bitik yak kulnin lani aslah ki dawak isningnalak ki, dawak bik alasna duwi sararahwi.

⁸Awas balna dawak Líbano suhunni balna bik alasna duduwi daukalna kidika yulni bahang aput yuyulwi: ‘Man bukna man kaupak, muih as bik kidika yulni yana yuyulwas ki.’

⁹Sau kau, muih dadauna balna pasyakaupak kalahwi uiwi man karak kalpapakwi. Muih dauna balna wayani kidika sahmumuhwi, sau tunan muihni balna bitik kalahwi uiwi man karak kalpapakwi; sau kingni balna bitik yalalahwa pāni kaupak yaklalauwi.

¹⁰Witingna bitik laih yuyulwi: ‘Man bik parasma disna man, yangna kapat alahwana man.

¹¹Man manah kapat kaldakana man dai kidika akat kaiwi watna unbautaman balna dai kidika. Alangwaman pāni kidika wayāni ki, babil balna kau dangmat ritaman.’

¹²“¡Amput bukna manh makau kisang kaupak, payahlawa yaringni man kidika! Sau yak matuklakna, man muih balna yakat minitna bayakta man dai kaunah.

¹³Man kulnam pasyak kultaman dai: ‘Makau kisang kat ilwik yawaki; yang tronki āki Papang yalani balna minit yakat; wadah nining kau naikau yakat yawik yalahki, asang as dawan balna kalududuhwa pāni yakat.

¹⁴Mukus minit yakat ilwa ki tanit makau yakat; Papang kapat awaki.’

¹⁵¡Kaunah di rahm kidika laih dadauna pāni dinit yakat āwa yawanaman, kudungni tanit tuhni yakat!

¹⁶Ma tatalwa muihni balna kidika watwi matalwa babangki, man yak matalwi yuyulwi: ‘¿Adika alni yah yamwak sau kalyukwadai kidika, muih balna yakat iwadai kidika,

¹⁷sau adika bitik kauhmak wanilang yamna dai kidika, tawan nunuhni balna bitik daukalwa dai kidika dawak silak muihni balna laih yakwas dai kidika?’

¹⁸Sau kingni balna bitik risninapik kau wingninata pupuhwi witingna saunina ū yakat;

¹⁹man yakat laih sau ū kaupak naikau maruruhmna sihm bubuh[30] kapat, muih dauna kat kal kau atatakwa kapat, muih ihina, dininamak dadakna balna kidika bik pa wakarhni kipala manah pasyak ruruhmna kapat.

²⁰King ūk balna nununa kapat manunuwas karang, kat man sauma kidika daukalpamna man bahang, kaput bik tawanma muihni balna ina man bang. muih dutni sulani balna kidika nai ban kaput-awas karangki.

²¹Ridi alahwa walaninabis balna kidika itah witingna papangnina balna dai kidika muih yakat ihina dai bahang, kaput laih witingna baisa kukulwas karang sau adika laihwi dunin dawakat tawan nunuhni manah yamnin.”

²²Dawan parasni nuhni duwa kidika yulwi: “Witingna niningna yakat lawaki, Babilonia ayangni kidika dispamki muihni balna buas wawatna kidika manina balna dawak buhnina balna bik.

²³Suamp manah diyamki panina kidika, dawak kuah kasnin manah ukusna karang. Daukalnin unibitna kau bitna awaki.” Dawan parasni nuhni duwa kidika kaput yulwi.

²⁴Dawan parasni nuhni duwa kidika, witing ayangni kau yakwi yulna: “Rahm palni laih, yang yamnik kulnayang kidika laih, kaput yamna karang; yang barangni yamnayang kidika yakat kalahna karang.

²⁵Asirio tawanni balna kidika daukalmukki yang sauki paskau bangkidika, yang asangkipas yakat īki. Witing tawanki yakat taihwa kidika dana karang, muih taihwa kidika baisa salahni yakat duwas karang.

²⁶Kaput yamnik kulnayang, sau bitik yakat. Yang tingki kidika sau muihni balna bitik niningna yakat yaklauwi.”

²⁷Dawan parasni nuhni duwa kidika kaput yamnin kulna, muih as bik yaklauwi yamnin-awas kaltas karang. Witing tingni kidika niningna kauh yaklauwi, muih as bik yaklauwi yamwakat satuk yamwas karang.

²⁸King Acaz dauna kurihni yakat, Isaías adika yulni balna yulna:

²⁹Alalaswinih, filistea muihni balna, mawiwiswādai kidika panani bahna yulni, kat bil as kalahna pāni kaupak bil ūk kalahwarang ki, baisa kaput bik waula lawani duwa kidika kalahwarang.

³⁰Muih miniknakunni balna kidika yang sauki yakat tuninaruh kasnin sihr sihr yayakwarang,[31] muih di dis balna kidika isningnalak wingninata pupuhwarang. Yang lawik, man namang yakat laih satuk yamki, yamtingkat muihma balna kidika bitik yuh dadauwarang, dawakat buas wawatwarang kidika laih tani imukki.

³¹¡Filistea tawanni nunuhni balna aidanauh, dalawak parasni sarahtanauh, muihsak dautanang manayukwang! Tingpal niningkaupak mahni aiwi kalbauyang muihni balna kidika sihm wayau kapat; muih al as bik aiwa bang kidika pasyakaupak kalahwas ki.

³²¿Kidika sauni kaupak muih sihwak aiwa kidika balna yakat ais as nangnitna lanin sip yah? Dawan yaklauwi Sayan yakat parasni kalana, witing tawanni muihni balna kulninna bukna kidika yakat kawi yakmamaldana karang.