Read Mayangna Isaías 15 Bible Online

Isaías 15 - Mayangna bible

Isaías 15

¹Prapit yulni Moab nining yak yulna kidika: Ar daukalpamna puknita yakat Moab yak bik daukalpamna; Kir daukalpamna puknita yakat, Moab bik daukalpamna.

²Dibón muihni balna kidika uiwi kakaidi, asang ubulni kau makat yulnin uni yakat. Moab bik kaidi Nebo dawak Medeba daukalpamna yulni. Witingna bitik laih tunanina kakahrna, kungninabas bik dadakna.

³Tapas yak muih balna kidika uiwi asninana utuhni kawi; ūnina mayak kilwi sarahwi kakaidi dalani kidika yulni.[32] Muih kalududuhwa pāni yakat muih bitik kakaidi miniknawas yayakwi.

⁴Hesbón dawak Eleale witingna ilp yuyulwi; Jahaza kat sararahwa kidika lāih ki. Kidika bahang Moab muihni balna, kalbauyang balna kidika yamaduduwi.

⁵Yang ising kidika Moab ilpni yulwi; muihni balna kidika kalahwi kiri Zoar dawak Eglat-selisiya kat uiwi. Luhit pāni kau lau kilkiwa yakat kaidīnah iluiwi; Horonaim tāni yakat parasni sarahwi kaidīnah uiwi di daukalna balna kidika yulni.

⁶Nimrim kau pa kuhrna balna dai kidika bitik buhlakna, dibasta balna bitik kusulalana, dadauna, dibasta as bik sangni diski.

⁷Kidika bahang muih balna kidika dinina balna bitik duwi uiwi álamos wasni tanit yakat.

⁸Ilp yulwi sararahwa kidika Moab sauni kiwi watwa munah awaihwi kaiwi; kakaida balna kidika Eglaim dawak Beer-elim kat kiwi.

⁹Dimón pāni kuhrna balna kidika ā manah bung karang bik, dutni kidika baisa sihna karangki; Moab kaupak kiri yaklalawarang kidika layan yaklauwi dikaswarang, kaput bik adika sauni yakat sangka bangkarang balna kidika bik.