Read Mayangna Isaías 16 Bible Online

Isaías 16 - Mayangna bible

Isaías 16

¹Kauhmak wanilang, Sela kaupak tunan muihni balna kidika sisihwi sīp[33] Sayan asangni kat.

²Moab muihni balna kidika Arnón tāni bayakwa yakat sihm uhbinina uhuswakat yamaduwi ūnina dawi kikira kapat ki.

³Sayan yakat kalyuyulwi: “Di as yamta nakitna daktah, takitna daknin kidika man yamtah. Ma daihni pasyakat sanni dutaman kidika mayatah sihm pukta kapat; panina kaupak kangwi yayakna balna yakat pa diatah, dutni yamwi kikira balna kidika alas diyulwi iwinih.

⁴Datangkat man yakat yakmamaldang. Moab muihni yakmamalda balna kidika. Pa diatah daukalwi dis yamwa kidika niningyakat.” Taihnin lani kidika dahn kalwak daukalwi dis yamwa kidika bayak dawakat, ai'kawi kalbabauna balna kidika kalahwi uidadawak,

⁵Devid sulani as king kawarang, bahang adika kingni kāwa kidika rahni balna ukna karang minikun talnin lani karak. Wihta as barangni karang, muih rahmni kidika kalana karang, dawakat yamwakat la kat kidika sirihni palni kiwi kalana karang.

⁶Amangladi witing manah tanit nuhni kapat kaldakawa kidika Moab, kulnin dutni kidika, nuhni kaldakawa kidika, dawak yul mahni yulwa kidika bitik dauh manah kidika bik.

⁷kidika bahang Moab muihni balna bitik kakaidarang saunina yulni; kulninna bukna kidika nuhni palni didalawarang Kir-hareset ahalni balna yulnina.[34]

⁸Hesbón dawak Sibma wainni yamak balna kidika kusulana karang, sau tunan muihni balna yaklauwi daukakalna karang. Rahni balna kidika Jazer yakat kiwi kāwa dai, kauhmak wanilang kat bik kiuna dai kaput bik kuma nakas tanit yakau bik.

⁹Kidika bahang Sibma wainni yamak yulni aidayang, Jazer yulni bik sihm aidayang, kaput bik Hesbón dawak Eleale yulni mikwas yaktayang, kat kidika minik balna minit yakat war kalbaunin kidika sakdai bahang.

¹⁰Alasna kidika dawak didakadisahni atwa kidi bik dahn kalna karang pa balna yak; muih as bik alasna duwi sarahwas karang kaput bik unbauwas karang wain yamak pasyakat, dawakat wain minik balna kidika baisa tiriswas karang wasni yakna atnin. Sararahwa balna kidika bik dahn kalna karang.

¹¹Ising kidika kalyukwi sihm paswi yakisdinin dini as kapat Moab dawak Kir-hareset yulni.

¹²Moab kidika asang ubulni yakat wat wat kiwi kalni dinit yakat bukwi yulna manah kalsuhwarang, kaput bik makat yulwa uni yakat kiwi makat yulwarang karang bik di asbik yakwas karang.

¹³Adika yulni balna kuduh Dawan yulna dai kidika Moab nining yakat kurih mahni dana yakat.

¹⁴Waradika laih Dawan yaklau aput yulwi: “Kuruh bās pasyakat, sihm wark muihni witing minit duwarang kidika kulwi talwa kapat, Moab nuhni barakna kidika daukalna karang, muih mahni duwa karang bik; tingkurus bung manah watwarang bubin dawak parasni dis.”