Read Mayangna Isaías 17 Bible Online

Isaías 17 - Mayangna bible

Isaías 17

¹Prapit yulni Damasco niningyakat yulna: Damasco tawan nuhni kidika tawan-awas kalwarang; di daukalwi uhna kapat manah kalwarang.

²Ruhmwi dana karang ban kaput atnin yakat,[35] sihrsihr manah kalna karang; bahang kidika yakat tinglau balna kidika sihrsihr kakaswarang isningnalak.

³Efraín yulni Israel witing manah kapat kaldakawa kidika, witing tawan parasni as dis kalwarang; Damasco bik sihm kaput kalwarang, Siria kau watna balna kidika, king kāwa pāni kidika dis kalna karang. Dawan parasni nuhni duwa kidika yaklauwi kaput yulwi.

⁴Kidika mani Samaria, Jacob witing manah kaldakawa dai kidika, parasni witna karang, barakna dai kidika disna karang pini.

⁵Sihm di minik bahyang[36] plawar minik bahwa kapat kalna karang, witing tingni kau plawar minik balna laihwi bahwa kidika, kidika awaskat Refaim sauni langni kau plawar minik babahwa kapat,

⁶sutni balna kidika manah dinitnakahwak damumukna kapat; kidika awaskat olib panan yakat isisihwak minik balna kidika bu kidika awaskat bāslah tingnisut yakat watwa kapat karang, dawak panan balna bitik yakat kukulwak minik singka manah kalahwa kapat karang. Adika laih Israel Papangni Dawan yaklauwi yulwi.

⁷Kidika mani, muih al minikpa kidika kalyamna muihni yakat dulauwarang, Israel Papangni maisihni dis yakat.

⁸Watwi walapni busnin pāni yakat talwas karang, dawak muih al tingni kau di yamna balna yakat bik. Kaput bik laih pan sarani maisihni dis balna yakat bik talwas karang, dawak daninawan kau walapni bubuswa pāni balna yakat bik.

⁹Kidika mani man tawanma parasni balna kidika bitik laih ruhmwi dana karang, sihm heveo dawak amorreo balna tawannina[37] ruhmwi dadana kapat, Israel balna yakat yamaninaduduwi. Kaput laih pāni balna kidika kauhmak wanilang kalna dai,

¹⁰kat Papang malaihwi yakna kidika datang damatkahna bahang, ismangkattasman dai witing kidika yakat yakmaldinin as rahm tanit yamni kidika. Dipulu walalapni yayamni balna kidika dahtaman, kaput bik laih pan balna kidika dahtaman dawan as amangnilatasman kidika ayangni nuhni yamta,

¹¹dawak panan balna kidika madah yakat yamni maintalaman, dawak yamtangkat ma as payahwak mahka minik yakna atnin. Kaunah yamahni kaiwak, kidika yamahni laih sinika as bik dis kidika, minik balna kidika bitik laih daukakalna karang.

¹²¡Dakanauh tawan mahni di parasni atwa kidika, sihm kuma parasni yulwa kapat! Kidika parasni yulwa kidika laih sau muihni balna kaupak kaiwi, sihm was parasni murwak yulwa kapat.

¹³Kaunah Papang yaklauwi dibilwak kalahwi kikiri naikau, sihm dibasta kusulana kat wing dulauwi dukiwa kapat.

¹⁴Ma ulahu yakat taldakat yamadangni ki, kaunah payahlawas kat uman di as bik diski. Madiki mamalwa muihni balna kidika kapat kalalahwi, dawak dutni maidaukakalwa balna bik sihm kapat kalalahwi.