Read Mayangna Isaías 19 Bible Online

Isaías 19 - Mayangna bible

Isaías 19

¹Prapit yulni balna yulna Egipto nining yakat: Dawan yakat talnauh: Egipto yakat kaiwi mukus parasni murwa yakat kilwi. Witing muhni yakat Egipto dawan dauh balna kidika diyukwi, dawak Egipto muihni balna kidika muihsak dadauwi.

²“Yamtingkat Egipto muihni balna kidika kalsahwi kalalahwarang —kaput yulwi— dawak biri biri kalbabauwarang: kaltalyang yamni bik niningkauh yaklauwarang, tawan nunuhni kidika biri biri kalbabauwarang, king sauni balna kidika biri biri kalbabauwarang.

³Diyamtingkat sinsnina diswarang, diyamnin kukulwa kidika bik dutni kalna karang. Kaput dawakat dawan dauh balna, sukyah balna yakat yulwi dakakawarang, kaput bik dauna balna piritni yakat bik yulwi dakakawarang.

⁴Kaunah yang lawik Egipto yakat tunan muihni as āki kulnin parasni kat; king dutni as witing kāna karang.” Dawan parasni nuhni duwa kidika kaput yulwi.

⁵Nilo wasni kidika bik buhlakwarang, bahang buhni manah kalna karang,

⁶dawak was murwa balna dai kidika wayāni purwarang. Egipto wasni murwa kidika bik tani tani buhlakwarang dawak dapa balna kidika bitik kusulawarang;

⁷Nilo wasni kungkau junco manas kidika, dawak di dadahna balna kidika bitik laih kusulawarang.

⁸Nilo wasni kau dipapamwa muihni balna kidika bitik laih kakaidarang; kaput bik laih waspa dini laihnin dini waspa yakat ruhm'ahawa balna kidika laih kulninna bukwarang.

⁹Lino kau wark kalalahwa balna kidika bik di yamkih diawas karang; dawak wahni ridi yamyang balna[39] kaput bik asna yamyang balna kidika bitik laih pihitni ānina dis kakalwarang;

¹⁰asna yamyang balna kidika kulninna bahna karang, kaput bik laih tingnina kau di yamyang balna kidika bik amanglalawas karang.

¹¹¡Ais mutu manah, Zoán tunan muihni balna, Egipto yakat kau sins duyang balna muih yakat sumamalwa dai kidika, kaunah di rahm kidika laih witingna laih di amanglalawas mutu balna! ¿Amput witingna kulninna yakat kaiwih fero yakat kalyulna atnin: “Yangna laih sins duyang balna sulanina yangna, kaput bik muhnilau kau kingni balna dai kidika bik”?

¹²¿Fero, angkat bangyah sins duyang muihni balna dutaman kidika, bahang witingna yaklauwi masumamalwarang dawak ismang papakwarang[40] Dawan parasni nuhni duwa kidika Egipto niningkauh wark yamnin duwa kidika?

¹³Zoán tunan muihni balna kidika laih mutu balna, kaput bik Menfis tunan muihni balna kidika laih dadawak alas diyuyulna, sau sahyakna tanituna balna kidika yaklauwi Egipto kidika ta dutni yakat diduwi kiuna.

¹⁴Dawan yaklauwi di amanglawas atnin piritni kidika diana; bahang Egipto kidika ta dutni yakat duwi uiwi di yayamwa balna bitik yakat, sihm wasak dauna kat tiningyakwi dawak bik kalnanahwa kapat.

¹⁵Muih as bik tunan awaski, dawak mamahni sutni bik awaski, kuku panani dawak junco panani, bahang Egipto yulni di as bik yamnin sip-awas karang.

¹⁶Kidika mani Egipto muihni balna kidika yayal kapat kakalwarang; yamaduduwarang Dawan parasni nuhni duwa kidika witing tingni dulauwak witingna minitna yakat.

¹⁷Egipto muihni balna kidika muihsak dadauwarang Judá niningyakat; ayangni kidika manah dakawi yamaduduwarang Dawan warkni balna yamnin duwa kidika Egipto nining yakat.

¹⁸Kidika mani egipto yakat tawan nunuhni singka bangkarang, bahang kidika muihni balna laih hibru yulni yuyulwarang dawak papang ayangni kau yakwi yuyulwarang Dawan parasni nuhni duwa yakat barangni atnin. Kidika tawanni nuhni as laih ayangni pakwarang Ma[41] Tawanni Nuhni.

¹⁹Kidika mani Egipto yakat walapni busnin pāni as pakkarang Dawan ayangni kau, kaput bik laih sauni kiwi watwa yakat Dawan ayangni kau kipala uduhwi dulalauna karang.

²⁰Kidika laih sainni as karang Dawan parasni nuhni duwa kidika isningnakatwa atnin Egipto sauni yakat. Mampat mani Dawan yakat sararahwarang kat muih as yaklauwi ditaihwak, witing yaklauwi laihwi yaknin alni as sihwarang, nanitna dakna atnin kaput bik dilaihwi yakna atnin.

²¹Dawan yaklauwi Egipto balna kidika yakat amangnilalana karang, dawak biriwi bik amangnilalana karang witing yakat, Dawan yakat prinias yayamna karang kaput bik minitdis dini duaiwi kalalana karang, sakripais bik bubusna karang. Dawan yakat pramis yayamwarang dawak, praninamis kat yayamna karang.

²²Dawang yaklauwi Egipto yakat dalani kalawarang, kaunah usnit kat watwi laihwi yamni kalyamna karang. Dawak witingna kidika Dawan yakat nawatwi uiwarang, dawak witing yaklauwi miniknakun ditalwi yamni diyamwarang.

²³Kidika mani ta nuhni lāih as sakkarang ki Egipto kaupak Asiria kat. Asiria muihni balna kidika Egipto yakat uinin sip karang ki, dawak Egipto muihni balna kidika Asiria yakat biriwi kiunin sip karang ki, kaput laih Egipto muihni balna dawak asirio muihni balna karak kalpakwi Dawan ayangni nuhni yayamna karang.

²⁴Kidika mani Israel kidika Egipto dawak Asiria karak kapapat karang, kaput laih Papang blisinni as karang sau akat.

²⁵Dawan parasni nuhni duwa kidika yaklauwi blis yamwi aput yulwarang: “Yang blis yamtayang tawanki Egipto dawak Asiria karak yang tingki kau laihtik yamnayang kidika, kaput bik laih Israel laih yang diki palni ki.”