Read Mayangna Isaías 21 Bible Online

Isaías 21 - Mayangna bible

Isaías 21

¹Prapit yulni yulna kauhmak wanilang[42] yulni: Wingnuh as wadah niningkaupak kaiwa kapat, kauhmak wanilang pa dutni yamadangni kaupak kaiwi.

²Papang di nikingkana kidika laih yamadangni palni ki: malnikau iwa muihni kidika iwi, dawak daukalyang muihni kidika daukalwi. ¡Elam lawah! ¡Medo mahka kalbaunin! ¡Yang datas awaki baisa kalusnin lani kidika!

³Yang muihki yayukwi, buktik pihrtayang dalawakat, kulnik kaida kidika yulni yadawak dakasyang, muihsak yaklauwi yamwak sip talasyang.

⁴Kulnik kidika pāni duwaski, yayukwi yamaduting kat. Ma ulahwak sanni dawak yamni dakayang kidika, niking yakat yamadangni palni as ki.

⁵Tibil kidika uman lakna pakki, asna punni atakda kidika bik rina kasnin alasnina kidika uman tunan bahna. ¡Kalbauyang muihni taninatuna balna bitik kalmana kau lawanauh: tanitdaknin dini kidika yaringni yamtanauh!

⁶Kat Dawan yaklauwi yayulna bahang: “Yawa makau kilwi talwa muihni kidika as āsaktah, bahang muih balna aiwak talwarang kat isning pakna karang.

⁷Kār bu libitna kat aras mumurwak talwarang kat, kidika awaskat muih balna kidika biriku kidika awaskat kiamil kau kilwi aiwak talwarang kat, yamni talwarang.”

⁸Talwasak muihni[43] kidika sarahna: “Dawan paki yakat ban sakyang mapiris kaupak masan kat, pukta balna bitik yakat ban sakyang maintala.

⁹Talayang kar as aras bu sitna kat murwi aiwak.” Kaput laih muih as yulna: “¡Ukna, bukna Babilonia! Daninawan dauh balna wayanina dai kidika bitik sau yakat bukwi bahna dai.”

¹⁰Yang tawanki plawar minik kapat atakna dai kidika, yang mayultayang Dawan parasni nuhni duwa kidika kaupak dakanayang kidika, Israel Papangni.

¹¹Prapit yulni yulna Edom[44] nining yakat: Seir kaupak muih as parasni sarahwi yayulwi: “Makau kilwi maintalyang, ¿pukta ais awarni yah? Makau kilwi maintalyang, ¿pukta ais awarni yah?”

¹²Maintalyang muihni kidika nangnitlana: “Payahlawi kaiwi, kaunah mahka pukta bik kaiwi. Yulta dakakihman kat yulta dakah, kaunah watta nawatta yawanauh.”

¹³Kauhmak wanilang yakat prapit yulni balna yulna: Dedán muihni balna kidika ta pasyakat aiwi watwi payayahwi kauhmak wanilang kau damasni pakpak yakat,

¹⁴taninapas yakat alahwa was dikih diawa balna yakat was diatanauh. Tema sauni muihni balna, kalahwi kīra muihni tanipas yakat alahwa kasnin dini diatanauh.

¹⁵Ais yamta isparah niningkaupak iramanah, isparah baini buhna kidika kaupak, las ridi yamna kidika ruhmnin manah, dawak kalbaunin anna kidika kaupak.

¹⁶Dawan yaklauwi yayulna: “Kurih as laihwak, sihm wark muihni as witing minit dunin kulwi talwa kapat, Cedar witing nuhni kalkulna dai kidika bitik laih bayakwi kiuna karang.

¹⁷Cedar ahalni kalbauyang balna lasnina kidika bulah wawatna karang.” Israel Papangni Dawan kidika yaklauwi yulna.