Read Mayangna Isaías 22 Bible Online

Isaías 22 - Mayangna bible

Isaías 22

¹Sau langni kau di niningkana kidika tanka prapit yulna: ¿Ampat dawak muih bitik ūnina tuna yakat kikilwih?

²Tawan nuhni as muih balna kidika pini kiri yaklauwak parasni yulwa kidika laih banghna ki, kidika laih tawan nunuhni alasna duyang balna karak kaltalyang yamni ki, muih dadauna kidika laih isparah kau ihiwas ki, dawak bik wār kalbauwi dadauwas ki;

³tamatuna muihni balna kidika laih bitik kalahwi kikirana, las kidika talwi kikirakat laihwi silak ahana. Ahalma balna kulninna dadasni[45] kidika pa nai yakat kikirana, kaunah laihwi silak ahana.

⁴Kidika bahang yulnayang: Yang kaupak naikau lawanauh, tapalhni palni aidakih yawi; walakiānin bik kukulwinih yang tawanki daukalna kidika yulni.

⁵Kat Dawan parasni nuhni duwa kidika yaklauwi lā āna bahang yamadangni mani as kainin kidika, daukalna atnin, dawak sinsni diswak pini di amanglawas atnin, sau langni kau di niningkana kidika tanka. Daklana balna dai kidika mahka babahwi; sararahwa kidika asangpas yakat lāih ki.

⁶Elam muihni balna kidika sīninabang ridi kakalna, dawak uman kārnina balna dawak aninaras balna yakat kikilna; kaput bik laih Kir muihni balna bik nanitna daknin dini kidika yayakna.

⁷Sauma langni yaksinh dai kidika kār manah banghna, dawak aras kau kilwa muihni balna kidika uman tawan nuhni dūrni yakat uiwi kāwi kalbabauwi.

⁸Judá tanit daknin dai kidika ruhmwi dadana. Kidika mani, king uni, Asangpas Uni kau kalbaunin dini pupuwa pāni yakat talnamana,

⁹Devid tawanni nuhni yakat sahna sulihni balna manas talnamana, was pāni binibin kidika banghna dai;

¹⁰Jerusalén uni balna kidika yamni laihwi tatalna, dawak buas laih isihwi daklana balna kidika baisa yamni yayamna.

¹¹Daklana balna bu kidika walsah yakat was laihnin dini as yayamna, was laihwa pāni umani wasni kidika pāni wisam yakat lana atnin. Kaunah witingna yamni tatalwas dai, tatuna yamna kidika amput yamna dai kidika, yuldarangkat sara mani kau yamna dai kidika.

¹²Kidika mani Dawan parasni nuhni duwa kidika yaklauwi manna yakat manayulna dai yawa aidana atnamna, basmana kahrnin yulni kaput bik asmanana utuhni kidika āwanamna yulni dalani wauhtamana kidika sainni.

¹³Kaunah yayamwa kidika laih alasna dunin, turuh dawak sīp īnin, dimuihni kaswi wain dinin. Dawak yuyulwi: “Kasdanahng dawak didanahng, kat yahan daudarang bahang.”

¹⁴Dawan parasni nuhni duwa kidika yaklauwi yang akat kaiwi tapaki yakat lakpakwi yayulna: “Adika dutni yayamna kidika dating diswas karang; kidika tanitkauh manna dautanama.” Kidika laih Dawan parasni nuhni duwa kidika yulni balna.

¹⁵Dawan parasni nuhni duwa kidika yayulna: “Yawa talah Sebna, yakat king ūnikau tunan muihni yakat, dawak kalyulta:

¹⁶‘¿Man akat ais yamtamahn, wais yaklauwi parasni kidika manayah, akat sau-ū as yamna atnin, asang makau kipala yakat kuhrwi, yak-urupdinin pāni yakat?

¹⁷Dawan yaklauwi pa naikau maruhmwak yawama, muih al parasni nuhni duwa kat yamwa kapat. Parasni malaihna karang,

¹⁸di tuyulni kapat mayamwak piramma, dawak sau panuhni as kat masihna karang. Dawak yakat dauma, kidika yakat kārma balna bik uiwi wawatwarang, alasmana dai kidika, dawak kaput laih man damawan uni kidika asalni kalahna karang.

¹⁹Yang lawik sakman kidika kaupak madakyakki, dawak warkma kaupak bik namangyak ki.

²⁰‘Kidika mani yang warauki Hilcías walanibis Eliaquim kidika kalyulting kaiwarang;

²¹kalsuruhmtaman asnina yakau prakni āna awaki, dawak man rispik biltni sittaman kidika kau sitna awaki, dawak parasni bik kalana awaki. Kaput laih Jerusalén muihni balna dawakat, Judá tawanni balna yakat bik papangnina as kapat karang.

²²Witing salahni yakat āna awaki, Devid uni kiniting kidika; muih as bik putnin sip-awas karang witing apahwarang kidika, dawak bik apahnin sip-awas karang witing putwarang kat.

²³Witing kidika laih rispik yalahnin pāni as kapat karang papangni wanaihni balna yakat. Yang lawik yamting kat pāni yakat parasni atakna sakkarang, sihm silak as kapat.

²⁴Kidika yakat sip karang di minit nuhni balna kidika alahna atnin witing papangni wanaihni balna dinina, dawak kaput bik sulani balna bitik kaiwarang yakat, di bikisni kaupak wain dinin sunitak balna kat.

²⁵‘Kidika mani, silak as pāni yakat yamni pana sakdai kidika kaupak is yaklawarang; dutyakpamwak bukwarang, kidika yakat di mahni alahna bangdai kidika bukwi babahwarang.’ ” Dawan parasni nuhni duwa kidika yaklauwi kaput yulwi.