Read Mayangna Isaías 23 Bible Online

Isaías 23 - Mayangna bible

Isaías 23

¹Prapit yulni balna kidika Tiro niningyakat yulna: Tarsis kumani kuring balna kidika kakaidi, kuma kuring aiwawatwa pāni[46] kidika daukalna bahang. Chipre kaupak kaiwi watwa pāni kidika daukalpamna.

²Tiro muihni balna, dawak Sidón muihni di wauhwi bakanyang balna kidika ap dadana. Tanituna muihni balna dai kidika kuma munah dakyaklawa bangdai

³wasni panuhni sarandis kidika yakat. Sihor dawak Nilo kau di minik balna yayakwa kidika kaupak bakanwi minitkau lāwi duwadai, dawak sau ukkau uiwi wauhwi bakakanwa dai.

⁴Asalma nuhni dutah, Sidón, kuma pasyakat parasniman dai kidika, kat yulnam karang ki: “Walabis batahnin dalani kidika disyang, baisa walabis yaktas awakiki. Baisa walabis disyang muhna atnik, dawak walabis yayal bik disyang sumalna atnik.”

⁵Yulni adika Egipto muihni balna dakakawarang kat, kulninna kaidarang Tiro nining yakat di kalahna kidika.

⁶Yuyulwarang: “Tarsis yakat yawa aidanauh, kuma kung muihni balna.”

⁷¿Adika tawanni nuhni yah tanit manikau dai kidika, alasna duyang karak kaltalyang yamni dai kidika? ¿Adika daih, pa naikau balna yakat kiwi pāni duwa dai kidika?

⁸¿Adika lāni wais āna yah Tiro king tawanni nuhni niningyakat, dawak di wauhwi bakanyang balna dai kidika laih king walanibis balna dai, dawak sau akat tanit parasni duyang balna bik dai kidika?

⁹Dawan parasni nuhni duwa kidika yaklauwi āna lani kidika, witingna manah kapat kaldakakawa muihni balna yakat, dawak sau akat parasni nuhni duyang balna kidika bitik lakmukna atnin yulni.

¹⁰Tarsis tawanni, di dahtah sau[47] yakat, kat kuma kuring kaiwi kāwa pāni kidika uman dis bahang.

¹¹Dawan tingni kidika kuma minit yakat yuna, yamwakat muih balna kidika diyukna, dawak sihwakat Canaán parasni balna dai kidika daukalmukna.

¹²Dawak Sidón yakat kalyulna: “Alasmana balna kidika bitik datah, yal sirau laihwi dutni kalyayamna muhni. Chipre kat bayaktik yawakuhti yamma kaunah, kidika yakat bik wingmata puhtas awama.”

¹³Adika sauni talnauh, kuma kuring balna saunina. Caldeo muihni balna makau kilwi talnin pāni yayamna, dawak Sidón kingni uni kidika bitik daukakalna. Dutni yamna kidika witingna yakat bukwa sak ki, kaunah Asiria balna laih awaski.[48]

¹⁴Tarsis kumani kuring balna aidanauh, kat parasmana balna dai kidika daukalna bahang.

¹⁵Kidika mani yakat Tiro kidika kurih muihasluih bās minitkau salap dinitna kahna karang, King as sangnika naini duwa mani balna kaput. Kidika kurihni balna bayakwi kiuna dawakat, Tiro kidika yal, al suhl suhl unbauna laniwana kidika karak kallibitna karang:

¹⁶“Yal, al suhl, paswi yakisdinin dini kidika duta tawan nuhni pas yakat yawa pasta isdah, unbauna manas unbautah, muih kidika man yakat isningnakatwarang pa.”

¹⁷Kurih muihasluih bās minitkau salap kidika bayak dawakat, Dawan watwi Tiro karak wark kalahwarang ki. Witing kidika watwi muihni kidika muih yakat diana karang, dawak la bahwarang ki sau muihni balna bitik karak.

¹⁸Kaunah witing lalah balna duwarang kidika laih Dawan yakat kalana karang; dini balna kidika apakwas karang dawak bik uduhwi duwas karang, kaunah Dawan dini yamyang balna yakat diana karang, kasninna bakanna atnin dawak asninana tanit yayamni kidika bakanna atnin.