Read Mayangna Isaías 24 Bible Online

Isaías 24 - Mayangna bible

Isaías 24

¹Talnauh, Dawan yaklauwi sau adika daukalpamwarang ki, dahn yamwarang ki, dawak sinsni daukalpamwarang ki, dawak muih balna kidika laih ruhna karang.

²Dawak sumalyang balna bik sihm kapat karang tawan karak, daniwan dawak dini yamyang karak kapat karang, bakanwi duyang muihni dawak wauhwi bakanyang karak kapapat karang, muih kau di wayaki kalayang kidika wayaki duyang muihni karak kapapat karang, muih kau tras diayang dawak tras duyang karak bik kapapat karang.

³Sau adika bitik laih daukalna karang, dini yayamni balna dai kidika bitik mamalna. Kat Dawan laih yulna dai bahang aput kalahwarang kidika yulni.

⁴Sau adika buhlawi dawak kusulawi, sau nuhni adika bitik laih buhlawi, dawak kusulawi, makau kisang dawak sau[49] karak kulninna bukwi.

⁵Sau muihni balna yaklauwi sau adika daukakalwi, kat la yakat yamnin dai kidika yamwas dadana bahang, yul dakawas dadana, ban kaput atnin pranimis dai kidika daukakalna.

⁶Kidika bahang, la tuhna kidika yaklauwi sau adika daukalna, dawak sau muihni balna laih panis wawauhwi. Kaput bahang muih balna kidika bulah kalna ki, bulah watwi.

⁷Wain kidika dahn kalwi, dawak wain yamak bik yamahni laihna, alasna yalalahwa balna dai kidika kulninna bukna.

⁸Drom dawak paswi yakisdinin dini karak alasnina dai kidika dahn kalna, alasna duyang karak kaltalyang yamni di dakadisahni atwadai kidika ap dadana.

⁹Baisa wain didiwas karang unbauwinah; didiwa dini kidika tapahlni kalwarang diyang balna niningna yak.

¹⁰Tawan nuhni as barangni awas dai kidika daukalna ki, ū as bik pasyak kanin sip awaski.

¹¹Muih balna kidika tapas yak kakaidi wain dis kidika yulni; alasna dai kidika bitik laih bayak kiuna, saunina kaupak yakwi pa ūk yakat duwi uina.

¹²Tawan nuhni dai kidika daukalna, dūrni balna bitik bahna.

¹³Sau muihni balna kidika bitik kaput karang sau akat: sihm āni damni minik uhwa kapat isihwakat, kaput bik wain dakwi bayak dawak usnit yak wat walwi aiwa kapat.

¹⁴Dauwas yaklalana balna kidika alaswi sararahwarang, makawa kaupak parasni yuyulwarang Dawan nuhni kalkulna kidika talwi.

¹⁵Kaput bik makilwa kaupak kuma muihni balna kaupak witingna Dawan ayangni nuhni yayamwarang, Israel Papangni kidika.

¹⁶Sau sutni kaupak unbabauwak dakana mayang: “¡Ayangni nuhni yamnin barangni muihni yak!” Kaunah yang yulna yang: ¡Alakaih, kalmakunni, ampat kalmakunni manh! ¡Muih dudutni balna kidika malni kau ihiwi!

¹⁷Sau muihni balna kidika didauh balna kapat karang iyang muihni balna yaklau uhuiwa kidika kidik awaskat pasulihni yamadangni yakat kawarang kidik awaskat laihnin dini malni kau awa kidika yakat bubukwarang.

¹⁸Iyang balna tingnina kaupak yaklawarang kat, pasulihni yak kawarang, dawak pasulihni kaupak kalahwarang kat laihnin dini malni kau ana sakyakat bukwarang. Was nuhni ānin kidika ibis kaupak kaiwarang dawak sau adika isihna karang.

¹⁹Sau adika yamadangni palni yukna karang, dulauwi isihna karang, dawak bahwarang.

²⁰Kalnanahna karang wasak dauna kapat, kalyukna karang ū labanni as kapat. Dutni yamna kidika witing minit yak tikini taihwarang bahang bukwarang dawak wat yaklauwas karang.

²¹Kidika mani Dawan yaklauwi ibis parasni yakat wah kalana karang dawak sau kingni balna yakat bik;

²²uduhwi pa dibin aslah yakat puna karang, dawak yakat silak awi duwarang, ma mahni bayak dawak wah diawarang.

²³Dawan parasni nuhni duwa kidika king kapat warkni yamwarang Sayan asangni Jerusalén yakat, ma dawak waiku kidika puksani kalwarang kaput laih witing tawanni tanituna balna kidika Dawan alasnina tatalna karang.