Read Mayangna Isaías 25 Bible Online

Isaías 25 - Mayangna bible

Isaías 25

¹Dawan, man laih yang Papangki man; yang ayangma nuhni dawak yamni yamtayang, kat man warkma balna kidika yamni yamna man barangni dawak bik yamni, sara mani balna dai kaupak.

²Dawak tawan nunuhni balna dai kidika kipala manah yamna man, dawak tawan nunuhni pararasni balna dai kidika daukalna man; waihmala balna ūnina nunuhni dai kidika daukalna man, bahang sip watwi laihwi yayamwas karang.

³Kidika bahang tawan as parasni kidik yaklauwi ayangma nuhni yamwi, tawan as muihni dudutni balna kidika yamamaduduwi.

⁴Kat man laih muih minikunni yakmaldinin pāni as man, kaput bik dukih kalawak kulnin bukwa muihni yakat nanitdakyang man, wing parasni wauhwak yakmaldinin pāni as, madaihni kat yakmaldinin pāni as. Muih dudutni wingninata pupuhwa kidika laih wasma[50] wing bauwa kapat ki,

⁵kidika awaskat sau buhni minityak madaihwa kapat. Man waihmala balna sinsnina diswa kidika minitna bayaktaman sihm madaihni kat mukus yakat kalatang ma sanni duaiwa kapat. Man lawa paktaman muih ahal dudutni kidika ap danin.

⁶Sayan asangni yakat, Dawan parasni nuhni bitik duwa kidika nisan balna bitik ridi yamwarang kasnin dini auhni, dawak wain tanit parasni di kasnin dawak wain bik tanit yamni kidika.

⁷Adika asangni akat Dawan yaklauwi laihwi biswarang asna baini as tawan balna muhnina yak mukwa dai kidika, kaput bik asna as sau muihni balna yakat dimukwadai kidika.

⁸Dawan yaklauwi daunin kidika dispamna karang ban kaput atnin, muih bitik miniknawas uswi buhna karang dawakat sau bitik yakat kalawak disna karang witing tawanni yakat sarahni tatalwa kidika. Dawan yaklauwi yulwi.

⁹Kidika mani yulna karang: “Adika laih mayang Mapapangki, witing yak rahm kuldi kat mailaihwi yakna bahang. Alasna dudanang witing mailaihwi yakna.”

¹⁰Papang tingni kau Sayan asangni kidika nanit dakna karang, kaunah Moab yakat laih kalni kau atakna karang, sihm bubuh atatakwa kapat.

¹¹Moab tingni kidika yuna karang sihm was waihyang tingni dulauwi waihwa kapat, kaunah tingni dulauwa bitik yakat baisa kaldu'kakiwarang witing manah kapat kaldakawa lāni kidika.

¹²Dawan yaklauwi yamwakat daklana balna kidika bubukna karang; tuklakna karang, kaput laih sau yak bukna karang.