Read Mayangna Isaías 27 Bible Online

Isaías 27 - Mayangna bible

Isaías 27

¹Kidika mani Dawan wah diawarang, isniparah yamadangni, nuhni dawak parasni nuhni, waula, bil nuhni balna bangkidika yakat, dawak īna karang kuma paskau waula lawani duwa kidika bik.

²Kidika mani Dawan yulwarang: “Wain yamak yamni kidika yakat unbautanauh.

³Yang Dawan yang, bahang, yang lawik maintalayang dawak was utuhtayang. Pukta madah maintalayang, dutni as bik kallaihwak wauhnin awas yulni.

⁴Witing karak kulnik daukaltasyang. Wakalni dawak dibasta bik duwa katlaih, kalahwi war diyamna karang dawak bitik palni busmukna karang.

⁵Yang lawik nanitdaknik kidika dukih kalawakat, kulnin aslah lani kidika yang karak yamwang, agha, yamwang yang karak kulnin aslah lani kidika.”

⁶Tanit yakat, Jacob tawanni kidika rikni duwarang ki, Israel kidika udungwi kalahwarang dawak puluni bik duna karang, dawak sau bitik yakat witing minik balna kidika bahngna karang.

⁷Papang, Israel yakat wah kalawas ki, kaltaihyang muihni balna yakat wah diawa kapat, Israel kidika yakat bik iwaski, iyang muihni balna yakat īna kapat.

⁸Papang yaklauwi witing tawanni yakat wah kalana, witingna panina kaupak kangwi yakna kidika, kangwi yakna wing yamadangni kau puhwi, sihm ma kilwa kaupak wingni kapat.

⁹Kaunah Jacob dutni yamna kidika laih dawak diswarang, kidika kulnin kau dutni yamna balna bitik laih uswi yakna karang: dawak dauh balna panina maisihni dis kidika bitik laih wan manah yamna karang sihm kal kinipala tikwa kapat, bahang kaput laih pan sarani balna maisihni dis kulwa balna dai kidika dis kalna karang, kaput bik laih daniwan balna kau walapni buswa pāni balna dai kidika bik.

¹⁰Tawan nuhni parasni dai kidika bahwi uhna, sihm ū as dapapamna kapat, dawak kauhmak wanilang kau muih as bik dis kapat. Pa as turuh balna dibasta kakaswa pāni kapat, witingna di kaswi dawi kalangwi wingninata pupuhwa kapat.

¹¹Pan tingni balna kidika buhlawak bahwi; dawak yayal balna kidika anawi duwi uiwi kuh bibiwi. Tawan as kulnin sirihni awaski. Kaput bahang kalyamna muihni kidika yaklauwi minikun minikun kaltalwas karangki.

¹²Kidika mani Dawan wark yamna karang Éufrates kaupak egipto wasni kat, muih as plawar minik balna unitak sakwi yakwa kapat; kaunah manna laih Israel balna muihmana kat kat manalaihwi duna karang.

¹³Kidika mani trumpit nuhni kidika puhna karang, asiria kau pini didisna balna dai kidika, dawak sihm kaput bik Egipto yakat yakwi duwi kiuna balna dai kidika, aiwi Dawan ayangni nuhni yayamna karang, asang maisihni dis Jerusalén yakat.