Read Mayangna Isaías 28 Bible Online

Isaías 28 - Mayangna bible

Isaías 28

¹¡Alakaih Samaria, man manah kapat dawak Efraín kraunni man kidika, tawan as wasak manah kidika; dipulu kusulana balna kau pakwa kidika, sau as yamni di minik yakwa minit yakat yaklauwa kidika, tawan nuhni as wain yaklauwi kaltaihwi duwa kidika!

²Dawan yaklawi al parasni as apakna duwasakki, parasni nuhni duwi sihm ma dutni laihwak was lauwak di minik balna uhwa kapat, wing parasni bauwa kapat, was parasni murwa kapat, dawak was banghilwa kapat. Tingkau sau yakat tukwi lakna karang,

³dawak kalni kau atakwi labanwarang, witing manah kapat dawak Efraín tawanni wasak manah kraunni kidika.

⁴Kidika dipulu kusulana kat pakna kidika, dawak sau yamni minit yakat yaklauwa kidika laih sihm ani damni minik yaknin mani kaiwak tatuna minik balna kalahwa kapat karang: muih as talwarang kat, laihwi duwi kaswa kapat.

⁵Kidika mani, Dawan parasni nuhni duwa kidika sihm kraun yaksihni kapat karang, di yaksihni tanit yamni as karang witingna tawannina kat wawatwarang balna kidika,

⁶dawak wihta balna kidika la kat yamnin kidika witingna kulninna yakat duduwarang la yayamwa pāni yakat, dawak kalbauyang balna tawan tanit dadakwa balna yakat bik kulninna dadasni diana karang.

⁷Uk bik bangki wain yaklauwi diyamwak nanahwa balna kidika, dawak kalnina babauwi wasni daihni parasni didina kidika yulni: sumalyang nunuhni balna dawak prapit balna bik dinanahwi wasni daihni parasni didina kidika yulni, witingna miniknapa yakat di niningnakawak dinanahwi, dawak kaput bik muih lanina yayamwa kidika wasak manah ki.

⁸Tibil balna kidika bitik yakat takang yakwi kakahna maisihni manah, pa as bik laih maisihni dis laih awaski.

⁹Yang yulki bauwi yuyulwi: “¡Kaiwi mayang akat maisumalwarang yah, maniking kawarang yah, Papang yaklauwi manikingkana kidika! ¡Muihbinina dibinina mayang kapat

¹⁰waralaihtak wauhtaya lan malahwi ‘ba, be, bi, bo, bu’ yulda kapat!”[52]

¹¹Yamniki, mayulki dakakawas karang kat, yulni kidika dadasni karang, muih ūk balna tanina kapat, sihm Papang yulbauwarang kapat adika tawanni akat.

¹²Uman, witing tanit mani kau diyulna dai: “Ap kidika akat sakki, wingta puhnin bik akat sakki; kalsuhna muihni kidika wingnita puhwang.” Kaunah yulni dakakih laih diawas dai.

¹³Kaput bahang Dawan yaklauwi yuldibauna karang, muihbinina kapat, witingna waralaihtak wauhtaya yulwi tatalwa kapat. Kaput laih lapakwi uiwi bukdadauwarang, dihina karang, laihnin dini pasyakat bukna karang, dawak yakat dilaihna karang.

¹⁴Dakanauh, Dawan yulni adika, muih ahal tapadadas balna adika tawanni Jerusalén akat tunan awamana kidika.

¹⁵Manna yultamana: “Daunin karak pramis as yamnayangna, dawak daunin kingni lani yakat, bahang di balna adika dis dawarang mani kat, mailaihnin-awas yulni; alas yulnin yakat yakmalnidin pāni as walnayangna, kaput bik manakitdaknin as alasyulnin yakat.”

¹⁶Kidika bahang Dawan yulwi: “Sayan yakat kipala as ilsakki, walwi yakna kinipala minit nuhni as kat, kidika kinipala laih tatuna nuhni as karang, dawak rahni nuhni as karang. Wais kat kidika yakat rahm kulwa kidika, sip karang isninglak sak-atnin.

¹⁷Kidika yamki yakat barangni laihnin kidika laih duna awaki, la kat yamnin kidika dawak, papatni atnin kidika laih, barangni atnin kidika karak karang ki.” Yakmaldinin pāni as alas yulnin yakat walnamana dai kidika, makaupak di uhwa kidika yaklauwi daukalpamwarang, dawak maldanamna pāni kidika was yaklauwi daukalpamwarang.

¹⁸Daunin karak man pramis yamna man kidika laih dauh kalna karang, kaput bik daunin kingni lani karak pramis yamna man kidika bik parasni dis dauh kalna karang. Di balna bitik dis kalwarang mani yakat manna manataihwi labanna karang.

¹⁹Kaiwarang bitik yakat manalaihwi manamurna karang. Mapiris bitik yakat kaiwarang, dawak bik pukta madah bik kaina karang. Yulni kidika manah dakawak, kalyulwarang.

²⁰Sihm pa as pāni dibin kat malangwa kapat karang, dawak suruhmnin asnina parahnibin kat suruhmwa kapat.[53]

²¹Dawan kidika witing warkni yamna karang sihm Perazim asangni kau yamna dai kapat, dawak Gabaón kau witing palni kawi yamna dai kapat yamna karang witing yamwa balna kidika di as taldas dini kapat karang bik, witing kaput warkni balna yamna karang, minikun talnin warkni kidika.

²²Kaput bahang, ¡baisa tapa dadas yamnin awaski!, baisa sīn sitna kidika pamni kalnin-awas yulni; kat dakanayang, Papang parasni nuhni duwa kidika la as āna adika sauni bitik daukalpamna atnin.

²³Yamni dakanauh, yang yultayang kidika, yamni palni dakanauh yang yulki balna kidika:

²⁴Di dahyang muihni as di dahwarang kat, ma kaiwa bitik yakat witing sau kidika tukwi yudutni yamwas ki.

²⁵¿Rahm awasyah sauni kidika ridi yamna usnit kat mahka di minik balna eneldo kidik awaskat comino kidika wauhwi, usnit kat plawar minik kidika lain kau dahwi, usnit kat kung awaih balna yakat cebada dawak centeno kidika dahwi?

²⁶Papang yaklauwi niningkawi amput yamnin kidika.

²⁷Kat eneldo kidika laih unitak yakwas ki, kaput bik comino minit yakat sip di tikini kidika taihwi bayakwas ki; kaunah eneldo kidika laih pan kau isihwi, dawak comino bik kaput pan kau isihwi.

²⁸Plawar minik kidika laih unitak yakwi, agha, kaunah laihwatwas laih awaski; kalawak wīlni balna munah bayakwi, dawak minik balna kidika silp yakwi kaunah sakwaski.

²⁹Kaput bik laih Dawan parasni nuhni duwa kidika witing warkni balna yamwi. Witing warkni balna kidika yayamni palni duwi, kaput bik laih sinsni nuhni kau yamni yamna ki.