Read Mayangna Isaías 29 Bible Online

Isaías 29 - Mayangna bible

Isaías 29

¹¡Alakaih Ariel, Ariel,[54] tawan nuhni as yakat Devid kiwi kana dai kidika! Kurih as as manna alasna satni balna yamtanauh,

²dawak yang lawik Ariel kidika kalyamtingkat kulnin rikwarang, dawak sarahwi kaidinin kidika sakkarang. Tawan nuhni kidika laih yang diki karang, sihm Ariel kapat.[55]

³Kalbauyang muihni balna dutayang kidika sihtingkat ma-awaih dadakwarang, yaihmat awaih kidika bitik yakat daklana parasni as daklatik awaihlaki, dawak kalbaunin pāni balna kidika ridi yamki, namang yakat kalbauna atnin.

⁴Dinit yakat buknaman karang, dawak saukat bukma; man damat kidika laih sihm muih isningmuih dinit kapat karang; yulbautang damat sumni karang.

⁵Kaunah di sirihni Dawan parasni nuhni duwa kidika yaklauwi waihmala balna yakat wah diana karang alwana parasni yulwa kidika kau, sau isihna karang, dawak yulni bik parasni palni yulna karang, wing parasni bik wauhna karang, kaput bik kuh bik parasni dahlwi buswi daukalna karang. Man waihmala mahni palni kidika wanan manah kalna karang, kaput bik muih mahni palni mauhuiwa balna dai kidika dibasta kusuni kapat murwi dukiuna karang.

⁷Kidika muih mahni sip kuldi yakdas kidika, witingna Ariel niningyakat kalbabauwa kidika, dawak muih taihyang muihni balna kidika, witingna amana tatalwa kapat karang pukta yakat.

⁸Sihm muih yuhdauna kat amana kau di kaswasak kaldakawa kapat karang, kaunah sahmuhwak yuh kidika kapat karang; kaput bik laih was dikih kalawa muihni as amana kau diwa kapat kaldakawi kaunah diwas kapat karang, dinit suru bitik buhlana. Bahang kaput laih dikalahna karang tawan mahni balna bitik witingna Sayan nining kauh kalbabauwa balna kidika.

⁹¡Manna di amanglatas, di sip-awas mana kidika ban awanauh! ¡Mamaknapa dis kidika ban kaput awanauh, di as bik talas! ¡Ban nanahtanauh, wasak dina kapat, wasak ditasmana karang bik!

¹⁰Dawan yaklauwi manna mamatna yakat makauh parasni as sihna. Prapit balna kidika laih tawan minikpa, kaunah Dawan yaklauwi miniknapa yakat asna sitna.

¹¹Amana talnin satni balna bitik kidika manna namangna yakat wauhtaya kau ulwi tamp taihwi dawi tulna kapat ki. Muih as yaklauwi kalawarang yulwi talwi lan muihni yakat, “Adika yulta talah” kaltarang kat, witing yaklauwi nangnitlawarang: “Yang sip-awasyang, kat tamp taihna bahang.”

¹²Dawak yulwi talnin sip-awas yakat kalawi kalyulwarang: “Adika yulta talah” kaltarang kat, biriwi nangnitlawarang: “Yang yultik talnik lan awasyang.”

¹³Dawan yaklauwi yayulna: “Adika tawanni laih yulni kau warkki yamwi, dawak tinpas kau ayangki nuhni yamwi, kaunah witing isning laih yangkaupak naikau ki, dawak prias yamwa kidika bik muih yaklauwi kulnin lani walwi yakna, dawak kulnin yakat laihwi duwi lan kalna.

¹⁴Kidika bahang, adika tawanni balna yakat, witingna di tatalwas dini kidika kau niningnakating kat, tatalwarang. Sins duyang balna sinsnina kidika disnakarang.”

¹⁵¡Alakaih, kidika muihni balna Dawan kaupak yakmalda balna kidika, witingna warknina kidika malnikau yamwi, dawak puksani yakat dutni yayamwi aput yuyulwa kidika: “Muih as bik maitalwaski. Dawak muih as bik amanglawas ki”!

¹⁶¡Di kidika amput daukakalwi! Wasmak bibilni kidika sihm wark kalahwa muihni kapat katpah. Yamna dini balna kidika yaklauwi, yamyang muihni yakat kalyulwarang katpah: “Man yayamtasman”, dawak sau bibilni kau di yamna balna kidika pīsni dibin as bik yaklauwi yulwas karangki: “Man amanglatasman di yamtasakman kidika.”

¹⁷Ma balna mahni awaskat, asangpas balna kidika di dahni pāni kalna karang dawak di dahnin pāni dai kidika asangpas kapat kalna karang.

¹⁸Kidika mani, tappuk balna kidika muih as wauhtaya yulwi talwarang kat dakakawarang, dawak miniknapa dis balna kidika sip karang di talnin, puksani dis, witingna kaupak dilaihwi yakna karang puksani kidika.

¹⁹Muih kulnin minikunni balna kidika watwi alasna duduna karang Dawan yakat, dawak baisa miniknakunni balna kidika bik Israel Papangni yakat alasna duduna karang.

²⁰Tapadadas kidika bitik dahn kalna karang, kulninna dudutni dadasni balna kidika bitik disna karang, dawak dutni yamnin manah kukulwa balna kidika bik,

²¹muih ihina atwi ūk balna yakat yulnina yakyang balna kidika, dawak wihta yakat bik laihnin dini kal-ahawa kidika, dawak alas yulwi muih dutni yamwas dai kidika yakat la kat yayamwas kidika balna bitik.

²²Kidika bahang Israel Papangni Dawan kidika, witing yaklauwi Abraham laihwi yakna kidika yulwi: “Warmani kaupak tanit yakat, Jacob asalni dakawas karang, muhni bik pauni kalwas karang,

²³kat sulanina balna tatalwarang yang tawan yakat di yamnayang balna kidika, bahang amanglalawarang maisihni disyang kidika dawak yamakiduduwarang Israel Papangni yang akat.

²⁴Witingna sip amanglalawas balna dai kidika amanglalawarang, dawak sins nuhni duduna karang, dawak ap yuyulwa balna dai kidika sumalwa kidika dakawi lan kakalna karang.”