Read Mayangna Isaías 3 Bible Online

Isaías 3 - Mayangna bible

Isaías 3

¹¡Yamni talah! Dawan parasni nuhni duwa kidika yaklauwi dakyakna karang Judá dawak Jerusalén yakat bik, muih balna di duwi uiwa kidika, kasnin dini dawak was bik.

²Kalawak disna karang kulnin dadasni muihni kidika, war kalbauyang kidika, wihta kidika, prapit kidika, sukiah kidika dawak muih barak kidika bik,

³kalbauyang balna taninatuna kidika, muih nuhni kidika, la sumalyang kidika, sitan karak yulbauwa muihni,

⁴dawak walabis ahal kat tunan muihni balna kidika āna karang; kaput laih walabis kidika kabamint tunan balna karang.

⁵Tawan yakat laih kaput karang, biri biri, dawak kaltalyang yamni karang bik kalbabauna karang. Wawahma kidika muihbararak balna niningna yakat yaklalauna karang, muih dauh dikukulwa balna kidika, rispik muihni balna niningna yakat yaklalauna karang.

⁶Wirahni as yaklauwi, wirahni ūk papangni ūnikau likyakat kalyulwarang: “Man laih prakma āwanam dutaman bahang, matakituna awah; tunan dutah adika di daukalna balna kidika.”

⁷Dawak as kidika yaklauwi nangnitlawarang: “Yang sip-awasyang dutni balna kidika barangni ānik, yang ūki yakat kasnik dini bik disyang, dawak prak āwinik bik disyang. Tawan tunan yaahawinih.”

⁸Rahm palni laih Jerusalén kidika bahwi uhwi, dawak Judá kidika laih daukalna, bahang kidika yakat yuyulwi dawak bik yayamwi Dawan niningkauh, bahang kidika laih king yakat uhuswi.

⁹Witingna asalnina dis kidika yaklauwi yulnina yaklauwi; dutnina balna kidik mamalwaski; Sodoma yamna dai kapat muih bitik yakat niningna kakawi. ¡Alakaih witingna kidika, witingna dalani wauhnin kidika alas ridi yayamwi!

¹⁰Yamniki[3] lā kat muihni kidika, kat witing nining yakat yamni karang bahang dawak witing warkni balna minik kalahwa kidika.

¹¹¡Alakaih muih dutni kidika, witing nining yakat dutni karang! Papang yaklauwi witing warkni balna minit kalana karang.

¹²Muihbin as king kawi, yang tawanki yakat bahang kidika kingni laih muih taihyang; kabamint kidika laih yayal tingnina yakat ki. Tāmatuna muihni balna alas mayuyulwi, yang tawanki, ta dutni yakat maduwi uiwi.

¹³Dawan ridi kalna, la yamna atnin, ridi kalna witing tawanni[4] lani yamna atnin.

¹⁴Dawan yaklauwi la yakat diduwi kiuna karang, dawak muihbararak yakat dawak tawan tunan muihni balna yakat bik diyulwarang: “Manna lawa wainki yamak daukaltamana; muih miniknakunni yakat dinina malnamana, dawak maltamana kidika ūmana yakat apaktamana.

¹⁵¿Angdika rahmni kau duta tawanki taihtamanah dawak muih minikunni muhni ataktamanah?” Dawan parasni nuhni duwa kidika kaput yulwi.

¹⁶Dawan aput bik yulwi: “Sayan yayalni balna, witingna manah kapat kaldakawa kidika, dawak tunanina wauhlauwi lapapakwa kidika, dawak miniknapa dadasni tatalwa kidika, bikis lapapakwa kidika, dawak lanina kau disisitwa kilingwa kidika,

¹⁷wah diaki kidika laih, basnina bitik uhwarang mara dilaihwakat, dawak wahnina dis, laih diyakki.”

¹⁸Kidika mani Dawan yaklauwi yamwak, paknin dini yaksihni balna kidika didiswarang kalnina yakat ahawa kidika, tunanina paknin bik:

¹⁹tingnina yakat ānin dini, tunanina muknin dini,

²⁰tunan kau iriban sitwa kidika kalni kau sēn sitwa kidika, bamak sitnin, di walapni, dawak di kalyamtamana kidika,

²¹dawak ting-ānin, nangtak ānin,

²²prak yayamni, kalsuruhmnin dini, dawak lalah uni,

²³wayatal, asna yayamni, tun sitnin, dawak tun muknin,

²⁴di walapni pāni yakat, siknis karang; bamak sitnin kidika pāni yakat, wahlabu karang; basni yaksihn kusna kidika pāni yakat, basni bitik uhlana karang; asna yaksinh pāni yakat, asna babahni tubakni kidika karang; yaksinh kidika pāni yakat, ayan daihni markni dutanama.

²⁵Ahalma balna kidika wār yak dadauwarang, kalbauyang balna kidika kalbabauwa yakat dadauna karang.

²⁶Tawan nuhni kidika kaidarang dawak kulnin bukna karang, dawakat alas palni kalna karang ruhmwi dadawak.