Read Mayangna Isaías 30 Bible Online

Isaías 30 - Mayangna bible

Isaías 30

¹Dawan aput yulwi: “¡Alakaih, walaninabis muih dudutni balna kidika, witingna alas kalahwi di balna yamnin kukulwa kidika, yang akat yakulwas dawi, dawak wark balna yamnin ridi kalalahwa kidika kaunah yang lawik sinsni yakat di as bik kalatasyang, tanka laih dutnina minit yakat baisa dutni ududuhwi!

²Sirihni palni Egipto yakat uiwi, kaunah yang akat yayulwi dakakawas ki; ilp wawalwi fero tingni dinit yakat, kaput bik laih Egipto yaklauwi sanni diawa yakat kawi yakmamaldi.

³Kaunah fero yaklauwi nanitna dakwarang kidika laih dauh alas kalna karang, dawak Egipto kau sanni yakat yakmamaldana dai kidika laih witing sau yakat bubukna karang.

⁴Manna muih yakta sihnamana karang bik, Zoán dawak Hanes tawanni nunuhni kat,

⁵kidika tawanni nuhni ilp dis kidika yaklauwi dauh, alas manayulna karang, di as bik ilp manawas karang, nawatkauh laih kulnamana dai kidika bitik laih dauh kalna karang, dutni manah.”

⁶Prapit, witing yulni balna yulna dai kidika, Néguev kau didauh balna bangkidika yulni: Sau pīsni as yamadangni manah bahngna kidika, layan ihyang balna manah pa duduwa kidika, bil dawak waula lawani duyang balna manah kidika, witingna golnina balna kidika biriku dawak kiamil minit yakat ilwi duwi uiwi Egipto yakat, tawan as di sip-awas yakat,

⁷parasni bik dis, ilp as yamnin sip-awas kidika. Kidika bahang witing ayangni aput ānayang: “Di nuhni anyang as ihwi kaunah di as bik yamwas ki”.

⁸Waralaih aiwa, tat yakat ultah, yakat ulpaktah, tanit kau ma balna kaiwarang kidika dini, witnis as ban kaput pakatnin.

⁹Adika tawanni laih kulnin dutni ki dawak barangni bik awaski, Dawan sumalwa balna kidika dakakih bik awaski.

¹⁰Di talyang balna yakat diyuyulwi, “Manna baisa amana tatalwinih”, dawak prapit balna yakat diyuyulwi: “Di rahm kidika talwi maiyuyulwinih; yul yudutni kau maiyultanauh; dukih mayawa kidika dakyayakwinih.

¹¹Tapas kaupak lāwanauh, ta barangni kaupak data lāwanauh, matakit yakat Israel Papangni maisihni dis kidika ahawinih.”

¹²Kidika bahang, Israel Papangni maisihni dis kidika yulwi: “Manna adika isningpaknin dukih manawas ki, parasni yamnin dawak dutni kidika yakauh manna laihtamana;

¹³kidika bahang manna laih dutni kidika manalaihna karang. Sihm daklana kat sahna duwa kapat mana, maising-aidas kat bukwa kapat;

¹⁴sihm sau kau di yamna kat bahwa kapat awanama, bahwa kidika pīsni dibin as bik dis kidika, kuh tuturni kuhrwi yaknin, awaskat was butwi yaknin bik pa kuhrna paskaupak.”

¹⁵Dawan, Israel Papangni holi kidika aput yulwi: “Nawatta aiwanauh, ismangnalak wattanauh, kaput laih manalaihwi yakna karang. Isninglak atnin dawak rahm kulnin yakat sakkarang parasni kidika.” Kaunah manna dukih manawas dai,

¹⁶kidika bahang yulnamana: “Dikah, tanit yamni ki aras kau mailwi mairarang kat.” Yamni ki kaput iranamna ki. Dawak bik yuyulna: “Kar parasni kikira balna yakat mailwarang.” Kaput, bahang parasni kikira balna kidika manauhuiwarang.

¹⁷Muih tausin kikirarang, muih al aslah yaklauwi yamwakat, manna bitik iranama, muih singka yaklauwi manayamwakat, bahang kaput laih bulah kaltanama, sihm asang tuna kau pan aslah sak kapat kidika awaskat, asang ubulni kau sain as dulalauwa kapat.

¹⁸Kaunah Dawan laih tahawi, manna yakat mamaknakun manatalnin; witing laih dukih kalawi manna yakat dalani lani duwa kidika namangna kāna atnin, kat Dawan laih Papang as barangni bahang. ¡Yamni palni ki angdika muihni witing yakat di bitik tahawa kidika!

¹⁹Sayan tawanni, Jerusalén yakat yalahwa kidika: baisa aidas awama. Dawan man yakat mamakun matalwarang sarahta ilp yultang madakawi, madakawarang kat mahka nangmatlawarang.

²⁰Dawan dalani wauhnin kidika kasnam kapat mawarang, dawak makulnik bukwa wasni kidika mawarang bik, witing kidika, sumalmayang, bahang baisa yakmaldas karangki; man silp mamakpa kau talma.

²¹Wadahma yakauh bik, kidika awaskat tingmapal yakauh bik alahwa yawama kat, dangmat yakat mayulwarang aput: “Ta laih akūt ki, bahang akauh yawah.”

²²Di dutni kapat talma, lalah kau di yamna balna kidika, kaput bik dawan dauh wayani gol kau yamna kidika bik. Dukihmawas karang, bubuh kapat talma.

²³Dawan yaklauwi was mawarang, sau kau di minik balna dahtaman kidika, sau kidika yaklauwi plawar minik mahni mana karang. Kidika mani, tumaruh balna kasninna kidika manas palni karang.

²⁴Turuh pan muryang balna, biriku balna wark kalalahwa kidika, kasninna tanit yamni kidika kakasna karang.

²⁵Īnin mani kidika kaiwi kawarang, dawak kalbaunin uni pararasni balna kidika bubukwakat, was murna karang asang balna yakat, dawak ubulni binina yakat bik.

²⁶Dawan yaklauwi, witing tawanni di kalina kidika laihwi sitwi kalawarang. Kaput dawak waiku kidika ma kapat yaringni duwarang, dawak ma yaringni kidika yaringni tiaskaubu minit yakat yaringni karang.

²⁷Talnauh, Dawan witing muihni palni kaiwi naikau; kulnin daukalna kidika dahlwasakki wayauni karak, kungnimak balna kidika annin manah banghna, tuni kidika laih kuhpau kapat ki,

²⁸wingnita puhwa kidika laih was parasni dinimak yakat murwa kapat ki; witing kaiwi muih balna dininamak yakat pan ilwi sitna, dawak dutni yakat wirlamuknin, kaput bik laih muih balna tininapas yakat aras kau ahawa dini kidika āna karang, diyamwak pini disna atnin.

²⁹Manna namangna yakat nawatnikauh laih unbaunin kidika sakkarang, sihm pukta yakat alasna dunin yamni as kapat, ismangna kidika alasna karang, sihm bara puhwak dakawi lapakwa kapat Dawan asangni yakat kiwi, Israel yakmalda pāni.

³⁰Dawan witing king dinit kidika yulwak dakadi dawak parasni nuhni kidika bik manikingkawarang, annin yamadangni kau yamwakat, kuh dahlwa yakat, was lauwi alwana lapwa yakat bik.

³¹Dawan dinit kidika yulwak dakawi, dawak wahni kidika duwi Asiria kidika muihsak dauwarang,

³²Dawan yaklauwi wah kalawang kidika minityak, drom balna bik bauna karang. Dawan yaklauwi kalbaunin yamadangni as yamna karang.

³³Ma mahni dawi Asiria dini ridi yamna sak kidika, dawak kingni dini bik, dalani wauhnin pāni panuhni dawak tuhni, kuh mahni puna kat dahlwa sakki. Dawan wingnita puhwa kat dahlwarang, sihm sulhpa murwatus kapat.