Read Mayangna Isaías 31 Bible Online

Isaías 31 - Mayangna bible

Isaías 31

¹¡Alakaih, kidika muihni balna uiwi Egipto yakat ilp wawalwa kidika, dawak aras balna yakauh kulninna āwi duduwa kidika, kaput bik kar duwa balna yakauh kulninna āwi duduwa kidika, kaput bik aras mahni duduwa yakat bik kulninna āwi duduwa kidika, kaunah Israel Papangni holi kidika yakat miniknapa wiryaklawi tatalwas ki, Dawan yakat wawalwaski!

²Kaunah witing bik kulnin sirihni ki, amanglawi amput dutni kalyamna atnin kidika, dawak di as yulwa kidika kaupak watwi dangsawas ki. Witing muih dutni niningna yakat yamwarang, dawak muih dudutni balna yakat ilp diayawa balna yakat bik.

³Egipto muihni balna kidika ahal, dawan balna awaski; dawak aninaras balna kidika muihni duwi, spirit awaski. Dawan tingni dulauwi wah diawarang, nanitdakyang balna dawak nanit dadakwa muihni balna bik laih bubukna karang, witingna bitik laih dadauna karang papatni.

⁴Dawan yaklauwi yayulna: “Layan as sīp īna kat dawak bilnilalauwaski sīp maintalyang balna yaklauwi, kalpakwi parasni sararahwarang bik, kaput laih Dawan parasni nuhni duwa kidika kaiwarang, witing tawanni kidika nanitdakna atnin Sayan asangni yakat.

⁵Uhubin askat uni minit yakat yaklauwi awaihwi nanitdakwa kapat, Dawan bik yamna karang witing parasni nuhni duwa kidika, Jerusalén yakat; maintalwarang, dawak laihwi yakna karang, dawak nanitdakna karang.”

⁶Israel walanibis balna, manna nawatta aiwanauh, dutni palni kalyulnamana muihni yakat.

⁷Manna bitik, kidika mani ruhmta datanama kat, dawan dauh wayani gol dawak lalah kau yamna mana kidika manna tingmana kau,

⁸Asiria kidika isparah baini anan yakat bukna karang, kaunah sau muihni tingni munah laih awaskarang. Wār kidika yaklauwi yamwak muihni balna kidika kikirana karang, dawak kalbauyang wawahma balna kidika laih laihwi warau lani yakat ahana karang;

⁹yamaduwa yulni laih, kingnina kidika kalahwi kirarang, dawak yaihnitkau kalbauyang muihni nunuhni balna bangkidika bik witingna planinakin bik dadana karang. Dawan yaklauwi kaput karangti, Jerusalén kidika kuh dahlwa as duwi witing waihnila balna kidika wah dianin.[56]