Read Mayangna Isaías 32 Bible Online

Isaías 32 - Mayangna bible

Isaías 32

¹King as sakkarang ki, witing lani barangni duwarang ki, dawak kabamint balna bik la barangni kat yayamna karang ki.

²Kidika kingni balna bitik kidika, yakmaldinin pāni as karangki wing parasni kaiwakat, dawak bik ma dutni wing kalahwarang mani yakat nanitdaknin as karangki, sau buhni kalwak was nanitdaksakwi sau yakat wauhwa kapat, kaput bik kauhmak wanilang pasyakat kipala nuhni as kat dinit yakat sanni duwa kapat.

³Miniknapa kidika yamni sahmumuhwarang, dawak kidika yakat manah dakakih bangkarang;

⁴di kidika sirihni pini yayamwas karang, kaunah yamni tanka walwi yayamna karang, dawak kaput bik di kidika bitik lāih yuyulna karang.

⁵Muih balna yaklauwi dutni yamyang balna yakat muihni nuhni ki kalyuyulwas karang, kaput bik laih dutni baskiwah kidika yakat bik muih nuhni ki kalyuyulwas karang.

⁶Kat muih dutni kidika laih, muih dutni kapat yulbauna, dawak kulnin yakat di dutni yamnin manah kulwi; muih kau dutni yamnin kidika walwi dawak Dawan nining yakat alasmanah yulwi; muih yuh dauwa kidika dapamwak tingni yakat di as bik dis kiwi, kaput bik laih dikih kalawa muihni yakat kalawaski dina atnin.

⁷Muih dutni baskiwah kidika laih alasyulnin kidika duwi dawak di dutni kidika yamnin kulwi; alas yulwi muih miniknakunni balna yakat dutni diyamwi, kaput bik dukih kalawa kidika muihni yakat la barangni kat yamwas ki.

⁸Dawakat muih yamni kidika laih witing warkni balna yamni yamnin kulwi, kaput bahang kidika warkni yakat yamnin kulwi.

⁹Manna, yayal, dias bik kulta kalbautasmana kidika, dakanauh manna yakat manayulki kidika. Yayal di asbik kulta talasmana kidika, yang yulki balna adika dakanauh.

¹⁰Warmani laih kulnamna yakat di as bik diski, kaunah waramunah kurih as laihwakat manaisihna karang, kat wain minik balna kidika baisa babahwas karangki dahn kalna karang ki.

¹¹Manna kulnamna yakat di as bik kulta kalbautas yalahtamana kidika manayukwang; manna kulnamna yakat di as bik dis kidika, kalisihtanauh, asmanana kidika yakta, asna umani kidika āwanauh kulnamna yakat dalani wauhtamana kidika yulni.

¹²Dalani wauhtamana kidika laih yaktanauh, asangpas kau arakih kidika, dawak wain yamak yamni minik yakwa kidika bik.

¹³Wakal dawak dibasta ūk balna manah ukusna karang paki yakat, ū balna bitik alasna kidika, tawan nunuhni kaltalyang yamni alasna duyang balna.

¹⁴King ūni kidika ruhmwi dana karang; tawan nuhni muih manah kidika bitik di dis kalna karang; dawak kalbauyang uni pararasni balna kidika ruhmwi dadana karang ban kaput atnin; kidika yakat asangpas biriniku balna kidika isningnalak bangkarang, dawak turuh balna kidika sipkarang di kasna atnin.

¹⁵Kaunah di balna yamna Papang parasni nuhni duwa kidika watwi mayang mamikit yakat kaina karang, kaput bik laih kauhmak wanilang kidika di dahnin sauni yamni kalna karang, dawak di dahnin sauni kidika tanit yamni kalna karang.

¹⁶Barangni dawak la kat kidika sauni bitik yakat kawi duna karang.

¹⁷La kat kidika yaklauwi kalawak barakna karang kulnin aslah lani, isninglak lani, dawak kidika yakat rahm kulnin kidika ban kaput atnin.

¹⁸Yang tawanki kidika yalahna karang pa as kalbilnin lani dis kidika yakat, payahnin pāni bik muih dutni as bik kanin sip-awas kidika yakat, dawak uni balna bik kalbilnin lani dis uni balna yakat,

¹⁹asangpas kau pan balna kidika pihna karang[57] bik, dawak tawan nuhni kidika sau yakat bukna karang bik.

²⁰Manna ismangnalak yalahtanama, di dahnamana yakat was utuhnin bik was manas dutanama, kaput bik biriku, dawak wark tuniruh kasnin kidika bik yakat sakkarang.