Read Mayangna Isaías 33 Bible Online

Isaías 33 - Mayangna bible

Isaías 33

¹¡Alakaih man, daukalyang muihni baisa madaukalpamwas kidika; yakmaldi dutni yamyang, baisa yakmaldi dutni mayamwas kidika! Di bitik daukalmukma usnitkat, man bik madaukalna karang.

²Dawan yangna akat miknakun yanatalah, man yakat tamatahada kidika. Mapiris bitik kidika mayang mailpki awah, mailaihwi yakyang atnin ma dutni balna yakat.

³Man lawa dutni yamnin yultang kat tawan muihni balna kidika kikiri, dawak man awa yamtang kat muih balna kidika ruhwi;

⁴man waihmala balna kidika sihm sisin mahni mukus kapat kidika aiwi minitna yakat, dawak ritsnina balna kidika dakyakwi.

⁵Dawan laih king, bahang ibis yakat sakki; witing yaklauwi Sayan kidika banghna barangni lani dawak la kat yamnin kidika,

⁶dawak ban kaput laih di maintalwarang. Sins lani dawak, di amanglanin lani kidika laih sihm kipala dahlwa kapat as ki, mailaihwi yakwi; dawak Dawan yakat yamanidunin kidika laih di minit nuhni as ki.

⁷¡Dakah, muih kulninna dadasni balna kidika amput sararahwi tapas balna yakat dawak ampat kakaidi kulnin aslah dunin yulni sihna kidika yulbauna atnin!

⁸Ta balna kidika laih di dis ahni manah ki, muih as bik wawatwas ki. Pramis balna[58] kidika bitik laih bahna ki; muih as bik risnipik diski.

⁹Sau kidika kulnin bukna ki, Líbano kidika asalni yulni kusulawi, Sarón sauni langni kidika kauhmak wanilang manah kalna, Basán dawak Carmelo asangni kidika di dis turna ki.

¹⁰Dawan yulwi: “Waradika yang yamki; waradika yang lāih yakna awaki nuhni yang kidika dawak bik king yang kidika.

¹¹Manna warkmana balna kidika dibasta kusulana dawak bubuh kapat ki; wingkita puhtayang[59] kidika dibusyamna karang sihm kuh dahlwa kapat.

¹²Tawan balna kidika wan manah kalna karang; sihm wakal dakna kapat kuh yakat busna karang.

¹³Pa naikau balna kidika yang yamnayang kidik dakakawang, dawak yaihnitkau bang kidika amanglalawang yang paraski kidika.”

¹⁴Sayan yakat dutni yamyang balna kidika diyukwi, dawak dutni yamyang balna kidika muihsak dauwi yuyulwi: “¿Mayang paskaupak wais sipyah kuh dahlwa ban kaput atnin pasyakat yalahna atnin?”

¹⁵Di barangni dawak rahm yulwa muihni kidika, dawak kaput bik parasni kau yamwi di manas duyang kalwas kidika, prisant dini kau kalbakakanwas kidika, kaput bik iyang muihni balna yulnina dakawas kidika dawak minikpa sipikwa kidika di dutni kidika talnin-awas yulni,

¹⁶kidika muihni laih sangka karang di as bik kalyamwas karang, dawak witing yakmalda pāni kidika laih kipala uni as karang, kaput bik kasnin dini dawak wasni bik dahnkalwas ban karang.

¹⁷Watta king kidika talma witing yaringni bitik pasyakat; dawak sau pīsni balna daklana balna kidika naikau kiuna karang.

¹⁸Man yamadutaman pasyakat ban yalahtaman dai yakat kulyakta yulma: “¿Angkat sakyah tunan minit dakwa balna kidika kulwi talwa dai kidika? ¿Angkat sakyah paun āwi talwa dai kidika? ¿Angkat sakyah makau kilwi talnin pāni balna kulwi talwa dai kidika?”

¹⁹Tawan as tapdadas pasyakat baisa yalahtas awama, dawak tuni bik amanglanin dadasni kidika, yulbauwa balna kidika bik amangladas, muih as bik amanglawas kidika.

²⁰Sayan yakat talah, maalaskina tawan nuhni kidika; mamakpa kidika Jerusalén yakat talah, tawan nuhni as di dutni as bik dis kidika yamni manah kidika, sihm ū labanni as parasni kapat karang, pan sau yakat ukna balna kidika dutwi kalahwas karang, dawak wahni balna bik dakwas karang.

²¹Kidika yakat Papang alasnina nuhni kidika lāih yakwi mayang yakat. Pa as was panuhni murwa bangbangki, kaunah waihla balna kidika kumanina kuring waihnin duwa pararasni balna kau uiwi kakawas karangki.

²²Kidika kumani kuring asna sitwa panan balna wahni kidika sip laihwatwas karangki, dakwarang ki; bahang asnina balna kidika sip-awas karangki rinin. Waihla balna dinina yayamni mahni dakyakdarang ki, muih minikpa dis kidika bik laih duna karang ki, dawak sakahwa kakalna balna kidika bik witingna kawi laihwi duduwarang ki. Kat Dawan kidika mayang mawihkita, malaki yamyang, makingki, bahang witing yaklauwi mailaihwi yakna karang.

²⁴Muih balna kidika as bik yuyulwas karangki: “Siknis yang.” Papang yaklauwi Sayan muihni balna dutnina dawak disna karang.