Read Mayangna Isaías 35 Bible Online

Isaías 35 - Mayangna bible

Isaías 35

¹Alasna kulwang kauhmak wanilang, sau buhni ki alasna kalahwang, puluwang,

²dipulu balna yayamni yakwang, Papang yaklau yaksihni yamna karang sihm Líbano kapat, dawak sauni bik yamni Carmelo dawak Sarón sauni langni kapat. Dawan alasnina yamni kidika muih bitik tatalna karang, dawak Mapapangki king kidika.

³Parasni dis balna kidika parasni yamtanauh, disuhna balna kidika kulninna parasni duaitanauh,

⁴yamaduduwa balna yakat diyultanauh: “¡Kulnamna dulautanauh, yamaduduwinih! ¡Akat Papangma sakki malaihwi yaknin, dawak waihmala balna kidika wah diana karang, kat witingna kaput duninna bahang!”

⁵Kaput laih miniknapa di tatalwas balna kidika tatalna karang; tapanina di dakakawas balna kidika dakakana karang;

⁶di dihiwak sakahwa kalna balna kidika sana kapat susutna karang dawak yulbabauwas balna kidika sararahwarang. Walang kauhnimak sau buhni yakat was parasni murna karang.

⁷Kauhmak wanilang yakat was mahna karang, sau buhni kidika was burhwa manah kalna karang. Kidika yakat warmani chacal balna pa duduwa kidika yakat dapa ukusna karang.

⁸Kidika yakat ta as tuskarang bahang kidika laih “ta as maisihnidis”. Maisihni kaupak suhwi kalahwas balna kidika laih sip-awas karang kidika yakut kiuna atnin; tapanina dadasni balna kidika sip-awas karang yakut uina atnin.

⁹Kidika yakat layan diskarang, didauh anyang balna kidika yaihnit yakat uiwas karang. Kidika tāni munah laihwi yakna balna kidika nawatwi aiwarang,

¹⁰Dawan yaklauwi laihwi yakna balna kidika; Sayan yakat uiwi kakana karang unbauwi alasna karak, dawak ban kaput witingna alasna yalalahwarang. Kidika yakat isninglak kidika yakwarang, kaidinin dawak dalani balna kidika bitik disna karang.