Read Mayangna Isaías 40 Bible Online

Isaías 40 - Mayangna bible

Isaías 40

¹Manna Papangmana kidika yulwi: “Walaniātanauh, walaniātanauh tawanki kidika;

²dalani kaltalinah Jerusalén yakat yulkalbautanauh, dawak kalyultanauh warauni lani kidika dahn kalna, dutni yamna balna dai kidika bitik minitlauna, yang tingni kaupak wah watbu duna dutni yamna balna dai kidika yulni.”

³Muih dinit as sarahwi: “Kauhmak wanilang yakat, Papang tāni kidika barangni yamtanauh, Papang tāni barangni as yamtanauh sau as dutni kidika yakat.

⁴Was wakarhni balna bitik langni yamtanauh, dawak asang balna kidika bitik, dawak pa wakarhni balna asangpas balna kidika bik langni salaini yamtanauh.

⁵Kaput laih Dawan alasnina nuhni kidika lāih yakna karang, dawak muih balna bitik tatalna karang. Dawan witing kaput yulna.”

⁶Muih dinit as aput yulwi: “Sarahta”, dawak yang yultik dakayang: “¿Ais yultik sarahkiyah?” “Muih bitik kidika dibasta kapat ki, ¡dipulu as asangpas kau kapat ki!

⁷Dibasta kidika kusulawi, dawak dipulu kidika bik, Dawan wingnita kidika witingna minitna munah bayakwakat. Di rahm kidika laih muih balna kidika dibasta kapat ki.

⁸Dibasta kidika kusulawi dawak dipulu kidika bik, kaunah Papang yulni kidika laih ban kaput ki.”

⁹Sayan ilwah asang maluih as kat, parasni sarahta yulta, yul yamni as yulna atnin. Yamadutas yulta, Jerusalén, dawak Judá tawanni nunuhni balna yakat yulta: “¡Akat manna Papangmana sakki!”

¹⁰Dawan kaiwi parasni nuhni kau, witing taihwi tingni parasni kau. Tawanni kidika duaiwi laihwi yakna usnit kat.

¹¹Sīp maintalyang kapat kaiwi; sīp binina kidika tingnikau laihwi dulauwi pasni yakat āwi dukiwi, dawak binina yayakna balna kidika laih yamni maintalwi.

¹²¿Wais kidika kuma nuhni sakkidika tingni kau kulwi talna yah, kidika awaskat tingni bikis kau ibis panuhni kidika kulwi talnayah? ¿Wais kulwi talnayah sau yahamni balna bitik, kidika awaskat paun āwi talnayah asang balna kidika?

¹³¿Wais yaklauwi Dawan yakat barangni kalyaknayah, kidika awaskat sumalnayah?

¹⁴¿Wais yaklauwi la sumalnayah, dawak di amanglanayah? ¿Wais yaklauwi sumalna kat la barangni kat yamwih? ¿Sins lani kidika wais yaklauwi sumalnayah? ¿Sins lani tuhni kidika wais yaklauwi sumalnayah?

¹⁵Witing niningyakat muih balna bitik kidika was tahna as kapat ki, dawak bik sau yahamni minikbin as paun yakat āna sakkapat ki; dawak kuma paskau muih balna kidika laih kauhmak minik as kapat ki.

¹⁶Líbano pāni bitik yakat, didauh balna mahni awaski, sakripais busna atnin, dawak kuh binin bik mahni awaski.

¹⁷Sau muihni balna bitik kidika witing muhni tāni yakat di as diski; witing nining yakat kidika balna laih minitna as bik diski.

¹⁸¿Manna wais karak sipyah Papang kidika libitna atnamna? ¿Wayani kidika ampat yamtanamayah?

¹⁹Kipala kau, kidika awaskat pan kau muih wayani yamyang kidika yamwak, gol kau di yamyang kidika yaklauwi minit yakat gol manah kahwi lāwi, dawak bik lalah kau sīnni bik yamwi.

²⁰Pan kau muih wayani yamwa kidika, witing pan yamni kat walwi dutlanin-awas yulni, kaput laih tingkau di yamwi lan kidika yakat yulwak āwi kalawi buknin-awas yulni.

²¹¿Manna amanglatasmana dai katpah? ¿Yuyulwak dakasmanadaih? ¿Tatuna kaupak manna manayuyulwakat dakasmanadaih? ¿Sau yamna kaupak manna amanglatasmanah?

²²Papang laih witing yalahwa pāni kidika duwi sau minitkau ibis kudungni kidika minit yakat, dawak witing muih balna kidika talwi dimuih sisin kapat. Dawak ibis kidika rina ki asna kapat, dawak rina ki sihm ū labanni minit yakat asna riwa kapat.

²³Muih ahal nunuhni kidika witing yaklauwi dauh yamwi, dawakat sau tunan muihni balna kidika yamwak pini didiswi.

²⁴Pan binina batatani wisam dahna kat waralaihtak riknibin laihna kapat ki sau yakat. Papang yaklauwi witingna minitna yakat wingnita puhwarang kat kusulawarang ki, dawak wing bauwarang kat di unitak kapat dulauwi dukiwarang.

²⁵Papang maisihni dis kidika yulwi dakawi: “¿Manna wais karak yalibittanamayah? ¿Wais kidika sipyah yang apat atnin?”

²⁶Mamaknapa ibis yakat dulauta talnauh: ¿Wais yamnayah kidika dini balna bitik? Sahwi yakwa kidika as as, dawak bitik yakat ayangnina kat kat pakwi yulwa kidika. Witing parasni kidika nuhni palni ki kidika bahang as bik laih dis-awaski dini balna kidika.

²⁷Israel, Jacob tawanni, ¿ais dutni daka yultamanh? ¿Ais yamta yultamanh: “Dawan amanglawaski mayang wauhda adika; Papang yang akat yakulwas ki”?

²⁸¿Amanglatasman katpah? ¿Dakasmahn? Dawan, Papang ban kaput kidika, sau yamna kidika, witing laih kalsuhwaski; dawak sinsni kidika sarandis ki.

²⁹Kalsuhlakna yakat witing yaklauwi parasni kalawi, dawak parasni dis yakat witing yakluwi parasni kalawi.

³⁰Wawahma bik sipki di suhnin, muih tanit pararasni bik bubukna ki,

³¹kaunah Dawan yakat rahm kukulwa balna kidika laih, parasnina kidika watwi wisamni duduwa kidika ban karang, dawak bahlwi yaklaunin sipkarang yakalnuh kapat, kirinin sipki dawak lapaknin sipki kalsuhwas.