Read Mayangna Isaías 43 Bible Online

Isaías 43 - Mayangna bible

Isaías 43

¹Kaunah waralaih Israel, Jacob tawanni kidika, Dawan yaklauwi mayamna kidika mayulwi: “Yamaduwinih, yang lawik malaihtik yaknayang; man ayangma kau yaktik mayulnayang, man laih yang diki man.

²Waspa munah bayaknam karang kat, yang sak-awaki mankarak, was daklawanam karang kat, was dautas awama; kuh pas munah bayaknam karang kat, mabuswas karang; dahlwi kilwa balna kidika man yakat madahlwas karang.

³Yang laih man Damawan yang, dawak malaihwi yakyang, Israel Papangni holi kidika. Yang malaihtik madunayang; malaihtik yaknin yulni minit launayang Egipto yakat, Etiopía yakat, dawak Sabá yakat bik,

⁴kat yamni matalayang bahang, man laih mamat nuhni ki kidika bahang dalani matalayang. Madutik, dawakat sangmaka laihtik yaknik muih balna pasyakat.

⁵Yamaduwinih, mankarakyang. Makilwa kaupak makawa kat wanaihma balna kidika diating kat aiwi kalududuhwarang.

⁶Tingpal nining yakat kalyulki: ‘Nawatta sihtang aiwang’, wadah nining yakat bik yulki: ‘Witingna kidika man laihwatwi duwinih. Pa naikaupak duaitah walakibis ahal dawak yayal balna kidika bik, sau sutni nakaskaupak,

⁷yang ayangki duduwa balna bitik kidika, yang lawik yamnayang balna kidika, yang yamnayang ayangki nuhni yamnin yulni.’

⁸“Kalatanangkat yang tawanki kidika kaiwang, witing minikpa duwi kaunah di talwaski, tapanisuma bik yamni duwi kaunah di dakawas ki.

⁹Muih balna bitik kaluduhtanauh. ¿Kidika balna pasyakat wais yaklauwi yulna dai adika dini kalahwarang dai kidika, kidika awaskat di balna kalahwi bayakna kidika kaiwi kalahwas kau yulna daih? Tatalna muihni balna kidika duwi aiwang kaput laih rahm karang, dakana atnin dawak bik yuyulwang di rahm kaput kalahna dai kidika.”

¹⁰Dawan yaklauwi kaput karangti: “Manna laih talnama di balna yamtingkat, kaput bik diki yamyangmana, yang lawik manawaltik manayaknayang amangkilanamna dawak yang akat yakulnamna, dawak amanglanamna yang waisyang kidika. Yang takitkauh dawan ūk disdai, kaput bik yang uskitkauh ūk diskarang ki.

¹¹Yang manahki Dawan yang kidika; yangkaupak ūk diski laihwi yakyang.”

¹²Dawan aput karangti: “Yang lawik yultik isningpaknayang karang: yang lawik diyulnayang; taldas daniwan as yaklauwi yamwas ki, manna kuduh talyangmana.

¹³Papang yang kidika ban kaput yang. Yang paraski kaupak sip muih as bik yaklawas ki. Yang yamtayang kidika sip muih as bik dauh yamwas ki.”

¹⁴Dawan, Israel Papangni holi kidika, dawak witing yaklauwi laihwi yakna kidika yulwi: “Manna manalaihtik yaknik yulni Babilonia yakat muih sihki, dawak witingna dūr balna bitik apapahna karang, Caldeo muihni balna alasnina kidika dalani wauhnin yakat wiryaklana karang.[68]

¹⁵Yang kuduh Dawan, Israel yamnayang kidika, Papang holi kidika, dawak manna kingmana.”

¹⁶Dawan yaklauwi kuma pasmunah ta as yamna dai, ta as yakna dai was parasni murwa munah;

¹⁷yamwakat kalbauyang balna mahni parasnina nuhni kalahna dai, kalbaunin kārni kau, aras kau kilwi uina dai daukalmukna atnin yulni. Bauwi lakmukna dai dawak witingna sip yaklalauwas dadana; dawak sihm awas piwa kapat dadana.

¹⁸Waralaih Dawan witing tawanni yakat yulwi: “Damai di balna kalahna kidika kulnam yakat duwinih, baisa kulwinih di bayakwi kiuna balna kidika.

¹⁹Yang di wisam as yamki, talma warminitni kalahwarang ki. Kauhmak wanilang yakat ta as yamkiki kaput bik sau di dahdak kalahwas yakat kalating was murwarang ki.

²⁰Asangpas kau didauh balna kidika ayangki nuhni yayamwarang, sul wail balna dawak uhu nunuhni balna bik, kat kauhmak wanilang kaupak kalatingkat was burhwi kalahwa bahang, kaput bik sau di dahdak kalahwas pāni yakat bik, yang tawanki yaktik dunayang yakat was bayahna atnin yulni,

²¹tawan yamnayang kidika laih yang ayangki nuhni yamnin yulni.

²²“Kaunah man Israel, Jacob tawanni, ayangki yakta yultas danaman, yang adika masuhna kaldakaman.

²³Sīp kau yang akat sakripais karauni kauna yamtasman dai, kaput bik sakripais busta ayangki nuhni yamtasman dai. Minitdis dini kidika man yakat wat wat mayultik maustasyang dai, kaput bik walapni busnin kidika bik mayultasyang dai.

²⁴Tisnak walalapni kidika bakannamna awas dai, yang akat minitdis dini yanamna. Kaput bik didauh balna salanina kau sakripais busta yanam-awas dai. Nawatnikauh laih, dutni yamnaman balna kidika yasuhna dai, dawak bik kulnik daukalna dai.

²⁵“Kaunah yang adika man Papangma yang bahang dutma ustik yaktayang, dawakat baisa bik isingkatwas karang dutma kidika.

²⁶Yang nikingkauh di as dutaman kat, la mahawang. Rahmma dunam yulni balna kidika duaitah, rahm di as bik dutni dis awama pa.

²⁷Man papangma dutni yamna, masumamalwa muihni balna kidika nikingkauh yaklalauna,

²⁸kabamint muihni balna yaklauwi, yang ūki kidika yakat dutni yayamna;[69] kidika bahang Jacob tawanni Israel kidika danayang daukalpamna atnin dawak bik dutni kalyulna atnin yulni.