Read Mayangna Isaías 44 Bible Online

Isaías 44 - Mayangna bible

Isaías 44

¹“Jacob tawanni Israel, waralaih, yang akat yadakah, diki yamyang mayaktik dunayang kidika.

²Yang kuduh Dawan, yang mayamnayang, baisa batanh datasman kau mayamnayang dawak ilp matayang. Jesurún, yamaduwinih, Jacob tawanni, diki yamyang yaktik dunayang kidika,

³kat yang kalatingkat kauhmak wanilang yakat was murwarang, sau buhni yakat was tuhni kalnakarang. Yang lawik sangnika wisam kalaki sulama balna yakat, kaput bik laih blisin bik sihting kiwarang.

⁴Kaput laih dibasta balna kidika was utuhdak bararakwa kapat bararakna karang, was kungkau pan balna bararakwa kapat.

⁵Muih as yulwarang: ‘Yang laih Dawan diniyang’, ūk laih ayangni pakwarang witing laih Jacob sulani, dawakat ūk laih tingni yakat ulwarang: ‘Yang laih Dawan diniyang’, dawak Israel ayangni kidika laih witing ayangni dunakarang.”

⁶Dawan laih king as Israel laihwi yakyang, Dawan parasni nuhni duwa kidika aput yulwi: “Yang kuduh tatuna dawak witni kau kidika bik; yang kaupak dawan dauh ūk diski yang kapat.

⁷¿Wais kidika yang apatyah? Yulwang, lāih yakwi yulwang. ¿Wais yaklauwi yulnayah tatuna kaupak, di balna kalahwarang kidika, dawak kalahnin manah kidika bik yakwi yulwi?[70]

⁸Kaunah, ¡kulnamna dulautanauh, yamaduduwinih! Yang kaput yulnayang tanit mani balna kaupak, manna dakanamana. ¿Papang ūk sakkatpah yang kaupak? Yakmaldinin pāni ūk diski; as bik talasyang.”

⁹Dawan dauh yamyang balna kidika laih dauh minitna diski, dawak dawa dauh wayani balna yakat dalani tatalwa kidika ilp as bik diski. Kidika yakat minitna yuyulwa balna kidika laih miniknapa diski dawak sins diski, kidika bahang sarahni niningna kakarana karang.

¹⁰Angdika muihni kat di wayani as yamwi kidika yakat minit yulwa kidika laih dauh ma balna kidika dawak bayakwi.

¹¹Kidika yakat minitna yuyulwa balna bitik kidika sarahni niningna kakarana karang. Dawan dauh wayani yamyang balna kidika laih muih dauh balna. Kidika balna bitik kalpakwi la muhni yakat uiwarang kat sau yakat bubukna karang dawak muihsak dadauna karang.

¹²Taldang ayan kau di yamyang kidika ais yamwarangpa: ayang dakwa dini kidika duwi, dawakat ayan kidika kuh pasyakat āwak daihni kalwak tiswi yamwi amar kau. Witing parasni kau yamwi. Kaunah witing di kaswas karangkat, parasni dis dawarangki, kaput bik laih was diwas dawarangkat kalsuhwarang ki.

¹³Pan kau muih wayani yamyang yakat taldang: nuhni ampus karang kidika kulwi talwi, wayani yamwi pincil kau, usnit kat mahka tiswi yamwa dini kidika kau duwi yamwi muih wayani as, yamwi yakwa usnit kat makat yulnin uni yakat dukiwi āsakwi.

¹⁴Muih as suhun dahwarang, dawak waslauwak barakwi; bahang kaput laih witing suhun daknin panani duwarang. Kidika-awas karang bik pan ūk balna asangpas yakat bangkidika maintalwak nunuhwi.

¹⁵Dawak kaput laih muih balna kidika kuh bibiwi; buas duwi uiwi biwi kalpuihnin, ūk balna laih di lahnin duwi uiwi, dawak ūk balna kidika laih duwi uiwi dawan dauh wayani yamna atnin, kaput laih kidika yakat minitna yuyulwi abukwi.

¹⁶Kidika awaskat, panan balna kidika papuswayah kuh payakat āwi bubuswi, bahang dahlwakat dimuihni buswi kaswi isningnalak dawi. Kidika kau kalpuihwi yuyulwi: “¡Kuh yaihnit yakat sak atnin laih yamniyah; mahka yapuihāwi!”

¹⁷Panani sutni balna kidika kau dawan dauh wayani yayamwi, dawak kidika yakat abukwi minitna yuyulwi aput yuyulwi: “¡Yalaihta yakta kat man laih papangki man bahang!”

¹⁸Kidika muihni balna laih di amanglalawas ki; miniknapa tatalwas ki di as bik tatalwas ki, dawak di amanglanin bik witingna sip amanglalawas ki.

¹⁹Yul kulwi tatalwas ki, baisa ki di kidika amanglawi yulnin: “Pan balna dai kidika papuswayah kuh pasyakat āting dahllana, dawak kuh tuturni yakat plawar busnayang, dimuihni bik bustik kasnayang; sutni watna balna dai kidika laih di dutni adika yamnayang, ¡dawak mikityulta sakyang adika laih pas dakni as kat mikityultayang!”

²⁰Di rahm kidika laih wan kasda kapatki. Kulnin lani dauh yakat dādak alas maiyulnin. Kidika muihni balna laih sip laihwi yaknin kidika duduwas karang. Witingna sip-awas ki tingnina yakat duduwa kidika laih alas manah kidika.

²¹“Israel, Jacob tawanni, ismangkatta man laih yang diki yamyang man; diki yamyang man, kat yang lawik mayamnayang. Israel, datang kat yang adika damatkahnin-awaski.

²²Yang lawik dutni balna yamnaman dai kidika dating disna, sihm mukus wītkauna diswa kapat. Yang akat nawatta aiwah, kat yang lawik malaihtik yaknayang bahang.”

²³¡Makau kisang sarahta, alasna dutah, Dawan di yamna kidika yulni! ¡Pa kudungni tuhni balna parasni yultanauh! ¡Asang dawak pan balna kidika bitik alasna duta parasni sarahtanauh, kat Dawan alasnina nuhni kidika lāih yakna bahang Israel laihwi yakwi, Jacob tawanni kidika!

²⁴Adika Dawan yulwi, malaihwi yakyang, baisa batahntasman kau mayamna dai kidika: “Yang laih Dawan yang, di bitik yamyang yang, yang lawik makau kisang dawak sau kidika yamnayang muih as bik tingkisut laihwas kat.

²⁵Prapit dauh balna yulnina kidika dating kat yulna kaput kalahwas ki; sukyah balna bik diyamtingkat dauh manah kakalwi. Sins duyang balna yakat bik diyamtingkat biri biri niningnakauh yuyulwi, dawak di amanglalawa balna kidika dauh manah kalwi.

²⁶Kaunah yang diki yamyang yulni kidika laih kalatingkat yulwa yakat kalahwi, kaput bik sihnayang balna warknina kidika yamni manah kalahwi. Yang yultayang Jerusalén kidika watwi muih uiwi panina duduwarang ki, dawakat Judá tawanni nunuhni balna bik watwi laihwi dulauwi yayamwarangki. Yang yamtingkat, daukalna balna kidika watwi dulauwarang.

²⁷Yang sipyang paknik kuma nuhni sakkidika buhlakna atnin, dawak was nunuhni balna murwa kidika bik wasni dis dana atnin.

²⁸Yang Ciro yakat kalyultayang: ‘Man laih yang sīpki maintalyang man, amput dukihyawa balna kidika bitik yamma’; dawak Jerusalén yakat kalyultayang: ‘Man kidika watwi malaihwi dulauwi yamna karang’; dawak makatyulnin ūni kidika watwi rahni balna āna karang.”