Read Mayangna Isaías 45 Bible Online

Isaías 45 - Mayangna bible

Isaías 45

¹Dawan yaklauwi witing dini yakna, Ciro kidika king kapat, dawak tingni yakat laihna king ūk balna kidika bitik kalni dinit yakat duna atnin, dawak king balna kalbaunin dini duduwa kidika bitik laihwi dakyakna atnin. Dawan yaklauwi yamna, Ciro niningyakat tawan nunuhni balna dūrnina bitik apahna atnin, putnin sip-awas atnin muih as bik. Dawak waralaih kalyulwi:

²“Man tamat yakat yang yawaki, maluihni balna kidika bitik tuklakki, bras dūrni balna kidika bitik bahna awaki, dawak ayan balna kidika bitik laih bahki.

³Gol malna bangkidika bitik yang maki, di minit nuhni malnikau bangkidika bik, kaput laih man amanglana atnam yang laih Dawan yang, Israel Papangni, man ayangma kau yaktik yultayang kidika.

⁴Yang diki yamyang Jacob yakat kultayang kidika yulni, dawak Israel muihni balna yaktik dunayang kidika yulni, man ayangma kau yaktik yulnayang dawak waradika ayangma nuhni dutaman kidika waradika, yang akat yatalyang awas man dai bik.

⁵Yang laih Dawan yang, ūk diski; yang kaupak Papang ūk diski. Yang lawik ridi mayaknayang kalbauna atnam, man yang akat amangkilatasman dai bik,

⁶muih bitik dakana atnin, makilwa kaupak makawa kat, yang kaupak ūk diski. Yang laih Dawan yang ūk diski.

⁷Yang lawik yamtayang yaringni dawak puksani kidika bik, yamni atnin kidika bik yamtayang, dawak dutni atnin kidika bik. Yang Dawan yang adika, di bitik yamtayang.

⁸“Yang lawik sihting kaiwarang makaupak minit bayaknin kidika, diwas kapat, dawak bik waslauwa kapat mukus kaupak, bahang kidika laih sau yakat kiwak duna karang; minik kapat kalahna karang kidika laih laihwi yaknin karang, dawakat yaihnit yakat puluna karang la kat kidika.”

⁹Saupih kau di yamna kidika, ūk bik sihm kapat ki, kalyamna muihni karak witing sip di as bik kalyulwas ki. Saupih kidika wark kalahwa muihni yakat kalyulwas ki: “¿Ais yamta sakmahn?”, dawak yamna diki kidika yaklauwi sip kalyulwaski yamyang muihni yakat: “Man di yamta sip-awasman.”

¹⁰Walanibis yaklauwi sip papangni muhni yakat yulwas ki, witing sau akat kalyakna kidika yulni.

¹¹Dawan, Israel Papangni maisihnidis kidika, witing yaklauwi yamna kidika yulwi: “¿Walakibis balna yulnina kidika yakta yayultanama katpah, kidika awaskat yamnik dini balna kidika, amput yamnik kidika yasumaltanamayah?

¹²Sau adika yang yamnayang, dawak muih balna bik, yang tingki kau makau kisang kidika panuhni yamnayang, dawak kalating yala satni balna bitik kidika kalalahna.

¹³Yang lawik Ciro kidika kalating kalahna, witing kidika minit bayakna atnin yulni, dawak witing tāni balna kidika yudutni manah yamki; witing tawan nuhni kidika watwi dulauwi yamna karang, dawak yang diki laihwi duwi uina muihni balna kidika laihwi yakna karang, kidika laih minit lauwi kalanin as bik diskarang.” Dawan parasni nuhni duwa kidika yulbauna.

¹⁴Dawan yaklauwi Israel yakat kalyulwi: “Egipto muihni yamak warkni yamyang balna kidika, Etiopía muihni di wauhwi bakanyang balna kidika, kaput bik laih Sabá muihni balna nanaini balna kidika, man kalma dinit yakat bubukna karang, dawak man warauma balna karang; man dangmat yakat sīn kau sitwak uina karang, man muhma yakat limbabahwi yuyulna karang aput: ‘Rahm palni laih Papang kidika manna pasmangna yakat sakki, ūk diski, Papang ūk diski.’ ”.

¹⁵Kaput kaunah man laih Papang as man, kaunah sip mataldaski, Israel Papangni, laihwi yakyang man kidika.

¹⁶Dawan dauh yamyang balna kidika bitik laih asalnina kalahna karang, dawak bik niningna kakarana karang.

¹⁷Kaunah Israel laih Dawan yaklauwi laihwi yakna, laihwi yakna kidika laih ban kaput karangki, dawak wat as bik asalni kalahwas karangki, kaput bik sau yakat bukwas karang ki.

¹⁸Makau kisang yamyang kidika, witing laih Papang dawak Dawan, sau yamwi pāni āna kidika, yamna kidika, pāni manah atnin awas yulni, kaunah kidika yakat muih bang atnin yamna kidika laih yulwi: “Yang laih Dawan yang, ūk diski.

¹⁹Yang maltik bik yulbautasyang, dawak sau puksani yakat bik yulbautas yang. Jacob sulani balna yakat bik diyultasyang: ‘Di dis pāni yakat yawaltanauh.’ Yang Dawan yang kidika di rahm yultayang, dawak di barangni kidika yultayang.

²⁰“Kaluduhta aiwanauh, yaihkit yakat aiwanauh sau muihni balna dautas lawanamana kidika bitik. Witingna laih di amanglalawas ki, witingna laih ta pasyakat kalahwi uiwa kidika daninawan dauh pan kau yayamna kidika yakwi duwi uiwi, dawak minitna yuyulwi, dilaihwi yaknin sip awas kidika yakat.

²¹Yulbautanauh, laihwi talnin kidika duaitanauh, yultadakanauh, biri biri: ¿Wais yaklauwi tatuna kaupak yulna dai adika dini balna? ¿Tanit mani kaupak wais yaklauwi yulna dai? ¿Yang Dawan yang, adika lawik yamtasyang daih? Yang kaupak Papang ūk diski, minit bayakyang, dawak laihwi yakyang.

²²“Yang akat aiwanauh manalaihtik yakki, sau sutni kau bangmana kidika, yang laih Papang yang, ūk laih diski.

²³Yang ayangki kau yaktik yulnayang, minit bayaknin kidika pramis yamnayang, bahang kidika pranimis kat laih yamna awaki: yang muhkit yakat muih bitik laih limbabahna karang, dawak yang ayangki kau yakwi yuyulna karang, bitik

²⁴dawak yuyulwarang: ‘Dawan yakat manah sakki minit bayaknin, dawak parasni kidika bik.’ Yang kau dutni yakukulwa balna kidika niningna kakarana karang.

²⁵Yang yakat tingkih Israel muihni balna kidika minit bayayakna karang, dawak yangkaupak witingna manah kapat kaldakakana karang.”