Read Mayangna Isaías 47 Bible Online

Isaías 47 - Mayangna bible

Isaías 47

¹“Lakwah, Babilonia sirauni, baisa al disman kidika, sau yahamni minit yakat yalahta; trunma kaupak lakwa Caldea sirauni, dawak yalahda sau yakat, kat baisa mayuyulwas karangki batahnbin man dawak bik yudutniman.

²Kiwatak tiknin dini kidika duta plawar kidika tikta, dawak muhma kau asna baini kidika yakpamta, dawak prakma kidika bik murilta, dawak barahmamak kidika lāih kalahwang, kaput bik kalpas kau was balna kidika daklawah;

³muihma kidika asna as bik diskawang, agha, asalma kidika bik lāih kalahwang. Biritik mayamki, dawak bukta limbabahta yulma kidika bik laih sip laihwatwas karangki.”

⁴Mailaihyakyang kidika laih, Israel Papangni maisihni dis kidika ki, witing ayangni kidika laih Dawan parasni nuhni duwi, bahang yulwi:

⁵“Ap data yalahda Caldea sirauni, puksani yakat awah, kat watwi mayuyulwas karangki ‘muih balna minitna yakat king yalni’.

⁶Yang tawanki karak kulnik daukalnayang mani dai yakat, yang muihki balna kidika risninapik dis yamnayang dai, dawak parasnina kidika kaupak dating bukna dai. Man witingna yakat miniknakun talasman dai, dawak muih bararak balna minitna yakat di tikini kidika ilnaman dai.

⁷Yulnaman: ‘King yalni yang kidika ban awaki’; adika dini laih man kulta talasman dai, dawak bik kultasman dai adika dini amput dahnkalwarang kidika.

⁸Kidika bahang, waralaih adika dakah, yal as di yaksasihn kidika manah waltaman kidika, dawak trunma yakat ismanglak alahtaman kidika, dawak kulnam dinit yakat manah kultaman kidika: ‘Yang manah yang, ūk diski; yang tingmak kaltas awakiki, dawak bik walakibis balna bik dis-awas awakiki.’

⁹Sirihni palni, sihm mani yakat di dudutni bupak man yakat kaina karang; tingmak kalma dawak walambis balna bik dis awama, sukyah lani kapat manas dutaman dawak yultang di kalwa balna tanka manas amanglataman karang bik.

¹⁰Man dutni yamtaman yakat parasma rahm yamni dutaman kaldakanaman, dawak kulnaman: ‘Muih as bik yatalswaski.’ Man kulnam tuhni lani kidika yaklauwi alas mayulna. Man kulnam yakat kulnaman: ‘Yang manah ki, ūk diski.’

¹¹Kaunah di dutni kidika man mamat yakat kaiwarang ki, dawak di yultang kalwa balna kidika kau sip laihwattas awama, man mamat yakat di dutni as kaiwarang ki kaunah kidika kaupak lawas awama ki; di dis kalwarang kidika tahatasman kaunah sirihni man yakat kaiwarang ki.

¹²Sukmayah lani kidika ban yamta, wahma man kaupak manas palni lan alahwanaman kidika, taldarang ilp duma pa kidika kaupak, taldarang kidika kau yamtang muih balna kidika yamamaduduwarang pa.

¹³Yul masumamalwa muihni balna kidika manas dunaman, kaput bik laih masuhna. ¡Makau yala balna tanka walyang balna kidika aiwang, yala yakat talwi dawi di yuyulwa balna kidika, waiku balna kaiwarang yakat di kalwarang balna kidika baisa kau yakwi mayuyulwa kidika, dawak witingna yaklauwi malaihwi yayakwang!

¹⁴Kaunah talah, kidika balna laih sihm dibasta kusuni kapat ki: kuh yaklauwi buswi, kuh dahlwa kidika kaupak sip yaklalawas ki. Kat kuh tuturni kapat-awas bahang yalahwi kalpuihna atnin.

¹⁵Kidika yakat sukmayah balna[71] kidika uiwi yaklalauna, sangmaka bitik yakat witingna karak pramis yamnaman dai kidika. Witingna bitik laih tanina dauh kidika yakat laihwi uina, bahang muih as diski malaihwi yakna atnin.