Read Mayangna Isaías 48 Bible Online

Isaías 48 - Mayangna bible

Isaías 48

¹“Jacob sulani, adika yulni dakah, Israel ayangni dutaman kidika, dawak bik Judá sulani man kidika; Dawan ayangni kau yakta pramis yamtaman kidika; Israel Papangni yakat yultaman kidika, barangni dawak alas lani dis bik awasman kidika;

²tawan nuhni maisihni dis kidika kaupakyang timan kidika, dawak Israel Papangni yakat iriktaman kidika, witing ayangni palni kidika laih Dawan parasni nuhni duwi:

³Tatuna kaupak di balna bayayakna kidika ismangpaknayang dai; yang lawik namangkanayang dai. Sirihni palni yamnayang, dawak dini balna kidika rahm kakalna.

⁴Yang uman amanglatayang dai man kidika dutni man bahang, dawak bik dadasni man sihm ayan kapat, kaput bik laih yudutni awasman sihm bras kapat,

⁵man yakat ismangpaknayang dai ma mahni bayakwi, baisa kalahwas kau ismangpaknayang dai. Kaput laih sip awasman dai yulnam: ‘Yang dakiwan dauh kidika yaklauwi yamna, di wayani as yamnayang dai kidika yaklauwi kaput yamna atnam.’

⁶Man adika dini balna bitik dakanaman, bahang yamni talah kidika yakat, bahang man yulnam ki, kidika laih rahmki. Waralaih di wisam ismangpakki, di as talasman dini dai kidika,

⁷waradika yamna dini kidika, ma balna bayakna dai yakat yamna awaski, kidika laih yuyulwak dakasman dai warmani kat. Kaput laih man sip yultas awama: ‘Uman amanglatayang dai.’

⁸Man kidika yulni yuyulwak baisa dakasman dai, dawak bik talasman dai, kat man niningh tapama kidika pukni dutaman bahang. Yang amanglatayang dai man laih barangni-awas man dai, kulnam dutni ki matwi batanh danaman kaupak.

⁹“Kaunah kulnik laihwatna yang, yang muihki yulni, yang ayangki nuhni yulni madaukalpamtas danayang.

¹⁰Yang maisihni dis mayamnayang, kaunah lalah yakat maisihni dis yamwa kaput laih awaski, kaunah malaihtik talnayang dalani wauhni tanka yakat.

¹¹Yang ayangki nuhni yulni, yang ayangki nuhni yulni yamnayang, kat yang ayangki laih sip daukalna atnin sip-awaski. Yang datas awaki, alaskina kidika ūk yakat kalana atnin.

¹²“Yadakah, Israel, Jacob tawanni, wais yakat yulnayang kidika: Yang manah Papang yang ūk diski, yang kuduh tatuna dawak witni bik.

¹³Yang tingki kau sau kidika yamnayang, kaput laih makau kisang bik tingki kau yamnayang; yang ayangnina kau yulting kat kakalna.

¹⁴Manna bitik kaluduhta dakanauh: ¿Manna pasyakat wais yulna daih adika dini kalwarang kidika: yang lawik muih al as yaktik dunayang kidika, yaklauwi yamwarang Babilonia yakat ais kalyamnin kulnayang kidika, Caldeo ninisan[72] yakat?

¹⁵Yang kuduh yulnayang kidika, dawak yang lawik kalyulnayang kaina atnin, bahang kalyamting kaina, angkat kiwarang kidika bitik yakat yamni manah karang.

¹⁶Yang yaihkit akat aiwa adika yulni dakanauh: Tatuna kaupak, yang yul malnikau yulbautasyang; adika dini balna bitik kalahwa mani balna yakat yang sakyang dai kidika pāni yakat. Waradika laih yang Dawan yang adika lawik paraski kalanayang, dawak sihting kiuna.”

¹⁷Dawan aput yulwi, malaihwi yakyang, Israel Papangni maisihni dis kidika: “Yang kuduh man Papangma Dawan; man yamni atnam kidika yulni namangkatayang, yawanam tāni kidika munah madutik yawayang.

¹⁸¡Yamni karang dai yang yulki kidika dakanaman kat! Man yamni atnam kidika bahngwi kilwitdai sihm was pauwak bangilwa kapat, dima balna barakwa kidika laih sihm kuma lalamwa kapat kitdai,

¹⁹man sulama balna kidika mahni-kitdai, kuldi yakdas sihm kuma kauhnimak balna kapat; yang imuktas awitikdai, kaput bik yang mikpa kaupak latas awitikdai.”

²⁰Babilon kaupak alahwanauh, Caldeo balna kaupak iranauh. Adika yulni parasni yulta sarahtanauh, alasna karuk, dawak sau sutni kat diatanang dakakawang. Yultanauh: “¡Dawan yaklauwi, witing diniyamyang Jacob yakat laihwi yakna!”

²¹Kauhmak wanilang munah diawak bayayakna karang bik, was dikih diawas dai; witing yaklauwi kipala kidika sahna dai, dawak was parasni murwi kalahna dai.

²²Muih dudutni balna niningna yakat laih, di yamni diski. Dawan yaklauwi yulna.