Read Mayangna Isaías 49 Bible Online

Isaías 49 - Mayangna bible

Isaías 49

¹Yadakanauh, kuma paskau muihni balna mana kidika, sau naikau muihni balna mana kidika yadakanauh: Dawan yaklauwi yayulna kiuna atnin witing yakat, baisa batanh datasyang kau; yang ayangki yakwi yulna baisa nanangki bānipas yakat sakyangkat.

²Yang tuki kidika isparah baini yamna, witing tingni dinit yakat yamalna, sibang baini yayamna, dawak punin pāni yakat ya-apakna.

³Yayulna: “Israel man laih diki yamyang man, man yakat ayangki nuhni karang.”

⁴Dawak yang kulnayang dai kidika: “Dauh wark yamnayang, paraski kidika dauh witnayang, di as bik diski.” Di rahm kidika laih yang yulki kidika laih Dawan tingni yakat sakki, dawak yang mikit dunik kidika laih Papangki parasni yakat sakki.

⁵Ayangki nuhni kidika dunayang, Dawan muhni tani yakat, witing kidika laih yang paraski ki. Dawan, witing yaklauwi paraski yana baisa nanangki bānipas yakat sakyang kat, witing diniyamyang atnik yulni, Israel Jacob tawanni kidika nawatwi kaiwi, witing karak aslah kalpakna atnin,

⁶aput yulwi: “Yamni awaski, yang diki yamyang manah atnam, Jacob sulani balna kidika panina dianin manah yulni, dawak kaput bik Israel muihni balna dauwas yaklalana balna kidika duainin manah yulni; yang lawik yamki man kidika muih balna yaringnina atnam, yang laihtik yaktayang kidika dukiuna atnin pa naikau balna yakat bik, adika sauni akat.”

⁷Dawan, muih laihwi yakyang, Israel Papangni maisihni dis kidika, yulwi tawan as di bitik nining yakat dutni kalkulna dai kidika yakat, kaput bik tawan ūk balna bik yaklauwi dutni kaltatalwa kidika yakat, king balna waraunina dai kidika: “King balna matatalwarang kat, yaklauwi muhma tani yakat abuk dadawarang, kat yang Israel Papangni Dawan holi yang kidika lawik mawaltik yaknayang, bahang pramiski kat yamnayang.”

⁸Dawan yulwi: “Mani kaina yang dalani talayang lani kidika lāih yaknik, bahang nangmatlanayang; laihwi yaknin mani kidika kaiwi kāna, bahang ilp manayang. Yang namat daknayang, yang pramiski kidika yamna atnin yang tawanki karak, kaput saunina kidika watwi laihwi dulauwi yamna atnin, sau buswi bayakna yakat kawi panina duna atnin,

⁹silak muihni balna yakat diyulna atnin: ‘Pri alahwanauh’, dawak puksani kau bangkidika yakat: ‘Datanangkat tatalwang.’ Tapas yaihnitna balna bitik yakat sihrsihr yaktanama, angkat asangni yakat di dis ahni manah karang bik witingna tingninalau balna kasninna yayakwarang.

¹⁰“Yuh bik manawas karang dawak bik dikih bik manawas karang, ma daihni kidika bik wāk dakas awanama, kat yang dalani manatalayang bahang tamanatuna āwik manaduyawayang, was burhwa yakat manadutik yawaki.

¹¹Asangpas munah yang ta as yamkiki dawak kaput bik kudungni balna kidika langni manah yamki.”

¹²¡Talnauh! pa naikaupak aiwi: Buas laih tingpal nining yakauh aiwi, dawak ūk balna kidika laih ma kāwa kaupak aiwi, ūk balna kidika laih Asuán sauni kaupak aiwi.

¹³¡Makau kisang alasna duta sarahta! ¡Sau alasna duta! ¡Asang balna ismangnalak duta sarahtanauh! Kat Dawan witing tawanni kidika walaniana bahang, kulnin bukna mani yakat minikun talna.

¹⁴“Sayan yulwadai: ‘Dawan yaruhmwi dana, Papangki dinit kahna yang adika.’

¹⁵Kaunah, ¿nanang kidika, witing walanibis palni yakat dalani talwas katpah? Witing dinitkahwarang karang bik, kaunah yang laih dikitkahwas karang.

¹⁶Yang tingki yakat ultik maduyawayang, itikta daklana man balna kidika ban kulnik yakat madutayang.

¹⁷Malaihwi dulauwi yayamwa kidika sirihni yayamwi madaukalpapamna kidika karak dawak; mabubusna muihni balna kidika uman uina.

¹⁸Miniknapa dulauwi yaihnit awaih yakat tatalwi, talah, amput aslah bitik kalududuhwi dawak man yakat nawatwi aiwi. “Yang, Dawan yang, sangkika kau yaktik yultayang, kidika balna bitik kidika di minit nuhni kapat alahma, sihm yal sirau marid kalahwarang kapat.

¹⁹Man sauma kidika daukalna dai, buswi bayakna dai; kaunah waradika sauma pīsni kidika laih dibin kalna karang kidika muihni balna niningna yakat. Madaukakalna muihni balna kidika laih naikau uina.

²⁰Walabis balna didisna timan dai kidika tapama yakat lāk dawi mayuyulwarang: ‘Adika sauni laih binibin ki mayang maniking yakat; pa yamta mayatangkat yakat yalahdanang.’

²¹Man kulnam pasyakat yulma: ‘¿Walanibis balna adika wais yaklauwi yana yah? Yang walabis disyang dai, dawak bik walabis yaknik sip-awasyang dai; muih panina kau yaduwi uina kat witni yakat yalalahna dai, bahang ¿wais yaklauwi muhna yah? Alas yadadana dai, ¿angkaupak ainayah?’ ”

²²Dawan yulwi: “Sau muihni balna yakat pakna awaki; kaput bik tawan balna yakat sain as diaki witingna walaninabis kidika tingnina kau laihwi dulauwi duaina atnin, dawak walaninabis yayal kidika laih salahnina kau trukwi duaina atnin.

²³King balna kidika manna Papangmana karang kat manamuhna bahang, dawak king walanibis yayal balna kidika laih walamanabis maintalyang balna karang. Man muhmana yakat saukat limbabahwi bubukna karang, dawak kalmana kau sau yahamni balna kidika witingna dadatna karang. Dawak amangkilama yang kidika Dawan yang, dawak yang akat kulninna awi duduwa balna kidika laih dauh bubukwas karang.”

²⁴¿Muih al parasni kidika yakat sipyah dini dakyaknin tingni kaupak, witing war yakat kalbauwi minit bayakwi duna dini kidika? ¿Kidika awaskat silak muihni kidika sipyah kiri yaklanin kaltaihyang tingni kaupak?

²⁵Dawan yaklauwi sipki ti: “Muih al parasni kidika sipki dini dakyaknin, witing laihwi duna dini kidika, dawak taihyang muihni kidika bik dini dakyakna karang. Man yakat mauhuswa balna niningna yakat yang lawana awaki; yang lawik walamabis balna kidika laihtik yakki.

²⁶Mataihyang muihni balna yakat paktingkat witingna alas muihnina kidika kakaswarang, dawak ānina kidika diwi wasak dadauwarang, sihm wain kapat. Kaput laih muihni balna bitik amanglalana karang, yang adika Dawan yang adika, malaihwi yakyang yang; yang kuduh Jacob parasni nuhni kidika, yang kuduh laihtik yakyang yang.”