Read Mayangna Isaías 52 Bible Online

Isaías 52 - Mayangna bible

Isaías 52

¹Sahmuta, Sayan, sahmuta, parasma duta; Jerusalén, tawan nuhni maisihnidis man kidika, asmana tanit yaksinh kidika awah, kat Papang tatalwas muihni balna maisihni balna kidika watwi man yakat aiwi kakawas karangki.

²Lawah Jerusalén, sau yahamni mauhna kidika kalisihtah, trunma yakat yalahda. Sayan, silak muihni sirau man kidika, arangmapana kau pan sitna kidika lakpamtah.

³Dawan yulwi: “Yang sint as bik dutasyang dai manna warau lani yakat manaduwi uina kat; bahang waradika bik sint as bik diatas awaki manalaihtik yaktayang kidika.

⁴Tatuna laih tawanki adika Egipto yakat kiuna dai, bahang yakat muih kaltaldas muihni as likdai; usnitkat Asiria yaklauwi taihna dai ban di as dis kaupak.

⁵Dawakat waralaih, ¿ais kidika talayang? Di as dis kaupak tawan ki kidika Babilon yakat duwi uina. Angdika muihni balna muih taihyang kidika, witingna manah kapat kaldakawi papāuhwi bahang laihwatwas ban kaput yauhuswi.

⁶Kaunah mani balna kaiwarang dawak tawanki kidika amanglawarang, yang yulkalbaunayang, bahang yang laih Dawan yang.”

⁷¡Ais nuhni yaksihni yah asang ubulni yakat kaiwak talnin kidika, yul wisam duaiwa muihni kidika, kulnin aslah yulni duwi kaiwa kidika, laihwi yaknin yulni isningpakwa kidika Sayan yakat kalyulwi: “Man Papangma kidika laih King”!

⁸¡Dakah! Makau kilwi maintalyang balna kidika parasni sararahwi minit bayakna yulni, kat witingna alas miniknapa kau tatalwi amput Dawan nawatwi kaiwa kidika Sayan yakat.

⁹¡Minit bayakna kidika yulni sarahtanauh, Jerusalén daukalna kidika, kat Dawan kidika witing tawanni yakat minikun talna bahang, Jerusalén kidika laihwi yakna!

¹⁰Dawan parasni nuhni kidika yakwi niningkana, muih mahni miniknapa yakat. Sau muihni balna bitik amanglalana karang mayang Mapapangki kidika yaklauwi mailaihwi yakna.

¹¹¡Alahwanauh, alahwanauh Babilon kaupak, di maisihni mailaihwa balna kidika as bik lalaihwinih, Babilon kaupak mahka alahwanauh! ¡Maisihni dis awanauh, Dawan di duwa dini balna trukta yawanama kidika!

¹²Kaunah sirihni ismangna abahl alahyawanamna laih awaski, īra alahyawanamna laih awaski, kat Israel Papangni Dawan kidika yaklauwi nanitdakna karang bahang.

¹³Yang warauki kidika warkni balna yamni manah karang, dulauwi tanit maluih yakat ilna karang.

¹⁴Kaput laih muih manas taldas dini kidika tatalna witing kaupak, witing muih kidika satuk kalna dai bahang, dawak muih muihni kidika bitik laih disna dai satuk kalna dai,

¹⁵sihm kaput bik laih sau muihni balna di tatalwas dini kidika tatalwarang; king balna kidika tatalwi yul as bik yulninna dis kalna karang, kat talwi amanglalawarang, kidika dini dakakawas palni dai kidika tapanina yakat.