Read Mayangna Isaías 53 Bible Online

Isaías 53 - Mayangna bible

Isaías 53

¹¿Wais rahm kulwarang yah, mayang dakanamayang kidika matapaki kau? ¿Papang parasni kidika wais yakat niningkana yah?

²Dawan laih dukih kalnadai, witing warauni kidika pan as kapat barakwak talna atnin, rikni balna kidika sau buhni kidika pasyakat kakiwa kapat. Yaksihni dawak yaringni bik disdai, talkih bik mayawas dai;

³muih balna kidika yamni tatalwas dai. Muih al as dalani kidika nuhni palni trukna, wauhnin kidika lan kalna dai. Witing yakat kaltalnin bik yamni-awas dai, dauh kalkulna mayang, bahang kalkuldasdai.

⁴Kaput kaunah, witing laih mayang wauhda kidika trukna sakdai, trukna sakdai mayang dalani wauhda kidika. Mayang kulnamayang laih Papang yaklauwi witing muihni yakat dakwi, wah kalana dawak sau kau lakna.

⁵Mayang makulnik dutni yulni Witing yakat pawi ahalna dai, mayang madutki yulni, dalani wauhna dai; wah dalani wauhna kidika yulni kulnin aslah lani duaiwi mayana, witing muihni dakna kidika yulni mamuihki yamni dudi.

⁶Mayang laih bitik sīp kapat disnamayang dai, mataki silp silp waldi, kaunah Dawan laih witing trukna dai mayang bitik madutki kidika.

⁷Kasak wiwisna dai, kaunah witing sau yakat bukna dai, dawak tinpas bik wakahwasdai, sīp as inin pāni yakat duwi uiwa kapat, witing ap dai, tinpas wakahwasdai, sihm sīp as butuni kakahrwa kapat.

⁸Duwi uina dai la as dis dai karang bik, dawak muih as bik disdai nanit dakna atnin; muih as bik kulwi kalbauwas dai witing yulni. Adika sauni kaupak dakwi yayakna dai, ihina dai yang tawanki dutni yamna yulni.

⁹Muih dudutni balna yaihnitna yakat nununa, muih dudutni[75] balna karak nununa, di dutni as yamwas dai dawak tinpas kaupak alas as bik yulwas dai.

¹⁰Dawan yaklauwi taihnin kulna dalani wauhnin kau. Dawak kaput laih witing kidika muihni sakripais yamna dutni kidika yulni, bahang witing sangnika naini karang, dawak sulani balna kalahwi kaiwa balna kidika bik talna karang; witing muihni munah laih Dawan warkni balna kidika yamna kalahna karang.

¹¹Kulnin bukna nuhni duna munah laih witing yaringni talna karang,[76] dawak witing talwarang kat isninglak dawarang; Dawan dini yamyang barangni kidika muih mahni laihwi yakna karang, kat witingna dutnina kidika trukwarang bahang.

¹²Kidika bahang Papang yaklauwi, nunuhni pasyakat pa as kalawarang, dawak parasni nuhni duyang balna minit bayayakna kidika pasyakat karang witing bik, kat witing muihni kidika daunin yakat āna dawak muih dudutni pasyakat witing bik kaput kalkulna dai bahang, kaunah di rahm kidika laih muih mahni dutnina kidika trukna, dawak muih dutni balna tunanina minit yulna dai.