Read Mayangna Isaías 54 Bible Online

Isaías 54 - Mayangna bible

Isaías 54

¹Alasna duta sarahta, muih yal walabis yaktasman kidika; alasna duta unbautah, man muihbin as bik yaktasman kidika, kat Dawan yulwi: “Muih yal as ruhmwi dana kidika walanibis mahni duwarang, yal as al duwa kidika karang dawakat.”

²Man ūma labanni kidika baisa nuhni yamtah, yamadutas ū paknin asnina dinit yakat āwaman kidika ritah; wahni balna kidika murtah dawak panan uknaman kidika yamni tisatah,

³kat baisa panuhta alahyawama bahang, tingmapal dawak wadahma niningyakat bik; man sulama balna kidika pa manas laihwi duduna karang bahang, dawak kaput bik waradika kauhmak wanilang di dis kidika yakat tawan nunuhni yayamna karang.

⁴Yamaduwinih, namangkarinin diskarang ki; mauhuswas karang ki dawak asalni bik dutas awama. Wahma asalma dai kidika damatkahna karang, dawak kaput bik ismangkattas awama tingmak kalta rismapik dis dawarang kidika,

⁵kat mayamna muihni kidika yaklauwi yalni maduwarang bahang. Witing ayangni laih Dawan parasni nuhni duwi; malaihwi yakyang kidika laih Israel Papangni maisihni dis kidika, sau bitik Papangni.

⁶Yal sirau as al duna kaunah ruhmwi kaldana kat kulnin bukna kapat man dai, kaunah Papangma yaklauwi watwi aput mayulwi:

⁷“Ma parahni marumhtik danayang dai, kaunah minikunni talnin lani nuhni kau wattik maduaitingkat kalpakdarang yangkarak.

⁸Sirihni man kulnam daukalnaman dai, dawak yang bik ma parahni man kaupak maldanayang, kaunah dalani ban kaput atnin kau mamakun matalnayang.” Yulwi, Dawan malaihwi yakyang kidika.

⁹“Noa yakat kalyulnayang dai kaput, was nuhni āna dai kidika, watwi was nuhni-āwas karang sau akat, kaput laih man yakat mayultayang rahm palni wattik kulnik daukalnik awas man yakat, dawak namangyakat lawinik-awas.

¹⁰Asang balna kidika panina kaupak dawi pa ūk yakat yaklalawarang karang bik, dawak asang balna kidika langni manah kalwarang karang bik, yang man yakat dalani matalayang kidika satuk kalwas karang, dawak kulnin aslah lani pranimis yamnayang kidika sau yakat bukwas karang.” Dawan kaput yulwi, man yakat mamakun matalwa kidika.

¹¹“¡Tawan nuhni as alasna dis kidika, wing parasni wauhna kidika yaklauwi daukalpamna kidika muih as bik diski walaniana atnin! Manna kimanapala kidika sani minit yakat ilki, dawak rahni balna kidika laih kipala minit nuhni sangni kau karang;

¹²Makau kilwi talnin pāni kidika kipala pauni kau yamki, dawak dūrma balna kidika laih kipala sangni dibasta kapat kau yamki, dawakat daklana balna kidika laih kipala dahlwa balna kau manah yamki.

¹³Yang walamabis balna kidika bitik sumalki; witingna bitik di yamni manas duduwarang.

¹⁴La barangni kidika yaklauwi parasni mayamwarang, yamadunin dawak taihnin kidika kaupak dakta alahwama; muihsak daunin kidika yaklauwi kulnam abalhwas karang ki.

¹⁵Muih as namangyakat yaklauwarang kat, kaunah kidika laih yang yulki awas karangki, kaunah man lawa minit bayakma, namangkauh yaklauwa muihni yakat.

¹⁶“Talah, ayan kau di yamwa muihni kidika yang lawik muhnayang witing kuduh kuh tuturni kidika kalawakat daihni kalwa kidika, dawak kaput laih kalbaunin dini sat sat yamwi; kaput bik yang lawik muih al di daukalyang kidika muhnayang di balna kidika daukalna atnin yulni;

¹⁷kaunah kalbaunin di as man yakat madaukalpamnin kidika laih muih as bik baisa yamwas ki. Man dutni yamnaman atwi yulma yayakwarang balna kidika man lawa tininapas ap dama. Kidika kuduh yang lawik diatayang yang diki yamyang balna yakat: minit bayaknin.” Dawan yaklauwi yulwi.