Read Mayangna Isaías 55 Bible Online

Isaías 55 - Mayangna bible

Isaías 55

¹“Bitik dikih kalawa muihni kidika, aiwa was ditanauh; lalah dismana kidika aiwanauh, aiwa plawar yakta kastanauh minitdis; wain dawak tāwas yakta ditanauh minit lautas.

²¿Ais yamwi lalah launinyah kasnin dini-awas kidika? ¿Ais yamta wark alahwanaman minit kidika kau laumayah ismanglak dawas dini kidika? Yamni yadakanauh, manna di yamni kastanama, di auhni kastanama.

³Yang akat aiwa yamni dakanauh, yang akat yadakanauh, sangka awanama. Yang manna karak pramis as yamki kaput ban atnin, kaput yamki karangkat Devid yakat dalani talik pramis yamnayang dai kidika yakat yamna awaki.

⁴Yang lawik witing kidika ānayang witnis atnin sau muihni balna yulnina, witing kidika tunan muihni dawak bik disumalna atnin.

⁵Man lawa diyulma aina atnin tawan talasman balna yakat; tawan balna man yakat amangmalalawas balna dai kidika kirinah uiwarang man yakat, kat yang man Damawan, Israel Papangni holi kidika, yang lawik rispik mayamnayang.

⁶“Papang yakat walta sipmana mani yakat walta yaktanauh, yaihmatna kau sakkidika mani balna yakat kalyultanauh manna yakat kiunin.

⁷Muih dutni tāni kidika dawang, dawak dutni yamyang muihni kulnin balna kidika bik dawang; Dawan yakat nawatta aiwanauh, manna yakat mamaknakun manatalwarang; mayang Mapapangki yakat nawatta aiwanauh witing laih madutki dawak diswi.

⁸Kat yang kulnik balna kidika laih manna kulnamna balna kapat awaski, dawak di balna yamtayang kidika manna yamtamana kapat awaski. Makau kisang kidika sau minit yakat kidika kaput yang kulnik balna dawak yamtayang balna kidika manna mamatna yakat ki.” Dawan yaklauwi kaput yulwi.

¹⁰“Waslauwa kidika dawak mukus pihni makau kisang kaupak kai'bukwa kidika watwi nawatwi kiwas ki, kaunah sau kidika suihwi, dawak di minit balna kidika pitwi kalahwi, dawak miniksani kidika yakwi dahna atnin, dawak kasnin dini kidika kalahwakat kasna atnin,

¹¹kaput bik laih yul balna tikpas kaupak kalahwa kidika, minik as bik yakwas laih yang yakat nawatwi kiwas ki, nawatkauh laih yang dukih yawa yakat yamwi, dawak yang lawik paktayang kidika kaput laih yamna ki.

¹²“Manna kidika kaupak alasna karuk alahwanama, manna saumana yakat kulnamna aslah karak yawanama. Asang nunuhni balna dawak asang ubulni balna kidika talwi alasna duwi unbabauwarang alasna manah, dawak pan balna kidika laih tingnina titiswarang.

¹³Wakal ukusnin dai kidika pāni yakat awas ukusna karang, dawak ortiga ukusnin pāni dai yakat burimak ukusna karang; adika Dawan ayangni nuhni yamna karang; sain as ban kaput karang, dawak sip daukalwas karang.”