Read Mayangna Isaías 57 Bible Online

Isaías 57 - Mayangna bible

Isaías 57

¹Muih yayamni balna kidika dadauwi, kaunah muih as bik kulwi kalbauwas ki; muih ahal yayamni balna kidika pini didiswi, kaunah muih as bik amanglawaski, dadauwa mani kat di dutni kaupak dakwi kalalahna tatalwi,

²dawak kulnin aslah lani yakat uiwi kakawi. Ta barangni yakat uiwi uina dai bahang waralaih saunina-ū yakat yakururupdi.

³Sukiah walanibis balna yaihkit akat aiwanauh, yal as al suhlsuhl kaupak batanh danamana kidika:

⁴¿Manna wais yakat niningna āramanah? ¿Wais yakat dauh tala wayani yamtamanah? ¿Wais yakat tumana yakta niningnakatamanah? Manna laih dutni yamyang dawak alas yulyang walanibis mana;

⁵pan nunuhni balna dinit yakat alangwa dutni yamna mana, dawak muihbinina kau sakripais yamnamana waskung yakat, dawak kipala sahna walsah balna yakat bik.

⁶“Israel, man laih waspa kau kipala salalaini balna yakat mamatyulnam kultaman, bahang kidika yakat man pāma as pakki. Kidika yakat wain utuhna man minitdis dini kidika kalata, dawak plawar minik balna bik kalanaman. ¿Bahang kidika balna bitik yamnaman usnitkat isinglak kulki kultaman?

⁷Asang as tuna sutni kau subang yakat payahnam pāni kidika laknaman, dawak kidika yakat bik ilwa man sakripais yamnaman.

⁸Man ūma dūrni dangnit yakat damawan dauh dutni kidika laknaman sakki. Yang adika damatkahnaman, dawak asmana balna yakta wahdis data alangwaman pāni nuhni yakat alangwa data ahal karak pramis yamnaman, kidika balna karak alangwakih mawa dai kidika, dawak dawan dauh yakat mamakpa talnaman.[78]

⁹“Ira yawanaman dai dawan dauh Melec[79] niningyakat, bahang duyawanaman dai disala dawak di walapni balna manah palni bik; dawak muih yakta yul sihnaman dai pa balna naikau yakat bik, kaputbik bik yamtangkat yaklakwi kiuna dai daunin pāni yakat bik.

¹⁰Lapakna manah masuhna, kaunah amanglatasman dai kidika balna bitik dauh manah dai kidika. Buknam awas dini kidika tingma yakat dutalikman dai kidika bahang masuhwasdai.

¹¹“¿Kidika daniwan dauh balna kidika wais balna yah, man yamaninaduta witingna yakat ayangnina nuhni yamtamana dai kidika, kaput yamta yang akat barangni-awasmana dai, dawak kaput bik yang adika damatnakahwa dai bitik palni? Man yang akat ayangki nuhni yamtasman kat yang ap datik di as amanglatasyang kapat yamtayang dai.[80]

¹²Kaunah man yamtaman balna kidika lāih yaktik yulki ki, man laih barangniman kapat kaldakaman kidika.

¹³Man sarahta ilp yulma kat, damawan dauh balna kidika sip ilp mamawas karang ki, dawak bik malaihwi yayakwas karang ki. Kidika balna bitik laih wing yaklauwi wauhwi dukiwarang ki; wat aslah wauhwak pini didiswarang ki. Kaunah, waiskat yang akat yakulwa kidika laih adika sauni akat yalahwarang ki, dawak bik yang asangki maisihnidis yakat yalahwarang ki.”

¹⁴Kaput laih dakana karang yuyulwak: “Ta barangni as yamtanauh, bayaknin dudutni balna kidika bitik yamtanauh yang tawanki bayaknin yulni.”

¹⁵Kat makau palni sakkidika witing ban kaput atnin yakat yalahwa kidika, dawak witing ayangni kidika laih maisihnidis kidika yulwi: “Yang laih pa as maluihni kau yakat yalahtayang dawak maisihni diski, kaput kaunah muih kulnin sau yakat dawak kulnin bukna kidika karak yang, dawak kulnin dulautik dawak bik wingnita kalatayang.

¹⁶Yang nining tawanki dutni yaktik yultas awaki, dawak ma bitik yakat kulnik daukaltas awaki; bahang kaput laih yamtingkat muih al yamnayang kidika kulnin sau yakat bukna yang niking yakat.

¹⁷Israel dutni yamna kidika yulni yang ma as annayang dai, witing yakat wah kalatik dawak naikau lawanayang dai witing kaupak; kaunah witing nikingkauh yaklauna dawak kulnin dutni kidika yaklauwi kalduwi kiuna dai.

¹⁸Witing kulnin lani kidika talnayang dai, kaunah witing muihni nuhni kidika yamni kalyamtik dawak kalating wingnita puhwarang, dawak isninglak kidika aitani kat kalaki. Kulninna bukna kidika yang lawik walanina āki,

¹⁹dawak witingna bitik yakat diyulki: ‘¡Kulnin aslah lani pa naikau bang kidika balna yakat dawak kulnin aslah lani yaihnitkau bangkidika yakat bik! ¡Yang tawanki kidika sikninis kaupak yamni kalyamki!’

²⁰Kaunah muih dudutni balna kidika laih sihm kuma lalamwa kapat ki, sip lunglakwaski, dawak lalamwa balna kidika wasmak dawak di maisihni manah yakwi.

²¹Muih dudutni balna niningna yakat laih di yamni as bik diski.” Papang yaklauwi kaput yulna.