Read Mayangna Isaías 58 Bible Online

Isaías 58 - Mayangna bible

Isaías 58

¹Dawan yaklauwi yayulna: “Yamadutas parasni sarahtah, trumpit kapat parasni yulta; tawanki dutni yamna kidika biltah, Jacob tawanni yakat dutni yamna kidika yulni.

²Ma bitik yakat yawawalwi, dawak isningnalak ki taki kidika amanglawi, tawan as kat yamni yamyang kapat, dawak la balna kidika dinitkahwas kapat; la barangni kidika yayuyulwi; dawak isningnalak yang yaihkit akat aiwi,

³dawak kaput kaunah yuyulwi: ‘¿Ais yamdi di kasdas yuh daudarang yah, Papang maitalwas kidika? ¿Ais yamdi yuh wauhdarang yah, Papang talwas kidika?’ Di kaswas yuh wauhnin mani kidika manna laih lalah waltamana, dawak warkmana yamyang balna yakat taihtamana dimaltamana;

⁴di kaswas atnin mani kidika manna laih kalbilta kalbautamana, tingmana kau kalbautamana. Di kaswas atnin mani kidika kaput yamdakat, di as bik yamdas ki manna mamatna yultamana kidika dakanik.

⁵¿Yang yuh wauhnin yamni talayang kidika kulnik bukwa yulni kultamanah, sihm junco tunani abukwa kapat dawak kalangwakat asna dutni kau kalsurumhwa kidika wan minit yakat? ¿Manna kidika kuduh yultamana ‘dikaswas’, dawak ‘Dawan yamni talwa mani’?

⁶Kaput awaski. Di kaswas yuh wauhwa mani dukih yawa kidika laih aput ki: la kat awas sīnni kidika dakta, dawak arangni kau sitwi suruna kidika uluhnin; taihna muihni balna kidika uluhta damuktah, dawak witni kat taihnin lani kidika bitik data;

⁷kasnam dini balna kidika yuhdadauwa balna karak kalpakta kastanauh; dawak ūni dis muihni kidika ūma yakat kalatang kawang; dawak asna dis kidika kalata, wanaihma ilp kalataman kidika dawinih.

⁸Kaput laih awasma kidika yaringni duna karang sihm ma payahlawa kapat. Dawak muihma kau dakna balna kidika sirihni yamlana karang. Man barangni man kidika tamat yakat kiuna karang, dawak yang alaskina kidika mauiwi kiuna karang.

⁹Kaput karang laih, man yayulma kat nangmatlaki; sarahta ilp yulma kat nangmatlatik mayulki: ‘Akat sakyang.’ Taihnin lani kidika bitik datang diswarang kat, muih ustas dawak dangnitkauh daukaltas awama kat,

¹⁰kaput bik yuh dauwa muihni yakat ilp kalama, dukih kalawak kulnin bukna yakat ilp kalama kat, man yaringni dutaman kidika puksani yakat yaringni duna karang, kaput bik laih man wayama likkidika madah yaringni kidika witing karang.

¹¹Yang tāmatuna āwik maduyawaki, kauhmak wanilang yakat kasnam manas maki, man muihma nuhni parasni maki, dawak dipulu dahna pāni kau was atuhna kapat awama, was tuna burhwa kau buhlakwas kapat awama.

¹²Mana tawanma kidika yaklauwi daukalna balna kidika laihwi dulauwi yamna karang, rahni balna āna kaupak kurih andat bayakna kidika parasni kalana karang. Tawanma kidika kalyuyulna karang ‘daklana balna bukna kidika yamyang muihni’, ‘ū daukakalna balna yamyang’.

¹³“Kultah yak-urupdinin mani kidika;[81], yang maki maisihni dis kidika yakat man lalah walwinih. Adika mani man kulta, alasna mani as ki, Papang mani maisihni dis as dawak nuhni kulnin ki; kidika yakat ayangni nuhni yamta man warkma balna yakat yamwinih, dawak bik dukih man yakat kulta lalah walwinih.

¹⁴Man kidika yamma kat, yang yakat alasna kidika yakma, dawak yang lawik minit bayakna kidika tawan minit yakat maduyawaki, dawak papangma Jacob dini balna dai kidika duta alasma.” Dawan witing palni yaklauwi yulna.