Read Mayangna Isaías 59 Bible Online

Isaías 59 - Mayangna bible

Isaías 59

¹Papang parasni kidika kuihwas dawas ki, mailaihwi yaknin sip awas kapat, dawak bik witing kidika tapani pukni kalwas ki, yuldak dakawas atnin.

²Kaunah manna dutni yamnamana yulni daklana as dulauna mana manna dawak Papang karak; manna dutni yamnamana yulni witing muhni putwi dawak dakakih kalawas ki.

³Manna tingmana kidika ā manah kahna, dawak tingmana bikis kidika di dutni manah yamna; kungmanamak kidika alas manah yulwi, dawak tumana kaupak dutni kidika kalahwi.

⁴Muih as bik yul yamni kidika yulwas ki, dawak la barangni kat bik uiwas ki. Alas yakauh rahm kukulwi dawak yul rahm-awas balna kidika bik; di dutni manah dibahngilna, bahang batahnwi yayakwa kidika laih di dutni manah ki.

⁵Bil sumani kidika sahnin pāni yakat ahawi, dawak supai bani kau supai uni yamwa kapat yayamwi; dawak wais kidika sumani kaswa kidika dauwi, dawak atakwi lababanwakat bil puisin duwa kidika kalalahwi.

⁶Supai bani kau sip prak bibiwaski; witingna yayamwa kidika kau muih as bik sip prak kāwaski. Witingna yayamwa kidika laih daunin dini manah ki: witingna tingnina yamwa kidika laih kalbaunin manah ki,

⁷dawak kalnina kidika laih dutni kidika yakat kiri uiwi, kaput laih muih di dutni yamwas kidika āni utuhna atnin. Witingna kulninna kidika laih īnin yakat manah kukulwi, witingna bayakwi uiwa tanipas kidika daukalwi bayakwi uiwi.

⁸Kulnin aslah tani kidika tatalwas ki, witingna yayamwa kidika barangni as bik diski. Witingna tanina kidika laih awaihni manah ki; kidika tani munah uiwa muihni balna kidika kulnin aslah sip yayakwas ki.

⁹Kidika bahang laihwi yaknin kidika naikau kiuna mayang kaupak, dawak bik laihwi yaknin kidika sip mayaihkit yakat kaiwas ki; yaringni tahanamayang kaunah puksani kaina; ahni dawak talnin kulnamayang kaunah puksani yakat mayang.

¹⁰Matingki kau laihdi dakadi mawi, sihm muih minikpa dis kat salapwi dakawi kiwa kapat, mayang adika mamikpa dis kapat; madah matunak kat makalki baudi bukdi sihm pukta kapat; mamuihki yamniki kaunah daunamayang kapat ki.

¹¹Mayang bitik dangkatakalbas yulwa kapat yuldi, dawak bik buhtuku yulwa kapat bik yuldi; laihwi yaknin kidika tahadi kaunah sip kaiwas ki; kaput bik laihwi yaknin kidika tahadi kaunah naikau ki.

¹²Yangna man yakat uba mausnayangna, bahang silp yangna dutkina kidika yaklauwi lāih yanayakwi; yangna dutni yamnayangna kidika muhkina yakat sakki bahang dutni yamnayangna kidika amanglatayangna.

¹³Kulnikna dutni dawak barangni bik awasyangna dai Dawan yakat, Mapapangki yakat usnit uikih yanawas dai, yulbaunayangna kalbaunin lani dawak malni kau dutni yamnin lani manah, kaput bik laih muih ūk balna yakat alas diyulnikna kidika yul bautik talnayangna dai.

¹⁴La barangni kidika dauh kulna dai, dawak bik barangni atnin kidika naikau dai, alas yulwas barangni atnin lani kidika muih kalududuhwa pāni yakat sau kat bukna dai, dutni yamwas atnin lani kidika bik sip kaiwaski.

¹⁵Alas yulwas barangni atnin kidika laih disna, dawakat dutni kaupak dawi yaklawa muihni yakat dini mamalna. Dawan kulnin daukalna witing talwak la barangni dis kat.

¹⁶Dawan laih taldas dini kapat kidika talwa dai muih as bik adika dini barangni ānin sip-awas kidika; kaput laih witing alas parasni kau yamwadai, dawak witing yaklauwi minit bayakna.

¹⁷Minit bayaknin kidika kāwa dai ayan prakni kapat, dawak laihwi yaknin kidika kāwadai sihm tun'paknin dadasni kapat, dawak biriwi yamnin kidika prak naini kapat kāwadai, kaput bik laih kulnin daukalna kidika asna nuhni kau kalwadatwa kapat kalwadatna dai.

¹⁸Dawan yaklauwi witingna minitna kidika kat diawarang; waihnila balna yakat wah diawarang. Angdika muihni balna dutni kalkukulwa muihni balna yakat minitna lauwi diawarang duninna praisni kat; kuma paskau muih yalalahwa balna yakat bik.

¹⁹Muih bitik, ma kilwa kaupak ma kāwa kat, Dawan yakat nuhni kalkukulwarang witing king kidika, kat witing laih sihm was bang'ilwa kapat kaiwarang bahang wing parasni wauhwak.

²⁰Kaiwarang, Sayan laihwi yakyang kapat, dawak bik Jacob sulani balna bitik laihwi yakyang yakat bik, bahang dutmana kaupak data kulnamna wirlatanauh. Dawan kaput yulwi.

²¹Dawan yulwi: “Manna karak pramis yamtayang, dawak yultayang yakat bik yamnik kultayang paraski mananayang dawak manasumalnayang kidika manna kaupak sip dawi yaklawas karang, sulamana kau bik ban tanit yakat kaput kiwarang sarandis.”