Read Mayangna Isaías 6 Bible Online

Isaías 6 - Mayangna bible

Isaías 6

¹King Uzías dauna kurihni yakat, yang talnayang Dawan kidika trun as maluihni kat yalahna sakkat; witing prakni sutni kidika makat yulnin ūni bung danadai.

²Muih kuhpau kapapat witing minit yakat dai. Kidika balna lawanina tiaskauas duduwa dai. Bahang lawanina bu kidika muhnina mumukwadai, dawak lawanina ūk bu kidika laih muihnina saukauh yakat mumukwadai, dawakat ūk bu kidika kau yaklalauwadai.

³Dawakat biri biri yuyulwadai: “Holi, holi, holi Papang parasni nuhni duwi; sau bitik yakat witing alasnina banghna ki.”

⁴Adika yulni parasni yulwak, makat yulnin uni dūrni kidika yukna dai, dawakat kidika pasyakat wayau manah bahngna dai.

⁵Dawak kulnayang: “¡Alakaih, yang dauki ki! Yang mikpa kau king talikda; Dawan parasni nuhni duwa kidika, yang muih al as dutni yultayang kidika dawak bik muih dutni yamyang balna pasyakat yalahdayang kidika.”

⁶Kidika minitni yakat, di as kuhpau kapat dai kidika yang niking yakat kiuna. Di itisnin dini kau kuh tuturni sakripais busnin pāni minitkau bangdai kidika kaupak laihwi dukiuna,

⁷dawak kidika kau tikpas yakat lakwi yayulna: “Talah adika kuh tuturni man kungmamak yakat lakna. Dutma dai kidika bitik uswi yakna, kaput bik dawak disna.”

⁸Kaput laih Dawan yulwak dakanayang aput: “¿Wais yakat sihkiyah? ¿Wais kidika yang mayulki duwi kiwarangyah?” Yang nangnitlanayang: “Akat yang sakyang, yasihtah.”

⁹Dawak witing yayulna: “Yawa adika muihni balna yakat diyulta adika yulni: ‘Wat wat dakakawarang bik amanglalawas karang; dawak tatalwarang bik amanglalawas karang.’

¹⁰Adika muihni balna kulninna dutni kalna bahang di amanglalawas ki; tapanina dawak miniknapa bik puttah, witingna di dakawas dawak talwas bik atnin kaput laih witingna amanglalawas karang, kaput laih yang akat nawatwi aiwas karang witingna sikninanis kaupak yamni diyamnik.”

¹¹Yang kalyultik dakanayang: “¿Dawan adika dini nayasni ampus bayakwarang yah?” Dawak witing nangkitlana: “Tawan nunuhni balna bitik daukalwarang kat dawak muih balna as bik dis dawarang kat; kaput bik laih ū balna yakat muih disdawarang kat, dawak pa balna kauhmak wanilang manah kalwarang kat,

¹²dawak Dawan yaklauwi yamwakat muih balna bitik pa ūk kau duwi uiwarang witingna saunina kidika panimanah kalwarang.

¹³Muih balna kidika sahyakna salap wawatwarang kat, kidika balna bitik dadauwarang, sihm pan as dadakwak saran manah watwa kapat.” (Kaunah kidika panani saran yakaupak ukuswi kalahwarang holi as.)[8]