Read Mayangna Isaías 60 Bible Online

Isaías 60 - Mayangna bible

Isaías 60

¹Lawah, Jerusalén, yaringni karak kaldiwitta, kat yaringni dunam dai kidika uman kaiwi kana, dawak Dawan yaringni bik man mamatyakat ki.

²Puksani kidika laih sau kidika mukwi lakna, puksani kidika muih balna yakat mukwi lakna, kaunah Dawan laih man mamat yakat yaringwarang, dawak witing alasnina nuhni kidika man yakat kaiwi kalahna karang.

³Sau muihni balna kidika man yaringma yakat aina karang, dawak king balna kidika man mama payahlawa yakat aina karang.

⁴Mamakpa dulauta, yaihmat awaih yakat talah: witingna bitik kaluduhwi man yakat aiwi. Man walamabis balna kidika naikaupak aiwarang; dawak walamabis yayal balna kidika laih tingnina kau laihwi dulauwi duwi aiwarang.

⁵Man, talmakat, alasna yaringni karak awama, man ismang kidika alasna manah bung dana karang; kuma paskau muihni balna ritsnina kidika man yakat duahaina karang, dawak kaput bik sau muihni balna ritsnina bik duwi aiwi mamana karang.

⁶Kar dawak kiamil manah ma-awaihdak dadana karang, bahang kidika balna laih Madián kaupak dawak Efa kaupak bik aiwarang; Sabá muihni balna kidika bitik gol trukwi aiwarang dawak busnin walapni bik, dawak yuyulna karang Dawan di yamni yamna kidika yulni.

⁷Cedar sīpni balna bitik laih man dīma karang; dawak Nebaiot sīpni ahalmuk balna kidika laih man tingma yakat karang Dawan sakripais buswa pāni yakat ilta sakripais walapni as busnam witing yakat, dawakat witing ūni kidika tanit yaksihni yamna karang.

⁸¿Wais balna yah, mukus kapat yaklalauwa kidika, dawak sihm buhtuku ūnina kau uiwa kapat ahawa kidika?

⁹Kidika laih kuma kuring aslah uduhni aiwi, Tarsis kumani kuring balna kidika tatuna aiwi, pa naikaupak walamabis balna kidika duwi aiwi, lalahnina dawak golnina karak duwi aiwi, man Papangma Dawan ayangni nuhni kau, Israel Papangni holi kidika, bahang witing yaklauwi nuhni mayamna kidika.

¹⁰Muih taldas pa ūk muihni balna yaklauwi daklana balna kidika yamwi mamawarang, dawak kingni balna kidika dīma yayamwarang; Dawan kulnin daukalwi wah mana dai karang bik, kaunah waralaih witing minikun talnin duwa kidika kau mamakun matalna.

¹¹Dūrma balna kidika apahna ban kaput karang; madah dawak pukta bik putwas karang, kaput laih sau muihni balna ritsnina kidika man yakat duwi aina karang, dawak king balna kidika tunan muihni balna karak aiwi kakana karang.

¹²Angdika sauni muihni balna man yakat dima yayamwas karang kat dadauna karang; kidika sauni pīsni bitik laih dauna karang.

¹³Dawan yaklauwi Jerusalén yakat yulwi: “Líbano ritsni balna kidika man yakat kaina karang: awas, abetos, ciprés kidika laih ūki kidika baisa yaksinh yamnin yulni, yang kalki ataktayang kidika alasnina duna atnin yulni.

¹⁴Matataihna walaninabis balna kidika man yakat aiwi bubukna karang, dawak dutni matatalwa balna dai kidika man kalma yakat aiwi limbabahna karang dawak mayuyulwarang ‘Dawan tawanni nuhni’, ‘Papang Sayanni, dawak Israel holi duwa kidika’.

¹⁵Baisa maruhmwi dawi, dutni matalwi alas madana awaskarang, nawatkauh laih yang lawik alasmana kidika mana awaki ban kaput atnin yakat, ban kaput alasna atnin yakat.

¹⁶Sau muihni balna kidika mamana karang kasnin tanit yamni kidika, dawak king balna kidika laih ritsnina duwi aiwi mamana karang; kaput laih amanglama yang adika Dawan yang, man malaihwi yakyang, yang kuduh Jacob parasni nuhni yang kidika, yang malaihtik yakyang yang.

¹⁷“Bras manin pāni yakat gol kat maki, ayan manin dai pāni yakat lalah maki, pan manin pāni yakat maki bras, kipala manin dai yakat ayan kat maki. Yamtingkat kulnin aslah lani kidika tāmatuna karang, dawak barangni atnin lani kidika tunama kana karang.

¹⁸Man sauma yakat baisa dakakawas karang kalbaunin lani kidika, kaput bik daukalnin lani bik diskarang man sauma yakat, nawatkauh laih daklana yakat kalyulma ‘Laihwi yakyang’ dawak dūrma balna yakat laih ‘Ayangni nuhni yamyang’.

¹⁹“Baisa dukih mawas karang madah yakat ma daihni kidika yaringni manin, dawak waiku kidika bik pukta yakat yaringni manin, kat yang Dawan yang adika, yaringni makiki ban kaput atnin yakat; yang Papangyang, man yaringma awaki.

²⁰Man mama kidika baisa yakmaldas karang, dawak waimaku kidika yaringni diswas karang, kat yang Dawan yang adika, man yaringma ban kaput awaki bahang; ma balna kaiwak kulnam bukwak sīk tamandai kidika dahnkalna karang.

²¹“Man tawanma balna bitik kidika muih yayamni manah karang, man pāma kidika witingna dinina karang ban kaput atnin yakat, yang pan as dahnayang dai kidika ukuswi kalahna, yang tingki warkni yamnayang dai kidika, kaput laih alaskina lāih yakna atnin.

²²Tingkurus bung adika sahwi mahna karang tausin; adika bubin ki kaunah muih mahni kalna karang. Yang laih Dawan yang, yang lawik kalating kat sirihni kalna karang, mani balna kaiwi kawakat.”