Read Mayangna Isaías 61 Bible Online

Isaías 61 - Mayangna bible

Isaías 61

¹Papang piritni kidika yang mikityakat sakki, kat Dawan yaklauwi witing dini yayakna bahang; yasihna yul yamni wisam kidika muih miniknakunni balna yakat diana atnin, kulninna bukna balna yakat yamni diyamnin, dawak isningna paknin silak muihni balna yakat dilaihwi yaknin kidika, dawak silak ūnikau bangkidika balna bik dilaihwi yakna atnin;

²Dawan kurihni yamni kidika isningna pakna atnin, kidika mani kuduh Papang yaklauwi mawaihkila balna yakat biriwi diyamwarang kidika. Yasihna kulninna bukna balna bitik walanina āna atnin,

³Sayan kau kulninna bukna balna yakat dianin kraunnina as, tunanina wan uhuhwa pāni yakat, kakaida pāni yakat walapni alasna diana atnin, isningna abahlwa pāni yakat unbaunin alasna as dianin. Diyuyulna karang “disawa panani minit bayakna”, Papang yaklauwi dahna witing alasnina kidika niningnakana atnin.

⁴Daukalna balna dai kidika watwi laihwi dulauwi yamna karang, ū nunuhni daukalna balna nai dai kidika watwi laihwi dulauwi yamna karang, dawak kaput bik tawan nunuhni balna daukakalna dai kidika watwi laihwi yayamna karang.

⁵Pa ūk kaupak muih taldas balna kidika maintatalwarang tinglau balna kidika, sau balna kidika dawak manna wainmana yamak balna kidika bik.

⁶Man kidika manayuyulwarang Dawan sumalniyang balna, Papang dini yamyang balna. Sau ūk dini yayamni balna kidika manna duta alastanama, dawak kidika dini balna kau yaksinh kalyamtanama yamtanama.

⁷Yang tawanki kidika dalani wauhnin dai bahang risnipik dis kidika watbu lamwi lakwi, dawak dutni kalyulnin lani bik, kaput bahang kidika sauni yakat dini yayamni balna kidika watbu lamwi duna karang, dawak witing alasnina kidika laih ban kaput atnin yakat karang.

⁸Kat Dawan laih la barangni kidika dalani talwa bahang, dawak di malnin kaput bik īnin lani[82] kidika dutni talwi. Witing yaklauwi minitna kidika kat diana karang dawakat witingna karak pramis as yamna karang ban kaput atnin.

⁹Sulani balna kidika muih nunuhni kukulna karang muih balna pasyakat; muih bitik tatalwarang kidika amanglalawarang tawan as Dawan yaklauwi blisin diana kidika.

¹⁰¡Amput alasna dutayang Dawan yakat! Papangki kaupak alasna manah yabahngwi, kat witing yaklauwi yalaihwi yakna bahang, ¡minit bayaknin kidika yamukwi lakna! Yang laih yal sirau as kraunni pakwa kapat marid kalahnin kat, kidika awas bik sirau al duwarang kidika alahnin dini yayamni balna kau kalyamwa kapat.

¹¹Kaput sau akat pan ukuswa kidika, dawak dipulu dadahwa pāni yakat dipulu balna kidika sulani kalahwa kaput, Dawan yaklauwi minit bayaknin kidika kalawak kalahna karang, dawak sau muihni balna bitik unbabauna ayangni nuhni yamwi.