Read Mayangna Isaías 62 Bible Online

Isaías 62 - Mayangna bible

Isaías 62

¹Sayan man yakat dalani matalayang kidika yulni ap datas awaki; Jerusalén man yakat dalani matalayang kidika yulni yak-urupdas awaki, man minit bayaknam kidika yaringni yakwarang kat sihm payahlawa kapat, dawak malaihwi yaknin kidika sihm awas dahlwa kapat dahlwarang kat.

²Muih balna kidika man malaihwi yakna kidika tatalna karang, dawak sau kingni balna bitik alasmana kidika tatalna karang. Kaput dawak laih ayangma wisam as duma kidika laih Dawan yaklauwi mawarang ki.

³Man laih king kraunni nuhni yaksinh as awama man Papangma Dawan tingni yakat.

⁴Watwi mayuyulwas karang “Maruhmwi dana”, dawak bik sauma yakat kalyuyulwas karang “Daukalpamna”, kaunah man ayangma kidika laih “Yang tanit dukih yawa kidika”, dawak sauma kidika laih, “Yang yalki”. Kat man kuduh Dawan dini palni man, dawak witing kidika laih marid al as kapat karang man sauma yakat.

⁵Kaput wahma as yal sirau karak kalduduwa kapat, Papang yaklauwi maduna karang, watwi malaihwi madulauwi mayamna karang[83] dawak man karak isninglak karang, sihm marid al alasna kapat yalni karak.

⁶Jerusalén, madaklana minit yakat maintalnin kidika ānayang pukta madah yakat yulwas atnin laih awaski: “Ap dadawinih Dawan kau yultamana kidika,

⁷datanangkat yak-urupdinin awaski Jerusalén kidika watwi laihwi dulauwi yayamwarang kat, dawak yamwakat sau muihni balna bitik ayangni nuhni yayamwarang kat.”

⁸Dawan witing ayangni kau yakwi yulna, tingni palni parasni nuhni duwa kidika dulauwi: “Wattik datingkat man waihmala balna kidika plamawar minik kakaswas karang ki, dawak sau ūk muihni balna kidika bik wainma didiwas karang man wark alahwa yamnaman kidika;

⁹manna lawa di minik balna kidika bahta kastanama dawak ayangki nuhni yamtanama; wain minik balna kidika uduhta wain wasni yamta ditanama, yang ūki watakni yakat.”

¹⁰Alahwanauh, alahwanauh dūr munah, yang tawanki kidika tani barangni yamtanauh. Ta balna kidika yamni yamtanauh, kipala balna kidika bitik latanauh; sainni kidika dulauta sau muih balna yakat diyultanang aiwang.

¹¹Dawan yaklauwi adika isningpakwi sau sutni kat: “Sayan tawanni nuhni yakat kalyultanauh, witing yakat laihwi yaknin kidika uman kiwi kāna. Dawan witing tawanni kidika duwi kaiwi, laihwi yakna usnit kat.”

¹²Israel balna yakat diyuyulwarang “Tawan maisihnidis”, “Dawan yaklauwi laihwi yakna balna”, Jerusalén yakat laih kalyuyulwarang “Tawan nuhni yaksinh dukih kalawa”, “Tawan nuhni as ruhmwi dawas kidika”.