Read Mayangna Isaías 65 Bible Online

Isaías 65 - Mayangna bible

Isaías 65

¹Dawan yulwi: “Yang akat di as bik dunin yāyuyulwas dai kidika balna kuduh yang akat aina kidika; yang akat yawawalwas balna dai kidika kuduh yayayakna. Tawan as yang kau yayulwas dai kidika yayulna ‘Akat sakyang.’

²Mapiris kaupak masan kat tingki dulautik yunayang tawan as dutni kidika duaina atnin yulni, ta dutni yakat kiwa kidika yulni, witing alas kulnin lani kat yamwi kiwa kidika;

³tawan as yang muhki palni yakat yauswa kidika nining; dawan dauh yakat sakripais buswa dai kidika dipulu dahna pāni yakat, dawak walapni buswa kidika busnin pāni yakat ilwi;

⁴sau ū walsah yakat yalahwa dai kidika, dawak bik pukta payahwa dai kidika yakmaldi; dawak kusih muihni bik kaswa dai kidika, subani pasyakat wasni manah bung duwa dai kidika dutni dini kidika.

⁵Yuyulwi: ‘Akat watta sak-awah, dawak yalaihwinih; yang laih uba maisihni dis palni yang bahang yalaihnam sip-awaski.’ Kidika muihni balna laih sihm kuhpau mapiris kaupak masan kat dahlwa kapat ki; sihm wayau nangkitak yakat kawi dutni yayamwa kapat ki.

⁶Kidika bitik laih yang muhki yakat ulna sakki, datik kalwakuih laih sak- awas awaki; yang lawik minit kidika kalaki.

⁷Witingna muih ihina minit dawak papangnina balna yayamna kidika bitik libittik diaki minitna. Witingna kidika asang balna yakat walapni bubuswa dai, kaput yamwi, dawak asang ubulni binina yakat kilwi yauhuswa dai. Minitna dunin kidika kultik yakki dawak lautik diaki duninna praisni kat.” Dawan yaklauwi yulwi.

⁸Dawan yulwi: “Wain minik kidika kasak wasni duwa kat muih balna laih dadawak dauh diswas ki, kat kidika kaupak wain wasni manas yaknin sip bahang. Yang bik kaput yamki yang diki yamyang balna yakat dalani talayang bahang: muih balna bitik laih dismuktas awaki.

⁹Yamtingkat Jacob kidika sulani duwarang, dawak Judá yakat muih bangkarang yang asangki yakat muih yalahna atnin yulni. Yang waltik yaknayang muihni balna kidika sau duduna karang, yang diki yamyang balna kidika yakat yalalahna karang.

¹⁰Sarón langni yakat tinglau balna manah bahngna karang, dawakat Acor langni yakat turuh dibasta kakaswarang, bahang tawan yangkau yawawalwa balna kidika duduna karang.

¹¹Kaunah manna Dawan kaupak naikau lāwamana kidika, dawak yang asangni maisihnidis kidika damatnakahwa kidika, bahang kidika pāni laih wain, kasnin dini yakwi kalawa kidika Gad dawak Mení di duyang daniwan dauh balna yakat,

¹²di minit nuhni dutni tahahawi: diatingkat isparah baini kau dadauwarang. Yang lawik manayulnayang kaunah nangkitlatas mana dai bahang; yul manabauting kat yadakasmana dai bahang; yang yultasyang dini balna dai kidika yamnamana bahang, manna laihta dunamana dutni talayang dini kidika.”

¹³Kidika bahang Dawan yulwi: “Yang diki yamyang balna kidika laih kasninna duduwarang ki, kaunah manna laih yuhdautanama; witingna laih dinin kidika duduwarang, kaunah manna laih dikih manawak wauhtanama; witingna alasna duduwarang, kaunah manna laih namangnakakarana karang;

¹⁴witingna alasna unbabauna karang isningna alasna duduwa kidika yulni, kaunah manna laih sarahta aidanama, kulnamna bukna kidika yulni.

¹⁵Yang waltik yaknayangna muihni balna kidika ayangmana duduna karang dutni diyuyulna atnin dawak dadauwak talkih diawa kidika diyuyulna karang ūk balna yakat, kaunah yang diki yamyang balna kidika laih ayangnina ūk diaki.

¹⁶Angdika, pāni kidika kaupak blisin as yulwarang kat kidika laih Papang as barangni yakat kalyulna karang; dawak angdika muihni, sauni sakkidika kaupak pramis as yamwarangkat, kidika laih Papang barangni kidika kau yakwi yulna karang. Kulnin bukna balna dai kidika laih dawak dinitkahna karang, dawak mikpa kaupak disna.

¹⁷“Talnauh, yang lawik makau kisang wisam dawak sau wisam as yamki ki. Di bayakna dini balna kidika laih dinitkahna karang, muih as bik laih isningkatwas karang kidika dini.

¹⁸Manabahngwang alasna kidika ban kaput atnin, yang yamki kidika yulni, kat yamkiki Jerusalén alasna as, dawak tawan as isninglak kidika yakat yalahna atnin yulni.

¹⁹Yang kat bik Jerusalén yulni alasna duki, alasna awaki tawanki yulni. Kidika yakat watwi kaidinin dakadas karang, kaidi sarahwak dakadas karang.

²⁰Kidika yakat laih muih bin as mani parahni dauwas karang, dawak muih barak as sangnika bitik duwas laih dauwas karang. Kurih andat as laihwi dauwa kidika uba wahma dauwarang, dawak kurih andat laihwas dauwa kidika laih witing yakat la tuhna karang.

²¹Muih balna kidika ūnina yamwi dawak kidika yakat yalalahwarang, wainnina yamak dadahwarang dawak kidika minik kakaswarang.

²²Aput kalahwas karang, muih as yamwakat ūk kidika yakat kawi yalahna atnin, kidika awaskat muih as dahwak, ūk kidika yakaupak duna atnin. Yang tawanki kidika sangnika naini karang, sihm pan as kapat; yang waltik yaknayang balna kidika tingnina warkni kidika kau yamni duduwarang.

²³Wark dauh laih yayamwas karang, dawak walaninabis balna kidika mani kaiwi kawas kat dadauwas karang, kat kidika balna laih sulani as Dawan yaklauwi blisin kalana bahang, dawak sulanina balna kaiwarang kidika sihm kaput karang.

²⁴Witingna yaklauwi yang akat yāyuyulwas tanitkauh, yang lawik nangnitnalaki; baisa yulbauwi dadawaskat, yang didakana awaki.

²⁵Nawah pauni dawi sīp kidika karak albu dikakaswarang, dawak layan kidika dibasta kaswarang sihm turuh kapat, dawak bil kidika laih sau kaswarang. Yang asangki maisihnidis kidika yakat muih as bik diskarang dutni yamna atnin.” Dawan kaput yulna.