Read Mayangna Isaías 66 Bible Online

Isaías 66 - Mayangna bible

Isaías 66

¹Dawan yulwi: “Makau kisang kidika laih yang tronki dawak sau kidika laih yang kalki ataknik pāni. ¿Angkat sipyah yang ūki as yamwi yanin? ¿Angkat sipyah urupdinik pāni as yamwi yanin?

²¡Yang yamnayang adika dini balna bitik, bahang kaput laih kakalna! Yang Dawan yang kat yultayang. “Al as yang talayang kidika laih minikunni dawak kulnin bukna kidika yakat talayang, witing yang yulki yakat kulwa muihni kidika.

³Kaunah muih buas kat turuh almuk kau sakripais yayamwi, dawak muih as bik ihiwi; sīp dinimak dadakwi, dawakat sul bik arangnipana yakat wiswi babahwi; plawar minik duwi aiwi, dawak kusih āni bik duwi aiwi; walapni bubuswi, kaput bik dawan dauh yakat minitna yuyulwi. Kidika muihni balna makat yulnin dutni yakat lalaihna kidika, dukih diawi kaput yamna atnin.

⁴Yang bik walyaktik duna awaki witingna dinina, panis wauhnin dini kidika, yang duaina awaki witingna yamaduduwa dini kidika. Kat diyulnayang kaunah as bik nangkitlawas dai bahang, yulbaunayang kaunah as bik yadakawasdai; yang yultasyang dai dini kidika witingna yayamna, yang dutni talayang dai kidika witingna laihwi duduna.”

⁵Dawan yulni adika dakanauh, manna witing yulni yakat kultamana kidika: “Manna kaupak aslah mana kidika buas yakat dutni dikukulwi, laihdang atwi uiwi kat yang ayangki kau yakwi aput yuyulwa bahang: ‘Dawan alasnina kidika lāih yakwang; talkih mayawi alasna.’ Kaunah witingna yakat niningna kakarana karang.

⁶Di parasni yulwi kaiwa kidika tawan nuhni kidika kaupak, dawak di parasni yulwi kaiwa kidika makatyulnin uni kaupak, kidika laih Dawan yaklauwi minitna diawi waihnila balna yakat.

⁷“Sayan kidika walanibis as yakna sirihni, baisa walabis dunin dalani kidika kallaihwas tanitkauh.

⁸¿Wais kidika kapat ūk as yulwak dakanaman? ¿Wais di kapat ūk as talnayah? ¿Tawan mahni ma aslah yakat batanh dadawi? ¿Dawak, kaput bik tawan as kidika sirihni minit aslah batanh dawi? Kaunah Sayan kidika walabis dunin dalani kallaihwak dakana kat, mahka laih walanibis balna kidika yakna dai.

⁹¿Amput datik batanh dawa kidika laihwatnik daih, yang lawik kalatingkat walanibis yakwa kidika?” Man Papangma Dawan kidika yaklauwi kaput yulna.

¹⁰“Jerusalén karak alasna dutanauh, alasna dutanauh witing yakat dalani talamana kidika; witing alasna duwa kidika yakat yawa aslah kalpaktanauh, manna bitik aidanamana kidika witing yulni;

¹¹dawak witing kidika nanang kapat manabayahna karang walamana-āwi, manabuhng dana karang.

¹²Kat yang Dawan yang kat yultayang: Yang lawik yamtingkat kulnin aslah lani kidika witing minit yakat kaina karang, sihm was murwa kapat, dawak sau balna ritsnina kidika laih was banghilwi murwi kaiwa kapat karang. Witing yaklauwi manna yakat manabayahna karang, tingni yakat manadulauwi manaduwi kiuna karang, barahnimak minit yakat manailwi manasalapna karang.

¹³Nanang as walanibis kau walaniāwa kapat, yang kaput manna yakat walamana āki, dawak Jerusalén yakat walamana ānin kidika yaktanama.”

¹⁴Manna adika talnama kat, ismangna kidika alasna kalwarang; muihmana nuhni kidika wisam kalna karang sihm dibasta kapat. Dawan parasni, kidika kalawak talna karang dini yamyang balna yakat, dawak kulnin daukalna kidika laih waihnila balna yakat niningna kāna karang.

¹⁵Kat Dawan laih kuhpau pasmunah kiwi, kārni balna kidika laih wing kapatki; witing kulnin daukalna daihni kidika ruhmlakna karang, witing wah as duaiwa kidika, dahlwa daihni.

¹⁶Agha, Dawan laih kuhpau kau la yamwarang, muih bitik yakat lanina yamwarang isparah kau, dawak manas yamwak dadauna karang.

¹⁷Dawan yaklau aput yulwi: “Dawan dauh yakat prinias yamwi, muihnina kidika yakat kalalawa kidika, dipulu dahna pāni yakat, papus kau kiwa yakat usnit uiwi uiwa kidika, kutsi muihni dawak matis muihni bik kakaswa kidika, kidika awaskat dimuihni ūk dutni kulna balna yakat kakaswa kidika balna laih wat aslah dahn yamna karang, kat yang talayang witingna kulninna lani kidika dawak bik yayamwa kidika bik. “Kaput dawak aiwaki[86] sau muihni balna bitik uduhna, dawak aiwi yang alaskina kidika tatalna karang.

¹⁹Yang lawik sain as kalaki: datingkat as as kiri yaklalawarang, dawak sihna awaki sau nunuhni balna yakat, Tarsis yakat, Libia[87] yakat, Lidia yakat, sauni muihni balna sibang ruhmwi lan balna yakat, Tubal dawak Grecia, dawak kaput bik kuma paskau muihni balna yakat bik, kidika balna laih wat as bik yang yulki kidika dakakawaski, dawak alaskina bik tatalwas ki; witingna yaklauwi yang alaskina balna kidika muih balna yakat yuyulna karang.

²⁰Yayamwak muih balna bitik aina karang, manna pa aslah balna mana bitik, aras kau, muyul kau, kar kau, kiamil kau. Kidika laih minitdis kalanin dini as karang yang akat, Jerusalén yang asangki maisihni dis kidika yakat, sihm Israel balna minitdis dini duwi aiwa kapat sutak maisihni dis karak, makat yulnin uni yakat. Yang Dawan yang kat yultayang.

²¹“Kidika balna pasyakat as as waltik yakki sumalyang nuhni atnin dawak Libait atnin bik. Yang Dawan yang kat yultayang.”

²²Adika bik Dawan yulwi: “Makau kisang wisam dawak sau wisam kapat yamki kidika laih ban kaput atnin karang, dawak manna sulamana bik sihm kaput karang, dawak ayangmana bik.

²³Waiku bitik yakat, waiku wisam kalahwa mani yakat, kaput bik ma tiaskaubu pasyakat yakurupdinin mani[88] yakat, muih ahal bitik yang muhki akat aiwi limbabahwarang. Yang Dawan yang kat yultayang.

²⁴“Yang nikingkauh yaklauwi dadauna balna muihnina kidika aiwi tatalna karang muih ūk. Babil dikawak bik dadauwas karang, dawak dibuswa kuhnipau kidika bik piwas karang. ¡Muih bitik muhnina yakat dutni karang!”