Read Mayangna Isaías 7 Bible Online

Isaías 7 - Mayangna bible

Isaías 7

¹Siria kingni Rezín, dawak Israel kingni Peka, Remalías walanibis witing Jerusalén nining yakat kiwi kalbauna, dawak kawi dunin kulna kaunah sip awas dana dai. Adika dini kalahna dai Acaz Jotam walanibis, Uzías mani king dai kidika Judá sauni yakat.

²Kidika mani balna dai yakat adika yulni king Acaz wanaihni balna yakat diyulna dai: “Sirio balna kidika Efraín karak aslah kalalahna dai.” King dawak tawan muihni balna kidika diyukna sihm pan wing laihwa kapat.

³Kaput dawak Dawan yaklau Isaías yakat kalyulna: “Walamabis Sear-jasub[9] karak king Acaz yakat yawa kalpaktah was daklana tangtawa nining yakat, asna susuhwa pāni kau kiunin tāni yakat,

⁴dawakat kalyultah: ‘Amungtalah, kaunah muihsak-dauwinih; yamaduwinih dawak bapuh kalwinih kuh anansar bu dahlwa kidika yulni, Rezín dawak Sirio balna karak Remalías walanibis karak, kulninna daukalwi dahlwa rau kidika.

⁵Sirio balna dawakat Efraín muihni balna karak, Remalías walanibis al yakarak dutni yamnin kukulna. Bahang aput yuyulna:

⁶Judá yakat mawi bilninalaudang; mawi mahawi dudi Tabeel walanibis al kidika king adahng.

⁷Kaunah Dawan yulwi: ¡Kidika sip kaput kalahwas karang!

⁸Siria tawanni nuhni tunan kidika laih Damasco, dawak Rezín laih Damasco kingni; Efraín tawanni tunan nuhni kidika laih Samaria, dawak Remalías walanibis laih Samaria kingni; kaunah kurih 65 kat, Efraín kidika diskarang ki; dawak manna kidika rahm kulnin lani parasni dutas awanama kat, kalmana kau bik lawa ataktas awanama.’ ”

¹⁰Dawan yaklauwi aput bik kalyulna Acaz yakat:

¹¹“Man Papangma Dawan yakat kalyultang di taldas dini as yamwi namangkawang dawak kidika laih man yak sain as karang, sau dinit yakat bik kidik awas kat maluihni tanit maluihni yakat.”

¹²Acaz yaklauwi nangnitlana: “Dikah, yang Dawan yakat sain as kalyultik traini talas awaki.”

¹³Kaput dawakat Isaías yaklauwi kalyulna: “Manna dakanauh, Devid ūni kau bangmana kidika. ¿Di dauh kapat talamanah muih al kau usnin kidika, dawakat yang Papangki yakat usnin kultamana kidika?

¹⁴Dawan witing palni yaklauwi sain as manawarang: Wahma[10] kidika muih karuk ki bahang muih bin as duwarang ki, ayangni paknin karang Emanuel.[11],

¹⁵Muihbin kidika kurihni tatuna balna yakat witing kasna karang tāwas yaklakna dawakat amak karak.

¹⁶Kaunah muihbin kidika baisa di amanglawas tanit kau, sau bu kingni balna bilmalalauwa kidika diruhmwi dana karang.

¹⁷“Dawan yamwa kat man mamatyak kaiwarang, tawanma minityak kaiwarang dawakat king ūni minit yak bik kaiwarang, Efraín, Judá kaupak dakwi kalahna mani kaupak di aput as kalahwas kidika kalahna karang.” (Adika laih Siria kingni yak kalyulna.)

¹⁸Kidika mani balna Dawan yaklauwi yamwak aiwarang markisah kapat Egipto wasni naikau yalalahwa balna yak, dawak bik kalawak kaiwarang baba Asiria kau yalalahwa balna minitna yakat.

¹⁹Witingna bitik aiwi was binina pas yakat kawi panina duduwarang, dawak bik kipala sulihni yak kakawarang, damasni wakal manah pasyak kakawarang, kaput bik, turuh was didiwa pāni yakat bik.

²⁰Kidika mani Dawan yaklauwi yusyamwarang Asiria kingni yakat irisar as linkalahna kapat Éufrates wasni tanit yakau, dawak Israel balna tunanina kahrwarang, kungninabas bik, dawak muihnina bitik.

²¹Kidika mani muih as turuh yal as muhwarang dawak sīp bu muhwarang kat

²²taniwas mahni yakwarang bahang sipkarang taniwas kidika diwi dawak lakwi kaswarang. Kidika sauni yakat dutni balna kaiwa kidika dauwas yaklalawarang kat, witingna sip karang tāwas dinin, lakwi kasnin dawak amak bik diwarang.

²³Kidika mani, muhni lau wain yamak as kidika tausin wain pāni duwadai bahang minit kidika laih lalah dadasni tausin dai, bahang kidika pāni balna damasni wakal manah kalwarang.

²⁴Kidika pāni yakat sip karang sibangkau manah kawi di ina atnin, kat kidika sauni yakat laih damasni wakal manah kalwarang bahang.

²⁵Muhnilau yakat asang ububulni balna yakat tukwi di dadahwa dai, kaunah waralaih damasni wakal manah kalwarang muih as bik yakat kiwaskarang. Bahang kidika pāni yakat laih turuh dawak sīp balna manah dibasta kakaswarang.