Read Mayangna Isaías 8 Bible Online

Isaías 8 - Mayangna bible

Isaías 8

¹Dawan yaklauwi yayulna: “Tat nuhni as dudata kidika yakat ulta: ‘Maher-salal-hasbaz.’[12]

²Usnit kat sumalyang nuhni Urías dawakat Zacarías, Jeberequías walanibis kidika witmanis dutah.”

³Usnit kat yang yalki prapit yakarak payahtining kat muih karuk dana, bahang muihbin al as duna. Kaput laih Dawan yaklauwi yayulna: “Ayangni pakta aput Maher-salal-hasbaz.

⁴Muih bin kidika, papang, nanang yulwas tanit kauh, Damasco dawak Samaria kidika yakat kawi dinina mamalna karang dawakat bitik laih Asiria kingni yakat duwi uina karang, dini balna kidik.”

⁵Watwi Dawan yang akat yayulna:

⁶“Rezín dawak Remalías walanibis yakat, yamaduduwa bahang[13] Siloé wasni lung murwa kidika dauh kukulwi,

⁷Dawan yaklauwi kalawak wasni kidika pauna karang dauwak parasni kalna karang sihm Éufrates wasni kapat (yuldarang kat, Asiria kingni kidika parasni bitik). Bahang banghilwa kat murwa tani kaupak kalahwarang,

⁸Judá sauni kat kiuna karang was kidika banghilwi kaput bik dinimak kat kilna karang. Sihm uhubin as lawani dulauna kapat karang, dawakat mukna karang, Emanuel, man sauma kidika bitik.”

⁹Kaluduhtanauh,[14] muih bitik, kawak yamadutanauh; adika dakanauh, panaikau mana kidika: kalbaunin dini laihtanama bik yamadutanama; agha, kalbaunin dini laihtanama bik muihsak-dautanama.

¹⁰Di yamdangti kultanama bik dauh kalna karang; kat Dawan kidika yangna karak bahang.

¹¹Dawan yaklauwi tingki yak parasni laihwi yayulna kidika muihni balna tanina yakat yawinik awas. Yayulna:

¹²“Kalpakwi dutni yamnin atwa kidika manna bik kaput yuyulwinih. Muihsak-dadauwinih dawak bik yama duduwinih, witingna yamaduduwa kapat.

¹³Dawan parasni nuhni duwa kidika yakat holi kaldunin ki; witing yakat ki yamanidunin kidika; witing muhni yakat malawa kidika yakat yamadunin ki.

¹⁴Papang kidika laihnin dini malni kau awa kidika kapat karangki manna namangna yakat;[15] kipala karangki manna kalmana bauta buktanama kidika, bahang kidika yaklauwi yamwakat Israel kingni lani bu kidika bubukwarang; laihnin dini malni kau awa as kapat karang, kidika yakat Jerusalén muihni balna bubukwarang.

¹⁵Muih manas kalnina babauwarang dawak bubukwarang dawak dadauwarang; manas palni laihnin dini malni kau awa yakat bubukwarang bahang yakat laih wawatna karang.”

¹⁶Adika yulni balna yamni apaktanauh; muih amanglanin-awas malta dutanauh, yulni balna sumaltayang adika.

¹⁷Dawan kidika Jacob tawanni muihni balna muhnina kaupak yakmalda kaunah, yang witing yakat kulnik atik dutayang. Witing yakat kulnin kidika rahm kalkultayang.

¹⁸Yang dawakat walakibis balna Dawan yaklauwi yana kidika, yangna laih sain as yangna Israel nining yakat, Dawan parasni nuhni duwa kidika yaklauwi āna, witing Sayan asangnikau yalahwa kidika.

¹⁹Muih balna kidika rahm manayuyulwarang ki: “Muih dadauna balna spiritnina yakat yulta dakanauh dawakat sukiah balna yakat bik. ¿Muih balna kidika witingna daninawan yakat yuwi dakanin sipawas katpah, dawak dadauna balna yakat yulwi dakana atnin sangka balna yulnina

²⁰dawak witingna maiyulna atnin?” Rahm laih kaput yuyulwarang ki, kaunah yuyulwa kidika laih dauh manah karang ki.[16]

²¹Muih balna kidika pa as kaupak pa ūk yakat uina karang, yuh dawak ditaihna lani kidika karang, dawak yuhdadauwa kidika yulni kulninna daukakalwarang. Kingnina, dawak daninawan yakat bik dutni diyuyulwarang. Dawak muhnina kidika mayakauh tatalwarang

²²dawak usnit kat sauyakat talwarang, kaunah di as bik yayakwas karang, minikunni lani, puksani manah dawak kaidinin manah karang. Di bitik kidika puksani manah karang. Dawak taihna muihni kidika laih sip kiri yaklawas karang.[17]