Read Mayangna Isaías 9 Bible Online

Isaías 9 - Mayangna bible

Isaías 9

¹Tatuna kau laih Papang yaklauwi Zabulón dawak Neftalí sauni Galilea kidika sau yakat lakpamna dai, Papang kukulwas saunina yaihnit kau dai kidika, kidika sauni laih Jordán wasni nakas kaupak kuma kung kat; kaunah usnit kat ayangni nuhni dulauna dai.

²Puksani yak muih bangdai kidika yaringni nuhni tatalna dai; yaringni as kalahna dai puksani kau bang kidika dinina.

³Dawan, alasna nuhni as duaina man; alasnina kidika laih nuhni palni ki.[18] Muih bitik man muhmat yakat alasna ki, sihm di minik yayakwa mani kapat, di minit nuhni as sahyakwi duduwa kapat.

⁴Kat man lawa warau lani kidik yakpamna man bahang muih balna yak taihwi duwa dai kidika, bahang kidika yulni kulninna bukwadai kidika, king dutni yaklauwi ditaihwa dai kidika. Sihm Madián kau daukalnaman dai kapat ki.

⁵Kalbauyang muihni balna kalnina parasni lapapakwa dai kidika, dawak praknina bik ā manah kahna dai kidika busna karang, kuhpau yaklauwi buswi disyamna karang.

⁶Kat muihbin as batahndana bahang mayang akat, Papang yaklauwi muihbin al as mayana, bahang witing yakat parasni kalana king kana atnin. Dawak adika ayangni balna kalalawarang: warkni balna kidika yamni manah, Papang sip minitbayayakwas karang, Papang ban kaput atnin, kulnin aslah lani kingni.

⁷Devid yalahwa pāni yakat yalahna karang; witing king parasni kidika sau bitik yakat kiuna karang dawak kulnin aslah lani kidika laih dahnkalwas karang; witing king kāwa lani kidika laih yamni palni āna karang, dawak rahni balna kidika laih la kat yamnin dawak muih rahmni kidika kalanin karang, warmani kaupak ban kaput karang. Adika laih Dawan dalani lani daihni duwa kidika yaklauwi yamna karang.

⁸Dawan yaklauwi yul sihna Israel Jacob tawanni yakat;

⁹Efraín muihni balna bitik Samaria kau yalalahwa balna kidika amanglalana karang. Witingna manah kapat kaldakawi yuyulwi:

¹⁰“Ladrillos balna kidika bubukna, kaunah kipala kau yamdarang. Ani damni panan kapapat kidika uman rababutna ūnina yamna atnin, kaunah suhun kau diadarang.”

¹¹Dawan yaklauwi yamwak waihla yamadadangni[19] kidika aina; witing yaklauwi pakna niningna yakat kalbauna atnin.

¹²Makilwa niningkauh sirio balna kidika, makawa kauh laih filisteo balna. Takpas kasna as kapat Israel yakat dalpapamna. Kaput kaunah Papang kulnin daukalna kidika bandai; witing kidika ban niningna kauh yaklaunin yamwi.

¹³Kaunah muih kidika Papang yakat kiwas dai, wah kalawa bik; Dawan parasni nuhni duwa yakat walwas dai.

¹⁴Kaput laih Dawan yaklauwi Israel yakat kalyamna tinglau as kat laihwi mamahni dawak tunani dadakwa kapat, pan pipihwa kapat. ¡Adika dini bitik ma aslah yamna dai!

¹⁵(Tunan kidika tanka laih, tatuna muihni balna dawak muihbararak balna, mamahni kidika laih prapit balna alas manah sumamalwa dai kidika.)

¹⁶Tunan muihni balna yaklauwi yayamwakat adika tawanni ta didisna, dawak tanina tuna as wawalna kidika didisna.

¹⁷Kidika bahang Dawan miniknakun ditalwas dai[20] wawahma yak, kaput bik warau dawak tingmak yayal yakat bik. Kat tawan muihni balna bitik dutni yayamwa dai bahang dawakat yul babauwa kidika di dauh manah yuyulwa dai. Kaput bahang Dawan kulnin daukalna kidika yamni kalwas dai; witing kidika ban niningna kauh yaklauna.

¹⁸Kulnin dutni yaklauwi kaldaukalwi sihm kuh yaklauwi wakal damasni kat buswa kapat kaput bik asangpas kau pan nunuhni kidika bik buswi, dawak wayauni balna kidika kalawakat mayakat purwi kil'kiwi.

¹⁹Dawan parasni nuhni duwa kidika kulnin daukalna bahang adika sauni bitik laih dahlna sakki, kuhpau yaklauwi tawan balna buswi; witingna alas walaninabis muihni kakaswi; dawak wirahnina balna yak miniknakun tatalwas ki. Akat muih as witing laih dalwi kaunah yuh kidika ban ki, kut yakat ūk sakkidika laih kaswi kaunah isning lakwas ki.

²¹Manasés yaklauwi Efraín yak kaldaukalwi, dawak biriwi kalyamwi, albupak kalpakwi Judá niningyak uiwi. Kaput kaunah Papang kulnin daukalna kidika ban ki; witing ban niningyakat yaklauwi.