Read Mayangna Levítico 10 Bible Online

Levítico 10 - Mayangna bible

Levítico 10

¹Aarón walanibis balna, Nadab dawak Abiú, witingna walapni busnin kuhni tuturni puwa dini kidika silp duduna, dawak pasyakat kuh tuturni pupuna dawak walapni busnin dini bik dawak Papang yakat kuh dahlwa satuk as yayakna, bahang kidika laih Papang yaklauwi dipakwasdai yamna atnin kaput.

²Kaput laih Dawan muhni tani kaupak kuh kalahwi di busna muihnina bitik. Kaput laih witingna dadauna Dawan muhni tani yakat.

³Usnit kat Moses yaklauwi Aarón yakat kalyulna: —Adika kuduh Papang yulnin kulna dai kidika, witing yulbauna dai yakat: ‘Yang yaihkit yak aiwa balna kidika yang maisihni disyang kidika niningnakaki, dawak Israel balna bitik yakat yang alaskina yaksihni kidika niningnakaki.’ Dawak Aarón di as bik yulwas ap dana.

⁴Usnit kat Moses yaklauwi Misael dawak Elzafán Uziel walanbis balna, yakat diyulna uina atnin, bahang kidika laih Aarón papani dai, dawak diyulna: —Manna aiwa wanaihmana yaktanauh maisihni dis pāni kaupak dawak ū labanni kaupak ahni yakat duyawanauh.

⁵Witingna yaihnit yakat uiwi, laihwi duwi alahuina praknina kakana dai yakauna, Moses yaklauwi amput yamnin dipakna dai kaput.

⁶Usnit kat Moses yaklauwi Aarón dawak walanibis ahal Eleazar dawak Itamar yakat diyulna: —Manna basmana uluhwinih, dawak asmana bik iswi bibiswinih kulnamna dalani wauhtamana kidika yulni, kidika awaskat dautanama, dawak kaput bik Papang kulnin daukalna kidika tawan minit yakat bukwarang. Witing kulninna bukna kidika yulni wauhnin kidika laih Israel balna, Dawan yaklauwi adika kuhnipau kalawak kalahna kidika yulni.

⁷Kalpaknin ūni labanni kidika kaupak naikau kalahwinih, daunamna-awas yulni, manna laih Papang dini kidika kau manautuhwi witing dini manayakna. Dawak kaput yayamna.

⁸Baisa minit yakat, Papang yaklauwi Aarón yakat kalyulna:

⁹“Man dawak walanbis ahal balna kidika balna bik kalpaknin ūni labanni yakat āwanamna kat, wain dinin dini wasak kalna balna kidika dinamna-awaski, kidika awas karang kat wasak balna kidika dinamna-awaski, kidika awas karang kat dautanama kidika laih lā as ban kaput karang, papangnina kaupak bayakwi ban walaninabis kat kiwarang,

¹⁰kaput laih manna sip amanglatanama, yang diki yakna yang kidika, dawak dutni kulna kidika bik, dawak maisihnidis dawak maisihni kulna kidika bik,

¹¹dawak kaput bik sipkarang Israel balna yakat Papang lani balna Moses munah kalana kidika sumalna atnin.”

¹²Usnit kat Moses yaklauwi Aarón dawak walanibis ahal bu baisa duwa dai kidika Eleazar dawak Itamar balna yakat diyulna: —Minitdis kalanin dini plawar Papang yakat dukiwi busna kat sutni watna balna kidika dutanauh, dawak pupuhnin dini dis karak kastanauh sakripais busnin pāni yaihnit yakat, kat kidika dini laih maisihni dis palni bahang.

¹³Maisihni dis pāni yakat yawa kastanauh, kat kidika dini manah man dīma watna sakki, dawak walamabis ahal balna dinina bik, minitdis kalanin dini Papang ayangni nuhni kau buswa kidika. Adika kuduh Dawan yaklauwi yulna dai kidika yamnin.

¹⁴Dawak pasni kuduh minit dis kalanin dini tanit yamni kidika, dawak barahnimak kidika kau laih ilp as kalawa kidika kidik kau kalawi dawak manna kastanama walamabis ahal dawak yayal kidika balna karak kalpakta, pa as maisihni dis kat, dawak kidika muihni pīsni kidika watwi wanaihki karak yamni kalahnin dini palni kidika.

¹⁵Barahnimak kidika laih, ilp as kalanin dini, dawak pasni kidika laih minitdis kalanin dini tanit yamni as kidika, Papang muhni tani yakat duwi kiuna atnin karang, minit dis kalanin dini tanit yamni as kapat, salani balna karak libitwi dukiwa kidika busna atnin yulni. Adika pīsni laih nining ban kaput man dīma karang, datang dawak, dawak walamabis ahal kidika bik dinina karang, Papang yaklauwi yamnin pakna kaput.

¹⁶Kaput laih Moses yulwi dakana muih dutni yamna yulni kuts almuk sakripais yamwa kidika, bahang witing amanglana dai uman bubusna kidika. Kaput laih kasak kulnin daukalna Eleazar dawak Itamar nining yakat balna yakat diyulna:

¹⁷—¿Ais yamta muih dutni yamna yulni sakripais busnamana kidi kapat Papang dini yakna kidika yakat kastas mana daih? Kidika laih dias maisihni dis pāni ki, Papang yaklauwi manna yakat manah muih dutni yamna kidika trukta, Papang kaupak dutni dawak disnin kidika dunamna.

¹⁸Kat āni kidika maisihni dis pāni kidika pastawa nining yakat duwi uiwas dadana, dawak manna kasnamana dai sakripais yamna kidika pāni maisihni dis yakat, yang yamnin yulna yang kaput.

¹⁹Dawak Aarón yaklauwi nangnitlana: —Talah warmani witingna muih dutni yamna kidika yulni sakripais yayamna dawak karauni kauna busnin sakripaisni bik yayamna, dawak yang akat bik sihm adika dini yakalahna yang warmani muih dutni yamna yulni sakripais busna kidika kasnayang dai kat laih ¿Papang yamni talwadaipa?

²⁰Moses kidika yulni dakawak isninglak dana.