Read Mayangna Levítico 11 Bible Online

Levítico 11 - Mayangna bible

Levítico 11

¹Papang kiuna Moses yakat dawak Aarón yakat bik dawak diyulna:

²“Israel balna yakat diyultah, tinglau balna dawak asangpas dini balna sau yakat bangkidika bitik sipki kasninna

³dibasta kaswi akahryang[4] balna, tipisninamak sahna balna kidika;

⁴kaunah sip-awaskarang kasninna adika dini balna dibasta manah kaswa karang bik, dawak tipisnimak rahna karang bik: “Kiamil kidika dibasta kasyang kaunah tipisnimak rahna awaki. Kidika bahang maisihni dutni kulnamna ki.

⁵“Tibam kidika dibasta kasyang kaunah tipisnimak rahwas ki. Kidika bahang maisihni dutni kulnamnaki.

⁶“Tibam nuhni kidika dibasta kaswi, kaunah tipisnimak rahna awaski. Kidika bahang maisihni dutni kulnamki.

⁷“Kusih kidika tipisnimak duwi, dawak bik bu rahna. Kaunah dutni maisihni kulnamna ki.

⁸“Kidika dini muihni balna kidika kasnamna-awaski dawak kidika dini balna dadauna kat laihnin bik awaski. Bahang dutni maisihni kulnamna ki.

⁹“Was paskau dini balna kidika, kuma pasyakat pa, kidika awas kat was murwa balna kidika yakatpa, kidika dini balna manna kasnamna karang, silini dawak kisini duwa balna kidika manah.

¹⁰Kaunah silini dis dawak kisini bik dis balna kidika laih maisihni, dutni kulnamna ki, kuma pasyak dawak was murwa balna pasyakat karang bik, di nunuhni dawak dibinina karang bik sihm kapat.

¹¹Dini muihni kidika kasnamna-awaski; kidika dini balna laih dutni kulnamna ki, dawak di muihni dauna kidika bik dutni kulnamna ki.

¹²Was pa dini balna bitik silini dawak kisini dis kidika dutni kulnamna ki.

¹³“Di lawani duwa balna kastas atnamna kidika laih adika balna; nawatkauh laih dutni kulnamna ki: yakalnuh, kuma paskau yanikal,

¹⁴dawak yakal bikikisni satni anan kuyuyulni balna kidika,

¹⁵kuparis satni balna bitik,

¹⁶uhu nuhni, kubam, gaviota dawak yakal satni balna,

¹⁷mukmuk, kuma kupaniris, ibis,

¹⁸cisni, pelicano, upam,

¹⁹yamni nuhni, dawak yamni satni balna, abubilla dawak umis.

²⁰“Dimuih balna satni bitik lawani kau yaklauwi, lapakwa[5] balna kidika laih dutni kulnamna ki,

²¹kaput kaunah kasnamna sipki, lawanina kau yaklalauwakarang, dawak lapapakwarang bik, witingna barahninamak kidika kalnina karak libitna kidika lamwi, dawak witingna sau minit yakat susutwa kidika.

²²Bahang adika balna sipki kasnamna: siksik satni balna kidika, sau dauh balna kiswah balna dawak sisin balna.

²³Kaunah dimuih ūk balna lawanina kau yaklalauwi dawak lapapakwa balna kidika laih dutni kulnamnaki.

²⁴“Adika yamtanama maisihni kaltanama: “Adika dini dauna kat muihni kidika laihtanama kat maisihni kaltanama pukta kat.

²⁵“Adika dini balna angdik dauna kat muihni kidika laihta dulautanama kat, prakmana kidika suhnamna ki, dawak manna kidika maisihni dutni kalna mana karang pukta kat.

²⁶“Tinglau dawak asangpas dini bitik, tipisnimak duwarang, dawak rahna awas karang, dawak bik dibasta manah kasyang awas karangkat, manna kulnamna ki, kidika laih maisihni dutni, bahang waiskarang bik laihwarang kat, witing bik dutni maisihni kalna karang.

²⁷“Angdik tingnilau kidika awaskat asangpas dini kidik kalnina arungka duwa karang dawak kalni paskau atakwi lik karang kat, maisihni dutni kulnamna karang; wais karang bik dini balna kidika dauna kat laihwarang kat, witing bik maisihni dutni kalna karang pukta kat.

²⁸Kaput bik, dauna kat laihwi dulauwarang kat witing prakni suhnin ki, dawak maisihni dutni kalna karang pukta kat, kat manna lawa kidika dini balna daih maisihni dutni kulnamna ki.

²⁹“Sangnika duwa balna pasnina kau mumurwa balna kidika sau minit yakat, manna maisihni kulnamna karang, adika balna: waskunkah, matis balna, dawak bil satni balna bik,

³⁰karak kapat, yapu, tuyukbah, kamasihrka dawak amsuku.

³¹“Tinglau, dawak asangpas dini balna pasyakat adika balna kuduh manna maisihni dutni kultanama kidika. Kidika dini balna dadauwak muihni kidika yakat laihna karang kat maisihni dutni kulna karang pukta kat.

³²“Kaput bik laih dini dauna kidika di ūk minit yak bukwarang kat kidika dini laih dutni maisihni kalna karang. Kidika dini sipki pan kau di yamna balna kapatnah, prak kanin, di unitak karangpa, di punin dini as karang pa kaput bik wark yamnin di as karangpa; bahang kidika dini kidik laih was pasyak ānin karang, kaput laih pukta kat maisihni dutni karang, kidika kaupak laih maisihnidis kalna karang.

³³“Kidika di dauna kidika sau suba pasyakat kana karangkat, kidika suba pasyakat di bangkidika bitik laih maisihni dutni kalna karang bahang subani kidika laih sahpamnin karang.

³⁴Kidika subani paskau was duwa kidika di kasnin dini as minit yakat tahwarang kat, maisihni dutni kalna karang, dawak kidika yakat dinin dini bik pakdai kat kidika bik maisihni dutni kalana karang.

³⁵Kidika dini dauna kidika di as minit yakat bukna karang kat, kidika laih maisihni dutni kalna karang, plawar busnin ūni karang bik sahnin karang ki. Kat kidika dini laih maisihni dutni bahang, manna bik kaput kulnamna ki.

³⁶“Kaput kaunah, was tuna burhwi kalahwa balna kidika awaskat pa kuhrna kaupak was yayakwa balna kidika laih, ban maisihni diskarang, kaunah wais kat kidika di dauna kidik laihwarang kat maisihni dutni kalna karang.

³⁷“Kidika dini dauna kidika, di minik dahnin balna minityakat bukna karang kat, kidika di minik balna laih ban maisihni diskarang,

³⁸kaunah di minik dahnin dini kidika suihna kat, kidika dini dauna kidika bukna karang kat, di minik minit yakat, kidika dini minik laih maisihni dutni kulna karang.

³⁹“Manna didauh balna kasnin dutamana kidika dauna karangkat, dawak didauh dauna kidika laihwarang kat maisihni dutni karang puktayakat,

⁴⁰tinglau pa, asangpas dini pa dauna kat muihni kidika kastanama kat, asmanana suhtanama dawak kaput laih masan kat maisihni manakulna karang; muih as kat di dauna tuskat yakwarang kat, witing asnina suhwarang, dawak maisihni kalkulna karang pukta kat.

⁴¹“Bil satni balna kidika kasnamna awaski, sau kau kalmumurwa kidika pasnina kau; kidika dini balna laih dudutni ki.

⁴²“Sau minit yakat didauh balna pasninakau mumurwa balna kidika, as bik kasnamna awaski, pasni kau murwa kidik, kidika awasbik kalni arungka, minitkau duwa kidika balna bik, kat kidika balna laih dutni kulna balna bahang.

⁴³Manna dutni maisihni dutni kakalwinih, kidika didauh pasnina kau mumurwa balna karak,

⁴⁴kat yang kuduh manna Damanawan, Papangmana yang. Manna maisihni dis atnamna ki, holi atnin, kat yang laih holi yang bahang. Sau kau mumurwa balna kidika laihta maisihni kakalwinih.

⁴⁵Yang laih Dawan yang, Egipto kaupak manayakna kidika, Papangmana atnin yulni. Kaput bahang manna holi atnamna ki, kat yang holi yang bahang.”

⁴⁶Adika lani balna manatayang, didauh balna, dilawani balna, dawak waspa kau balna kidika, dawak sau minit kau mumurwa balna kidika balna bitik lani,

⁴⁷kaput laih manna amanglanamna, angdika maisihni pa dawak angdika maisihni dispa, kidika dini balna angdika kasnin dini pa dawak kasnin dini awas pa.