Read Mayangna Levítico 12 Bible Online

Levítico 12 - Mayangna bible

Levítico 12

¹Papang yaklauwi Moses yakat kiwi kalyulna:

²“Israel balna yakat adika yulni diyultah: muih yal as muih karuk dawi muihni bin kidika yakwak al karang kat, ma tiaskaubu witing kidika maisihni dutni karang, witing nining sikninis kallaihwa kapat.

³Muih albin kidika ma tiaskaubās laihwak batahndana kaupak, Papang sainni kalana atnin karang.

⁴Kaunah nanangni laih āni kalahwa kidika yulni ban maisihni dis kalahwa karang ma 33 kat. Kaput bahang witing sip-awas karang Papang dini yakna balna kidika laihnin, dawak holi pāni yakat bik sip-awas karang kanin, maisihni dis kalahwa mani balna kidika baisa bayakkiwas kat.

⁵Kaunah muih yalbin kat duna karang kat, maisihni kalkulna karang wīk bas witing nining sikninis kallaihwa kapat, kaunah witing baisa āni kalahwa kidika yulni maisihni dis kalwarang ma 66 kat.

⁶“Witing maisihnidis kalwa mani balna kidika bayak dawak, walanibis kidika al karangpa kidika awaskat yal karangpa bik, nanangni kidika yaklauwi kalpaknin ūni labanni yakat duwi kiunin karang sīp as kurih laihna kat, karauni kauna sakripais busna atnin, dawak buhtuku walanibis bin as dukiuna karang, kidika awaskat buhtuku bikisni kapatnah as, dutni kidika yulni sakripais busnin, bahang kidika laih sumalyang tingni yakat āna karang,

⁷dawak sumalyang kidika yaklauwi Papang muhni yakat duwi kiuna karang, witing dutni dawak disnin kidika yulni, kaput laih witing yal kidika āni kira kaupak maisihni dis kalna karang.” Adika sumalna balna kuduh muihbin yalpa, kidika awaskat albinpa batanh dawak amput yamnin kidika.

⁸Dawak nanang kidika dis karang kat sīp as yaknin kidika, sipkarang buhtuku bikisni bu duwi kiunin kidika awaskat buhtuku wawahma kat bu duwi kiunin, as kidika laih karauni kauna sakripais busnin, dawak ūk kidika laih dutni yulni sakripais busna karang; kaput sumalyang kidika yaklauwi dutni dawak disnin kidika yulna karang, kaput laih yal kidika maisihnidis kalna karang.