Read Mayangna Levítico 13 Bible Online

Levítico 13 - Mayangna bible

Levítico 13

¹Papang yaklauwi kiuna Moses dawak Aarón yakat, bahang aput diyulna:

²“Muih as kalbauwarang pa unitak minit yakat kilwarangpa kidika awaskat sani kalahwarangpa, witing muihni yakat, kidika awaskat muihni yakat lipar kalahwarangpa kat, sumalyang Aarón yakat duwi kiuna karang, kidika-awas bik, witing sulani sumalyang balna yakat.

³Sumalyang kidika yaklauwi laihwi talna karang unitak kau pilauni kidika, kaput laih pilauni pasyakat butuni kidika pihni kalna karang kat, kaput bik pilauni kidika bahna karang kat, rahm palni laih lipar karang. Sumalyang kidika laihwi talna usnit, kat kidika muihni laih kalkulna karang maisihni dutni.

⁴“Unitak kau kalahna kidika pihni karang kat, kaunah unitak kidika karak bahna karang kat, butuni bik pihni awas karangkat, sumalyang yaklauwi siknis muihni kidika āwi putna karang ma tiaskaubu praisni.

⁵Ma tiaskaubu bayakwak watwi laihwi talnin karang, dawak pilauni kidika baisa panuhwas ban karang kat, watwi ma tiaskaubu āwi putna karang.

⁶Ma tiaskaubu bayakwak watwi yakwi laihwi talwarang, bahang sikninis kidika apis kalyamwa karang kat, sumalyang yaklauwi yulna karang witing kidika maisihni dis ki, siknis muihni kidika dauh manah unitak yakat kilna dai, kaput laih siknis muihni asnina kidika suhwarang, dawak maisihni dis kalna karang.

⁷“Kaunah unitak yakat kilna kidika baisa panuhwarang kat laihwi talwi maisihnidis ki atna kidika usnitkat, witing watwi kiunin karang sumalyang yakat kallaihwi talna atnin yulni.

⁸Siknis muihni kidika sumalyang yaklauwi laihwi talwak unitak yakat kilna kidika muihni bitik yakat kalahna karangkat, witing kidika maisihni dutni kalkulna karang kat lipar sikninis laihna bahang.[6]

⁹“Muih as witing lipar duwa karang kat sumalyang yakat dukiunin karang.

¹⁰Sumalyang kidika yaklauwi laihwi talna karang, witing unitak yakat bahngna kidika pihni karang kat, dawak butuni bik pihni kalnakarang kat, dawak muihni kau kilna kidika muihni pauni kau laih karangkat,

¹¹unitak yakat lipar laihna kidika naikarang. Kaput laih sumalyang yaklauwi maisihni dutni kulna karang kidika muihni, bahang watwi āwi punin-awas karang kat uman maisihni dutni kulna bahang.

¹²“Lipar kidika sirihni nuhuwarang kat, kalni kaupak tunankat, dawak kaput bik, sumalyang talnin sīp kidika kat,

¹³sumalyang kidika yaklauwi laihwi talna karang, dawak muihni bitik lipar laihna karang kat, sumalyang yaklauwi maisihni dis kulna karang, kat lipar yaklauwi pihni yamna bahang, witing kidika maisihni dis kalna.

¹⁴Kaunah kidika muihni yakat, muihni pauni kau lāih kalahna karang kat, witing maisihni dutni kalna karang.

¹⁵Kaput laih sumalyang kidika yaklauwi muihni pauni manah kidika laihwi talwarang, duwak witing yulna karang kidika muihni laih maisihni dutni ki, kat muihni pauni manah kidika laih maisihni dutni kulna bahang: dawak kidika laih lipar.

¹⁶“Muihni pauni manah kidika pihni kalwarang kat, siknis muihni kidika sumalyang yakat kiunin karang

¹⁷laihwi talna atnin yulnin, dawak sumalyang kidika laihwi talwak pilauni kidika pihni kalwak, yulna karang siknis muihni kidika laih maisihni diski, bahang witing laih maisihni dis palni kalna.

¹⁸“Muih as pilau duwakat unitak yakat, dawak pilauni kidika yamni kalna,

¹⁹dawak yamlana pāni yakat bangki pihni kalna karang kat kidika-awas bik pihni kapat dawak pauni kaput karang kat, sumalyang kiunin karang.

²⁰Sumalyang kidika talwak unitak minit yakat bahngna karangkat, dawak butuni kidika bik pihni kalna karang kat, kidika muihni laih maisihni dutni kalna karang, kat witing pilau duwa kidika laih lipar bahang.

²¹Pilauni pāni kidika kau butuni kidika pihni-awas karang, dawak bik bangwas karang kat, kaunah nawatwi kauh laih yamlawa karangkat, kidika muihni āwi putnin karang ma tiaskaubu.

²²Kaunah sikninis kidika baisa panuhwarang kat unitak minit yakat, sumalyang kidika yaklauwi yulna karang kidika muihni laih maisihni dutni ki, kat kalkilna balna kidika laih lipar.

²³Kaunah kalkilna pāni kidika baisa panuhwas, dawak nawatkauh laih yamlawarang kat, sumalyang yaklauwi yulna karang kidika muihni laih maisihni dis kalna karang.

²⁴“Muih as unitak yakat busna karang kat, dawak muihni busna pauni kidika yakat pihni-pauni kapat duwarang kat,

²⁵sumalyang kidika laihwi talna karang. Dawak laihna pāni yakat butuni kidika pihni kalna karang kat, wat laihna pāni kidika bahka karang kat, kalbusna pāni yakat lipar kalahna, kaput laih sumalyang kidika yaklauwi yulna karang maisihni dutni ki lipar duwa bahang.

²⁶Sumalyang yaklauwi laihwi talwak muihni kilna pāni yakat butuni kidika pihni kalwas kat, dawak bik bahka bik awaskarang kat unitak minit, kaunah nawatkauh laih yamlawi kiwak, kidika muihni laih watwi āwi putna karang ma tiaskaubu praisni.

²⁷Ma tiaskaubu laihwak sumalyang kidika watwi laihwi talwarang, dawak sikninis kidika baisa nuhni kalna karang kat, sumalyang kidika yaklauwi yulna karang kidika muihni laih maisihni dutni ki, kat lipar sikninis duwa bahang

²⁸kaunah siknis kidika panuhwas kat unitak yakat, nawatkauh laih dislawa karang, kat, dawak busna kidika yulni bahngna karang, bahang kaput laih sumalyang kidika yaklauwi yulna karang siknis muihni kidika laih maisihni diski kal busna kidika manah yamlawi.

²⁹“Al karangpa dawak yal karang pa, tunan yakat kilna duwa karangpa, kidika-awas kat kungnibas yakat kilna karang pa kat,

³⁰sumalyang kidika yaklauwi laihwi talna karang Pilauni kidika, unitak minit yakat bahka karang kat, dawak butuni kidika lalahni kapat karang kat dawak bik bilis karang kat, sumalyang kidika yaklauwi yulwarang kidika muihni laih maisihni dutni ki kat kungnibas yakat dawak tunan yakat bik lipar duwa bahang.

³¹Sumalyang kidika laihwi talwak pilauni kidika bahka-awaskarang kat unitak yakat, dawak butuni bik sani-awas karang kat, kidika muihni laih āwi putnin karang ki ma tiaskaubu praisni.

³²Ma tiaskaubu yakat, sumalyang yaklauwi watwi laihwi talwarang pilauni kidika, talwak baisa panuhwas kat, dawak unitak yakat baisa kudungwas kat, dawak kungnibas balna bik lalahni kapat awas kat,

³³sumalyang yaklauwi pakwarang siknis muihni yakat pakwarang kungnibas karhna atnin, pilauni duwa pāni yakat manah, dawak baisa tanit yakat ma tiaskaubu āwi putna karang.

³⁴Ma tiaskaubu bayakwak watwi sumalyang kidika laihwi talwarang, dawak pilauni kidika baisa panuhwas dawak bik bahkawas karang kat, sumalyang yaklauwi yulwarang siknis muihni kidika laih maisihni as bik diski, bahang asnina suhwarang dawak maisihni dis kalwarang.

³⁵Kaunah pilauni kidika laihwi talwi dawak usnit kat panuhwarang kat

³⁶sumalyang kidika watwi siknis muihni yakat laihwi talnakarang; pilauni kidika baisa unitak minit yakat kalahna karang kat, basni kidika awaskat kungnibas balna kidika laihwi talnin bik awaskarang; kidika muihni laih maisihni dutni ki.

³⁷Kaunah talwak pilauni kidika laihwatna kat dawak basni bik sani kalahna kat pilauni kidika kaupak yamni kalahna bahang kidika muihni laih maisihni diski kaput laih sumalyang yaklauwi yulna karang, kidika muihni laih maisihni diski.

³⁸“Al as karangpa, yal karang pa, unitak yakat kalkilna pihni duwa karang kat,

³⁹sumalyang yaklauwi laihwi talwarang unitak yakat, dawak pihni kapat duwa karang kat, kidika laih laih dauh kalkilna karang, kaput kat kidika muihni laih, maisihni awaski.

⁴⁰“Muih al basni bitik uhlawak basni dis dawarangkat, kaunah kidika muihni laih maisihni diskarang.

⁴¹Muhnit kau basni balna kidika uhlawak didis dawarang kaunah maisihni awas karang.

⁴²Kaunah pilauni as pauni pihni kalahwarang kat basni uhna pauni manah pāni yakat, dangnit niningyakauh, kidika awaskat muhnit nining yakat, kidika laih lipar as mahka kalahwa sakki.

⁴³Kaput laih sumalyang yaklauwi laihwi talwarang, dawak basni uhna pāni yakat bahngna kidika pihni-pauni karang kat, sihm muih kau lipar laihna kapat,

⁴⁴karang kat, kidika lani laih lipar duwi kat tunan kidika kilnamanah bahang. Kidika alni laih maisihni dutni ki, bahang sumalyang kidika yaklauwi kaput yulna karang.

⁴⁵“Angdika muihni lipar duwa kat, kidika muihni laih parakni iswi bisna karang dawak tunan bik laih ahni manah atnin karang, dawak muhni kidika apis kurahwi dawi parasni sarahwi yulwarang, ¡Maisihni dutni, maisihni dutni!

⁴⁶Witing pilauni kidika ban duwa karang kat, kidika ahni laih maisihni dutni karang; witing alas yalahnin karang ū labanni balna paskaupak naikau ahni yakat.

⁴⁷“Linin asnina yakat sani as laihna karangkat,

⁴⁸dawak kanin asnina kau di yamna kapatnah yakat bik kahna karang, kidika awaskat di unitak balna kapatnah,

⁴⁹dawak kahna kidika sangni kayah butuni kapat karang, kidika awas bik awas bik pauni kapat karang kat, kidika laih lipar[7] bahang sumalyang yakat niningkana atnin ki.

⁵⁰Sumalyang kidika yaklauwi laihwi talwarang dawak kalhni dini kidika āwi putna karang ma tiaskaubu praisni kat.

⁵¹Ma tiaskaubu bayakwak sani kahna kidika laihwi talwarang; laihna kidika baisa panuhwarang kat, sani laihna kidika laih lipar dutni as ki, bahang kahna dini kidika laih maisihni dutni ki.

⁵²Kaput laih ais karang bik, kidik sani laihna karang kat, bitik laih buspamna atnin karang, kat lipar as dutni bahang,

⁵³kaunah sumalyang kidika yaklauwi laihwi talwak muihni kilna balna kidika puruhwas kat,

⁵⁴pakna karang sani laih kidika suhna atnin, dawak dini kidika watwi ma tiaskaubu āwi putna karang.

⁵⁵“Sani laihna kidika suhwak usnit kat, sumalyang yaklauwi laihwi talna karang. Talwak sani laihna kidika diswas karangkat, kidika sani laihna kidika laih maisihni dutni karang, bahang dini kidika laih busna karang, sani laihna kidika panuhwas karang bik, kidika laih banikasna as ki, pastawa nining yakat, kidika awaskat ahni niningyakauh karang bik.

⁵⁶Sumalyang yaklauwi laihwi talwak, yamni kalna kalna karang kat suhna usnit kat, asnina, kidika awaskat unitak yakat bik iswi biswarang.

⁵⁷Kaunah watwi kalahwarang kat sihm asnina yakat, sani laihna asnina, kidika awas kat di unitak karang pa bik busna atnin karang.

⁵⁸Prak karangpa, di unitak karangpa bik sani laihna kidika disnakarang kat, wat as suhna karang dawak maisihni dis kalna karang.”

⁵⁹Adika lani balna kuduh lipar laihna balna kidika asna yakat, di unitak yakat bik kaput laih yulna atnin, maisihni dutni duwapa kidika awaskat maisihni dis pa.